¹ Modekai peciziba pali vonse vecitka, eng'amba vovwala vake nakuvwala viguduli na kuzola milota. Eluta pakati pa mzinda na kulira mokuwa na kulira kobabishiwa. ² Eluta kuyofwika ku mlyango wa mfumu, cifukwa paliye enzovomelezyewa kupitilila apo wovwala viguduli. ³ Ku malo, kulikonse kwamene malembo ba mfumu befwika, kwenze kulira kukulu pakati pa a Yuda, na kusala kulya, kulira kukuleni, na kulira modandaula. Banyinji ba benve benzonkhala mu viguduli na milota. ⁴ Anakazi batontho batontho na banchito bake pibewela na kumuuzya, mfumukazi yevutika. Etumizya vovwala kuyovwalika Modekai (kuti avule viguduli vake), koma aliye vivomele. ⁵ Teto Estere eita Htaki, umozi wa mukulu wa mfumu eikiwa kuti akomtumikila. Emtuma kwa Modeka kuti azibe kuti cacitika nicinji ndipo cutanthauza cinji. ⁶ Moteto Hataki eluta kwa Modekai pakati pa mzinda pamlyango wolobela kwa mfumu. ⁷ Modekai emuuzya vonse vecitika kwa eve, na mtengo wa ndalama wa siliva Hamani wecilonjeza kupima na kuika ku ng'anda ya cuma ca mcufu kuti a Yuda onse bakapaiwe. ⁸ Empasa soti cikalata ca malembo cefumila ku Susa ca cionongeko ca a Yuda. Ecita ici kuti Hataki akacilangizye kuli Estere, na kuti akampase nchito yakuya kwa mfumu kuyopempha za kuwamiliwa mtima, na kupapatila kwa eve pa banthu bake. ⁹ Teto Hataki eluta kuyouzya Estere vecilabila Modekai. ¹⁰ Ndipo Estere elabila na Hataki kuti awelere kwa Modekai. ¹¹ Eciti, "banchito onse ba mfumu na banthu onse ba mfumu oziba kuti ngati mwanalume kapena mwanakazi waluta kwa mfumu mkati mwa lubanza cosaitiwa, kuli tyala lamulo limozi: kuti ofunika kupaiwa- kufumyako tyala wala wamene mfumu yamyila ndodo yake yagolide kuti abe na moyo. Mu masiku sate nikaliyoitiwe kuti nilute kwa mfumu." ¹² Teto Hataki etwala mau ba Estere kwa Modekai. ¹³ Modekai etumizya soti mau aba: "Usaganize kuti mu ng'anda ya mfumu, ukapulumuke kupambana na a Yuda onse. ¹⁴ Ngati unkhale cete pa nthawi ino, mpumulo na cipulumuso cifumile kuyakine pali a Yuda, koma weo na ng'anda ya ausuwako muonongeke. Oziba nibani kuti weo weluta kumpando wacimfumu cifukwa ca nthawi monga iyi?" ¹⁵ Ndipo Estere etumizya uthenga uyu kwa Modekai, ¹⁶ "nkhoyani kaikeni pamozi a Yuda onse ali ku Susa, na kunisalira cakulya neo. Musalye kapena kumwa kwa masiku atatu, msuba na usiku. Neo na asimbi bangu tisale cimozi mozi. Ndiye pati nikalute kwa mfumu, olo kuti nicosalolewa, ndipo ngati nikaonongewe, niikaonongewe." ¹⁷ Modekai eluta na kucita zonse zecimuuzya Estere.