¹ Entritantu, kes multidon ki ta txigaba na Jezus fika tantu txeu ki es kumesa ta masa kumpanheru. Nton, Jezus kumesa ta pâpia ku ses disciplu y E fla-s: «Nhos mê, nhos da kudadu ku furmentu di farizeus, ki é finjimentu. ² Ténpu ta ben kandu tudu ki sta disfarsado ta ben ser reveladu, y tudu kuza sukundidu ta ben ser konxedu. ³ Nton tudu kuza ki nhos fla na sukuru, es ta ben ser obidu na lus, y kes kuza ki nhos segreda, pa tras di pórta trankadu, es ta ser gritadu la di terasu di tudu kaza. ⁴ Asin, N ta fla nhos, nhas amigu, ka nhos xinti medu di kes ki sô pode mata korpu, y dipôs es ka pode faze nada más. ⁵ Má N ta mostra-nhos di ken ki nhos debe xinti medu. Nhos debe xinti medu di Déus, ki dipôs di mata, E ten puder pa bota na inférnu. Sin, N ta rapiti, é di El ki nhos debe xinti medu. ⁶ Tudu algen sabe ma sinku txóta ta bendedu sô pa dôs tiston. Má mézmu asin, Déus ka ta skese di ninhun di es. ⁷ Nton, ka nhos xinti medu, pamodi nhos ta bale mutu más pa El, di ki un monti di txóta. Ti kabélu di nhos kabésa, Déus sabe kantu ten.» ⁸ Y Jezus kontínua ta pâpia: «Y N ta fla nhos inda más, tudu algen ki ta rakonhese-M dianti gentis li na téra, Fidju di Ómi ta rakonhese-l tambe dianti kes anju di Déus. ⁹ Má kel algen ki nega-M dianti gentis li na téra, N ta nega-l dianti di anju di Déus. ¹⁰ Y tudu algen ki ta fla un palavra kóntra Fidju di Ómi pode ser perduadu, má kel algen ki ta pâpia mal di Spritu Santu ka ta ser perduadu. ¹¹ Y óra ki gentis ta leba-nhos pa ser julgadu na sinagóga, dianti di governantis y otoridadis, ka nhos priokupa ku manera ki nhos debe difendi nhos kabésa, ô ku kuzé ki nhos debe fla, ¹² pamodi Spritu Santu ta inxina-nhos kuzé ki é nisisáriu pa nhos fla, na kel óra mê.» ¹³ Un ómi ki staba na meiu di multidon fla Jezus:« Méstri, fla nha irmon pa e raparti eransa ku mi.» ¹⁴ Má Jezus fla-l: «Ómi, ken ki skodje-M pa N ser juís ô árbitru entri nhos?» ¹⁵ Nton Jezus bira pa povu, y E fla-s: «Atenson! Nhos ten kudadu kóntra tudu tipu di ganánsia, pamodi bida di algen ka sta na monti kuza ki e tene.» ¹⁶ Nton, Jezus faze un konparason, y E fla-s: «Tenba un sértu ómi riku ki tenba un kanpu ki da un grandi kodjéta. ¹⁷ Y kel ómi kumesa ta purgunta se kabésa: kuzé ki N ta faze ku tudu es kodjéta? pamodi, N ka ten lugar pa N guarda tudu kuza ki N kodje." ¹⁸ Nton, e fla: N sabe kuzé ki N ta faze. N ta ronba nhas armazén, y N ta faze otus más grandi. Asin, N ta guarda es kodjéta, y tudu kuza ki N ten. ¹⁹ Y dipôs, N ta fla nha kabésa: Ómi, gósi dja bu ten txeu kuza guardadu pa monti anu. Nton, fika sô ta diskansa, ta kume, ta bebe, y vive na sabura.> ²⁰ Má Déus fla-l: <Ómi, abo é tolu! Es noti mê, bu bida ta ser tomadu. Y gó, kenha ki ta ben fika ku tudu kes kuza ki bu guarda?> ²¹ É asin ki ta ben kontisi ku kel algen ki ta guarda txeu rikésa pa se kabésa, má ka é riku na kes kuza ki é inportanti pa Déus.» ²² Dipôs Jezus bira pa ses disciplu y E fla-s: «Purisu N ta fla nhos, ka nhos priokupa ku kuzas di bida, si nhos ten kumida pa kume, nen pa nhos korpu, si nhos ten ropa pa bisti, ²³ pamodi bida é más ki kumida y korpu é mas ki ropa. ²⁴ Nhos pensa na korbu. Es ka ta símia, es ka ta korta, y es ka ten dispénsa nen armazén. Mézmu asin, Déus ta toma kónta di es. Y nhos gó, nhos ten mutu más valor ki pasu. ²⁵ Kal di nhos, ku tudu se fadiga, podi krisenta más un óra na se ténpu di bida? ²⁶ Purtantu, si nada nhos ka pode faze ku es kuza pikinoti, pamodi ki nhos ta fadiga ku kes otu? ²⁷ Nhos pensa na flor di kanpu, modi ki es ta kria. Es ka ta trabadja, nen es ka ta tise panu. Má, N ta fla-nhos, nen rei Salumon, ku tudu se rikéza, e ka txiga di bisti tal kómu un di es flor. ²⁸ Si Déus ta bisti padja bunitu asin, ki sta li na kanpu oji, má ki ta botadu na lumi manhan, kantu más ki Déus ta bisti nhos. Nhos é gentis di fé pikinoti! ²⁹ Nton, ka nhos fadiga ku kes kuza ki nhos mesti pa kume y bebe, y ka nhos fika priokupadu. ³⁰ É gentis di es mundu ki ta fika priokupadu ta buska tudu kes