¹ Kuntise ki, Jizus staba pertu di un lugar ta ora i kantu ki e kaba, un di ses disiplus fla-l: Sinhor, nxina-nu ora, sima Djon nxina ses disiplus. ² Jizus nxina-s ta fla-s: Ora ki nhos ora, nhos fla: Pai, santifikadu é bu Nomi. Ki bu reinu txiga. ³ Da-nu pon ki nu ta meste tudu dia; ⁴ purdua-nu nos pekadu, sima tanbe nu ta purdua kes ki ta debe-nu. Libra-nu di tentason. ⁵ Jizus fla-s: Kenha ki na nhos meiu, si ten un amigu i meia noti bai atxa-l i fla-l: Amigu, nprista-m tres pon, ⁶ pamodi un nha amigu txiga gosi di viaji i ami N ka tini nada pa N da-l. ⁷ I kel ki sta la dentu kaza, ta rusponde-l: Ka bu xatia-m, pamodi dja N fitxa porta i mi ku nhas fidjus dja nu sta na kama. N ka pode labanta pa N da-u pon. ⁸ N ta fla nhos, si kre e ka labanta pa da-l pon pamodi a es é amigu, si kre e ta labanta pamodi e ta fika ta fastenta-l na porta. Nton, e ta labanta i e ta da-l kantu pon ki meste. ⁹ N ta fla nhos: Nhos pidi i nhos ta dadu; nhos djobe i nhos ta atxa; nhos konku i es ta abri nhos. ¹⁰ Pamodi tudu algen ki ta pidi, ta resebe; kel ki buska, ta atxa; i kel ki konku, es ta abri pa el. ¹¹ Ki pai ki sta na nhos meiu, ki si fidju pidi-l un pexi, na lugar di pexi e ta da-l un kobra? ¹² O, si e pidi-l un ovu, e ta da-l un skorpion? ¹³ Purtantu, si anhos ki é mau, nhos sabe dá bons kuzas pa nhos fidju, kantu mas nhos Pai di seu ta dá nhos Spritu Santu pa tudu kes ki pidi-L. ¹⁴ Na otu mumentu, Jizus staba ta spulsa un dimoniu ki era mudu, kantu dimoniu sai, muda papia. Multidon fika perpleksu! ¹⁵ Ma otus algen fla: É pa Belzebu, xéfi di dimoniu, ki E sa ta spulsa dimonius. ¹⁶ Otus fika ta testa-l i ta buska na El algun sinal di seu. ¹⁷ Ma Jizus, ki koxeba ses pensamentus, fla-s: Tudu reinu divididu kontra el me ta kaba, i tudu kaza divididu konta el me ta ronba. ¹⁸ Si Satanás sta divididu konta si kabesa, moki si reinu ta aguenta? Pamodi nhos ta fla ma N ta spulsa dimoniu pa Belzebu. ¹⁹ Si N ta spulsa dimoniu pa Belzebu, nton na nomi di kenha ki nhos sigidoris ta spulsa dimoniu? Pamodi kel li, es ta ser nhos juis. ²⁰ Ma, si pa dedu di Deus ki N ta spulsa dimonius, nton Reinu di Deus dja txiga ti nhos. ²¹ Ora ki un omi forti, ki sta totalmenti armadu, guarda si propri kaza, nton ses ben ta sta siguru. ²² Ma, ora ki un omi forti dirota-l, e ta tra-l si armadura i e ta distrui ses ben. ²³ Kenha ki ka sta ku mi, sta kontra mi, i kenha ki ka ta djunta ku mi, ta spadja. ²⁴ Ora ki un spritu mau sai di un pesoa, e ta fika ta vaga pa lugar dizertu ta djobe kau di diskansa. Si e ka taxa, e ta fla: Dexa-m volta pa nha kaza, di undi staba. ²⁵ I ora ki e volta, si e atxa kaza linpu i organizadu, ²⁶ logu e ta ben i e ta traze ku el otus seti spritu mas pior di ki el, i es tudu ta ben mora ali. Nton, ultimu kondison di kel pesoa ta bira mas pior di ki antis. ²⁷ Kuntise ki, dipos ki e kaba di fla tudu kes kuzas li, un mudjer na meiu di multidon labanta vos i fla-l: Benditu é ventri ki jerabu i mamas ki amamenta-bu. ²⁸ Ma Jizus fla: Anti, benditu é kes ki ta obi Palavra di Deus i ta guarda. ²⁹ Timenti multidon ta djuntaba, Jizus kumesa ta fla: Es jerason é un jerason