¹ Agóra, na sidadi di Ikôniu, tanbe kontise ki Palu ku Barnabé entra djuntu na sinagóga di judeus y es pâpia di un manera ki faze txeu algen kridita, tantu judeu kómu kes ki ka éra judeu. ² Má kes judeu, ki nega kridita, es provoka kes ki ka éra judeu, pa pô-s kóntra krentis. ³ Purtantu, Palu ku Barnabé fika la pa txeu ténpu y es pâpia ku koraji sobri Sinhor. Y Sinhor ta konfirmaba palavra di se grasa, através di grandis sinal ku maravilhas ki E ta fazeba através di mon di Palu ku Barnabé. ⁴ Asin, povu di kel sidadi fika divididu. Uns fika na ladu di judeus, má otus djunta ku apóstulus. ⁵ Na kel altura, uns judeu, y uns ki ka éra judeu, es djunta ku ses xéfi, y es konbina pa maltrata apóstulus y da-s ku pédra. ⁶ Óra ki apóstulus obi kel kuza, es skapa pa kes sidadi di Listra ku Derbi na provínsia di Likaônia. Nton, la na Listra ku Derbi, y na tudu lugar pértu di la, ⁷ es kontínua ta spadja Notísia Sábi di Jezus. ⁸ Agóra, tenba un ómi na sidadi di Listra ki ka anda nunka, pamodi el éra manku na ses pé désdi bariga di se mai. Kel ómi staba xintadu ⁹ la ta obi Palu ta pâpia. Palu djobe-l déntu odju, y e odja ma e tenba fé pa ser kuradu. ¹⁰ Nton e fla-l ku vos altu: "Labanta! Bu fika firmi riba bus pé". Kel ómi labanta ku un saltu y e fika ta anda y ta da vólta. ¹¹ Óra ki povu odja kuza ki Palu faze, es grita na ses língua di Likaônia y es fla:" Alguns di nos déus bira sima ómi y es dixi ti nos". ¹² Es txoma Barnabé di Zéus y Palu di Érmis, pamodi el ki ta papiaba más txeu. ¹³ Ténplu di Zéus staba dianti porton di kel sidadi, y saserdóti di kel ténplu traze txeu boi ku koroa di flor pa kel porton, pamodi el, djuntu ku un multidon di kel sidadi, es kreba adora Barnabé y Palu ku sakrifísiu. ¹⁴ Má óra ki apóstulus Palu ku BArnabé obi kuza ki es kreba faze, es ratxa ses ropa y es kóre pa meiu di kel multidon ta grita: " ¹⁵ Ómis, pamodi ki nhos sa ta faze es kuzali? Anos é ómi tanbe, sima nhos. Nu sa ta konta-nhos Notísia Sábi pa nhos dexa es kuzas kabale, pa nhos volta pa Déus ta vive, kel ki faze séu, téra, mar y tudu kuza ki sta na es. ¹⁶ Na ténpu di kes jerason ki dja pasa, Déus dexa tudu nason anda na kaminhu ki es skodje. ¹⁷ Mézmu asin, E ka dexa di faze bons kodjéta na ses ténpu sértu. E farta-nhos ku kumida y nhos kurason ku alegria". ¹⁸ Mézmu ku kes palavra, kuazi ki es ka konsogi stroba kel multidon, pa es ka faze sakrifísiu pa es. ¹⁹ Má dipôs, uns di kes judeu ben di kes sidadi di Ikôniu y Antiokia di Pisídia, y es poi povu di Listra kóntra Palu. Y asin, es da Palu ku pédra y es rasta-l f+óra di sidadi, pamodi es pensa ma e staba mortu. ²⁰ Má dipôs, kantu krentis ben fika na vólta di Palu, e labanta. Nton, e torna entra na sidadi di Listra, y na kel otu dia, e bai ku Barnabé pa sidadi di Derbi. ²¹ Na Derbi, es konta Notísia Sábi di Jezus y es konsigi ganha txeu disiplu la. Dipôs, es volta pa kes sidadi di Listra, Ikôniu y Antiokia di Pisídia. ²² Na kada sidadi, es ba ta da ánimu pa krentis la. Tanbe, es inkuraja-s pa es mante firmi na fé y es fla: "Nu mestu pasa pa txeu afrónta pa entra na Reinu di Déus". ²³ Y na kada igreja, es stabilese ómis grandi pa gia igreja. Ku txeu orason y jijun, es intrega kes ómi na mon di SInhor, pamodi kes ómi ta kunfiaba na Sinhor. ²⁴ Nton, Palu ku Barnabé pasa pa pruvínsia di Pisídia y es entra na pruvínsia di Panfília. ²⁵ Dipôs ki es pâpia palavra di Déus na sidadi di Perji, es dixi pa sidadi di Atália. ²⁶ Di la es toma barku pa Antiokia di Síria, unid ki es kumesa ses viaji, intregadu na grasa di Déus pa kel trabadju ki es kaba di faze. ²⁷ Kandu es txiga na Antiokia di Síria, es djunta igreja y es konta tudu kuza ki Déus faze através di es, y manera ki E abri pórta di fé pa kes ki ka éra judeu. ²⁸ Dipôs, es fika txeu ténpu djuntu ku krentis di la.