kuza ki nhos meste. ³¹ Nton, ántis di tudu, nhos fika ta buska Reinu di Déus, y Déus ta da-nhos kes otu kuza tanbe. ³² Ka nhos xinti medu, ribanhu pikinoti, pamodi nhos pai ta sta mutu konténti pa da-nhos se Reinu. ³³ Nhos bende kes kuza ki nhos tene, y nhos da dinheru pa póbri. Nhos ranja nhos bólsas ki ka ta bira bedjo, y guarda nhos tizoru na séu undi ki e ka ta sgota nunka. La, ladron ka ta pode txiga pértu, nen trasa ka ta pode straga. ³⁴ Pamodi, la undi ki sta nhos tizoru, nhos kurason sta tanbe.» ³⁵ Jezus kontínua ta inxina ses disiplu y E fla-s: «Nhos fika priparadu pa sirbisu, ku sintu y panu maradu, y ku lumi na kandiâ, ³⁶ móda kes sérvu ki sa ta spéra ses sinhor vólta di fésta di kasamentu, pa es pode abri-l pórta sin ki e txiga konkô. ³⁷ Filis é kes sérvu ki, kandu ses sinhor ben, e ta atxa-s priparadu asin. N ta fla-nhos, na verdadi, ma kel sinhor ta ba bisti ropa di sirbisu, E ta poi kes sérvu toma lugar na se méza, y el própi ta txiga na es pa sirbi-s. ³⁸ Sin, kes sérvu ta ser mutu filis si ses sinhor ta atxa-s priparadu pa se vólta, mézmu si e ta vólta la pa mea-noti, ô di madrugada. ³⁹ Asin, nhos fika ta sabe, si donu di kaza sabeba kal óra ki ladron ta ben, e ta staba priparadu, y e ka ta dexaba ladron ronba se kaza. ⁴⁰ Purtantu, nhos debe sta sénpri priparadu, pamodi Fidjo di Ómi ta ben na un óra ki nhos ka ta pensa.» ⁴¹ Nton Pedru purgunta Jezus: «Sinhor, é sô pa nos disiplu ki bu konta es konparason, ô é pa tudu algen?» ⁴² Y Sinhor rasponde-l: « Nton, kenha ki é kel sérvu fiel y prudenti? El é kel ki sinhor ta poi pa ser nkaregadu di ses otu sérvu, pa da-s ses párti di kumida na ténpu sértu, inkuantu sinhor ka sta la. ⁴³ Filis é kel sérvu, ki se sinhor ta atxa-l ta faze móda e mandadu, óra ki se sinhor ta volta. ⁴⁴ N ta fla-nhos, na verdadi, kel sinhor ta ben poi kel sérvu pa ser nkaregadu di tudu kuza ki e ten. ⁴⁵ Má kuze ki ta ben kontisi si kel sérvu nkaregadu ta fla se kabésa: "Nha sinhor ta dura ku ben". Nton e kumesa ta sota kes otu sérvu, matxu ku fémia, y e ta fika sô ta kume y ta bebe, ti ki e ta fika moku. ⁴⁶ Asin, sinhor di kel sérvu nkaregadu ta volta na un dia ki kel sérvu ka ta spéra-l, y na un óra ki e ka sabe. Nton, se sinhor ta manda korta-l na meiu, y e ta manda bota ses padás na lugar di gentis sen fé. ⁴⁷ Kel sérvu ki sabe vontadi di sinhor, má e ka pripara, nen e ka faze kuza ki se sinhor manda, e ta ser kastigadu ku txeu xikotada. ⁴⁸ Má kel sérvu ki ka sabe vontadi di sinhor, y e faze kuza mariadu ki merese kastigu, e ta ser kastigadu ku ménus xikotada. Má, pa tudu algen ki dadu txeu, txeu ta ser izijidu di el, y pa kel algen ki podu nkaregadu di txeu, inda más ta ser pididu di el.» ⁴⁹ Jezus kontínua ta pâpia: «N ben pa poi lumi na téra, y kómu ki N ten gana pa e kumesa ta ardi. ⁵⁰ Tanbe, N mesti pasa pa un batizmu, y kómu ki N sta angustiadu, ti ki es batizmu ta konpleta. ⁵¹ Nhos pensa ma N ben pa traze pas na téra? Nou! Okontráriu, N ta fla nhos, N ben traze divizon. ⁵² Di gósi-en-dianti, na un família ki ten sinku algen, es ta fika divididu três kóntra dôs y dôs kóntra três. ⁵³ Ta ben fika divididu: pai kóntra fidju matxu y fidju matxu kóntra pai; mai kóntra fidju fémia y fidju fémia kóntra mai; y sógra kóntra nóra y nóra kóntra sógra.» ⁵⁴ Jezus fla multidon tanbe: "Kandu nhos odja núven ta subi na kanbar di sól, nhos ta fla lógu: "Txuba ta ben". Y asin ta kontise. ⁵⁵ Y óra ki hos xinti béntu ta sopra di sul, nhos ta fla: "Ta ben fase kalor". Y asin ta kontisi. ⁵⁶ Finjidoris, nhos sabe interpreta sinal di téra y di séu. Nton, manera ki nhos ka sabe interpreta sinal di es ténpu?" ⁵⁷ Jezus kontínua ta fla: «Pamodi ki nhos própi ka ta julga kel kuza ki é justu? ⁵⁸ Kandu algen ta leba-u pa un otoridadi pa faze kexa kóntra bo, faze tudu manera pa bu poi sábi ku el na kaminhu. Sinon, e ta rasta-u ti juís, juís ta intrega-u na mon di pulísia, y pulísia ta fitxa-u na kadiâ. ⁵⁹ N ta fla-u ma bu ka ta sai di kel kadiâ ti ki bu paga últimu tiston.»