¹ Ng'oiitech chi kole ki kiboitinikab Kristo ak ribikab ung'otikab Jehovah. ² Noto anyun makat ribindet ake tugul koek ne kiyoni. ³ Ago eng' ane ko kiy kitikin ng'o kino akwe, anan koruokwo chi, amu mokinege anee. ⁴ Amu mongen ke ane, ako mo ii ne ikesunotgei ako inendet ne ingeno ko Jehovah. ⁵ Ara anyun ameruokchi kiy kotom koit kasarta kot konyo Kiptayat, ne ibu kobwa lapkeiyet tuguk che ung'otin che bo tuindo, ak koboor ng'alekab muguleldo asi konyor chi tugul kolosunetab Jehovah. ⁶ Eng' noto anyun che kitupche, kaayai tuguchu koek kayaniet eng' ane ak Apolo ayobo okwek, si kobiit onetge eng' achek si masiir tuguk che sirotin, si mame negei chi agobo chi age, kotii let chito age. ⁷ Kayain ng'o iteritu eng' ake? ak nee ne itinye inye ne kima iitach, ayo ngo kiitache ko amu nee si ilosuke, ko u ye kima itaacha? ⁸ Nguno anyun onyitotin! nguno ko kiomokornon kiobounisie ko u laitorinik koma, kamacha anyun obou si kebounisie kobotok eng' Jehovah. ⁹ Abwati ale kiteb Jehovah keeku achek che kigoktoi che bo let, ko u biko che kiketetchi meet amu keerech ng'weny -malaikaisiek ak biko. ¹⁰ Ki che berber amu Kristo, ago o ng'omen eng' Kristo, ki nyoluytin ache ako o kimen, o konyitotin ko ma kikonyitotin. ¹¹ Akoi nguno ko omech rubet ak melelda, kimi ach ng'or ak ketortatech ama kitinye ole kimenye. ¹² Ako kibirtoige keboisie eunekcho, ng'echosech keberur, ngeusech kemuitoi. ¹³ Ye kimwoitoenech yoito, kigoigoi, kiyaech ko u che muruonindab ng'weny che kibuktoi ak kelakte agoi ng'uno. ¹⁴ Mosire tuguchu asi olilanse, ago si otigonok kou lekuk che achome ateechini . ¹⁵ Agot ndotinye ribik elfu taman eng' Kristo, ko motinye kwanisiek che chang'. Amu kiosichok eng' Kristo Jeiso kobun lokoiywek che kororon. ¹⁶ Noto anyun asomok oeku kosubikichu. ¹⁷ Noto amu nee asi ayokun Timoteo, ne werinyu ne achome ne kiyoni eng' Kristo, ne nyoni kobwotwok ortinwekchu eng' Kristo, ye onetisioti eng'komosta tugul eng' kanisosiek tugul. ¹⁸ Mendos alak ayun kolin abere manyonjinok. ¹⁹ Lekit anyonchok, ngo cham Jehovah, ako momoche anai twekunetab menotik ago akeere kimnotet ngwai. ²⁰ Amu bounatetab Jehovah ko ma eng' ng'alek ako eng' kimnotet. ²¹ Nee ne omoche anyun? anyonchok ak Kirokto anan eng' chomnyet ak tamirmirietab tolosiet?.