mau. E ta buska un sinal, ma ninhun sinal e ka ta dadu, si ka sinal di Jonas. ³⁰ Pamodi sima Jonas bira un sinal pa Ninivitas, asi taneb Fidju di Omi ta ser un sinal pa es jerason. ³¹ Rainha di Sul ta labanta, na julgamentu, djuntu ku omis di es jerason i ta kondena-s, pamodi e ben di fin di mundu pa obi sabedoria di Salumon. Ali sta algen ki mas grandi ki Salumon. ³² Omis di Ninive ta labanta na julgamentu, pa pesoas di es jerason i es ta kondena-s, pamodi a es é rapende dianti di pregason di Jonas. I ali stá algen ki é mas grandi di ki Jonas. ³³ Ningen, ora ki sende un kanderu, ta pu-l dentu di un lugar sukundidu, o dibaixu di balai; ma e ta pu-l riba kau di pui kanderu, pa ki ora ki algen entra odja lus. ³⁴ Bu odju é lanpra di korpu. Si bu odju é bon, tudu bu korpu ta fika iluminadu. Ma si bu odju é mau, tudu bu korpu ta fika ku txeu treva. ³⁵ Purtantu, toma kuidadu pa ki lus ki ten na bo ka bira treva. ³⁶ Si tudu bu korpu fika ku txeu lus, sen ninhun lugar ku treva, nton tudu bu korpu ta bira sima lanpra, ora ki si lus ta ilumina. ³⁷ Kantu Jizus kaba di papia, un farizeu kunbida-l pa kume ku el na si kaza. Nton Jizus bai ku el i toma lugar na meza. ³⁸ Farizeu fika spantadu pamodi Jizus ka laba mon antis di kume. ³⁹ Ma Sinhor fla-l: Anhos farizeu, nhos sta mas priokupadu ku linpa kopu ku tijela pa fora, ma dentu nhos sta ku txeu ganansia i maldadi. ⁴⁰ Omis ka ten juis! Pur akazu, kel ki faze fora, ka faze tanbe dentu? ⁴¹ Nhos dá pobri kuze ki sta dentu di nhos, i tudu ta fika nhos linpu. ⁴² Ai di nhos farizeus, nhos ta intrega dízimu di ortelan ku aruda, i di tudu verdura, ma nhos ta skese di justisa ku amor di Deus. Nhos meste aji ku justisa i ama Deus, sen skese tanbe di kes otus kuzas. ⁴³ Ai di nhos farizeus, pamodi nhos ta ama sta na prumeru lugar na sinagoga i resebe prumerus mantenhas na prasa. ⁴⁴ Ai di nhos, pamodi anhos é sima koba kamufladu, algen ta anda riba di el, sen xinti. ⁴⁵ Nton, un mestri di lei fla-l: Mestri, ora ki bu papia si, nho ta ofende-nu. ⁴⁶ Jizus fla-l: Ai di nhos tanbe, mestri di lei! Pamodi nhos ta pui na otus, monti kargas difisil ki es ka ta pode suporta, ma anhos me, nen ku nhos dedu nhos ka ta kre nen toka-s. ⁴⁷ Ai di nhos, pamodi nhos ta konpu koba pa prufetas ki nhos gentis grandi mataba. ⁴⁸ Asi, nhos ta konkorda ku kuzas ki nhos gentis grandi faze. i nhos é tistimunha, pamodi, a es di un ladu, es mata prufeta, i anhos nhos konpu ses koba. ⁴⁹ Tanbe, pa kel razon li, sabedoria di Deus ta fla: Ami N nvia nhos prufetas ku apostulus, i uns nhos pirsigi i nhos mata. ⁵⁰ Nton es jerason ta ser responsabilizadu pa tudu sangi di prufetas ki diramadu desdi fundason di mundu, ⁵¹ desdi sangi di Abel ti sangi di Zakarias, ki matadu entri altar ku santuariu. Sin, N ta fla nhos, ki tudu kel li ta kobradu di es jerason. ⁵² Ai di nhos, mestri di lei, pamodi nhos toma txabi di konximentu; nhos me nhos ka ta entra i inda nhos ta inpidi kes ki kre entra di entra. ⁵³ Dipos ki Jizus sai di la, skribas ku farizeus kumesa ta faze-l purgunta maldozu serka di monti kuzas, ⁵⁴ ta arma-l lasu i ta tenta pega-l na algun kontradison.