Rasul-rasul nihi Mahkamah Agama Yahudi ¹ Katika Petrus nihi Yohanes bapander napot ulun ajoh,hawi lah napot here Imam,kapala panyaga Bait Allah,nihi ulun-ulun Saduki, ² Nihi sangit tuu gene here ngajar ulun ajoh palus membritakan ta huang Yesus naan kebangkitan tekei helang ulun matei. ³ Balalu,here nyaput Petrus nihi Yohanes balalu nampasuluk e gi huang penjara hampe katuni andrau e gene andrau haot kamalem. ⁴ Tapi,ajoh tekei here sa haot ngarengei paneran here Rasul jari harap,nihi jumlah laki ta helang here jari kira-kira dime ribu kulun. ⁵ tangar katuni andrau e,pemimpin-pemimpin,tueh-tueh,ahli-ahli Taurat here bakumpul hahayak ta Yerusalem, ⁶ hayk nihi Imam hante Hanas,nihi Kayafas,Yohanes,Alexander,nihi kaluhan ulun tekei kaluarga Imam Hnate. ⁷ Katika herengandak Petrus nihi Yohanes ta penah-penah,here nane,"nihi kuasa inon atawa nihi aran hie kah kayo ngulah hal iti?" ⁸ Balalu,Petrus,na tampenu nihi Roh Kudus,ngeau napot here,"here pemimpin bangsa nihi tueh-tueh, ⁹ amun kami na periksa andrau iti ulah gawian maeh sa haot na ulah kami napot ulun sa maleme iti,nihi cara inon ulun iti haot na samare? ¹⁰ elah bo hal iti na karasa ulah kaon kaluhan nihi kaluhan ulun Israel bahwa ulah aran Kristus Yesus,ulun Nazaret,sa kayo salibkan,sa haot na tambuan Allah tekei helang ulun matei,ulun iti mindri tangar hadap nu huang keadaan barigas. ¹¹ Yesus iti aye hio: `watu sa na umpe ulah kayo,tukang-tukang bangunan,sa haot jari watu penjuru.`Mazmur 118:22 ¹² Balalu,bakoi naan keselamatan ta huang hie lei lain e gene bakoi naan aran lain ta kapit langit na ami ta helang murunsia sa ulah aran hio takam kiuh na selamatkan." ¹³ Katika here ngini ka ehei Petrus nihi Yohanes balalu paham bahwa here aye hio ulun-ulun bakoi ta pelajar nihi awam,here jari waoh balalu mulai kataru bahwa kararueh e piji hahayak nihi Yesus. ¹⁴ Balalu,udi ngini ulun sa haot na samare hio mindri ta tuhi Petrus nihi Yohanes,here bakoi kiuh nawan e. ¹⁵ Tapi,katika here nunyu Petrus nihi Yohanes mat nanan Sanhedrin,here mapakat isa nihi sa lain, ¹⁶ nihi ngeau,"inon sa harus na ulah takam nadap karueh ulun iti?gene,erang kua yanda ajaib sa luar biasa haot jari nangkah here nihi kaliho tena mat gi kaluhan ulun sa muneng ta Yerusalem,balalu takam bakoi kiut nawan e. ¹⁷ Tapi,mat hal iti magin tasiar penah ulun-ulun,ayu takam ngancam here mat bakoi lagi bapander napot hie lei huang aran hio." ¹⁸ Udi hio,here nerau Petrus nihi Yohanes,balalu nunyu kararueh e mat bakoi bapander atawa ngajar inon lei huang aran Yesus. ¹⁹ Tapi,Petrus nihi Yohanes nuing nihi ngeau napot here,"na putus bo,sa awe sa wuah huang pangini Allah,mat ngarengei kayo labih tekei Allah? ²⁰ Gene,kami bakoi tau kecuali ngantuh hal-hal sa haot na inni nihi na rengei." ²¹ Balalu,katika here tarus ngancam Petrus nihi Yohanes,here ngaret Rasul-Rasul hio tulak,udi bakoi kahalu cara mat nukum karueh e ulah gene ulun ajoh sa nawat Allah entu inon sa jari. ²² Gene,ulun sa napot aye tanda ka oboh an hio haot na santena,haot ba umur labih tekei epat pulu taun.Petrus nihi Yohanes waleng napot pulaksanai-pulaksanai se Iman ²³ Katika haot na sanapas,Petrus nihi Yohanes tulak napot hengau-hengau e kakareb balalu ngesah kaluhan hal sa na antuh ulah here imam kepala nihi tueh-tueh napot here. ²⁴ Balalu,katika hengau-hengau e hio ngarengei e,here ngenat lengan here napot Allah nihi isa atei balalu ngeau,"oi Tuhan,Kayo lah sa haot ngajari langit,bumi,laut nihi kaluhan isi e, ²⁵ sa bapander nangkah Roh Kudus,nangkah wawa hambaNu,Daud,itak uyut kami:`wuah inon bangsa-bangsa lain marunca,nihi ulun-ulun memperhati kan sa sia-sia? <sup>26</sup> Raja-raja dunia ba siap-siap,nihi here penguasa bakumpul hayak,nawan Tuhan nihi nawan sa na urapi E.`Mazmur 2 : 1-2 ²⁷ Gene,sabujur e ta kota iti haot bakumpul hahayak mat nawan Yesus,hambaNu sa Kudus,sa Kayo urapi,maeh Herodes nihi Pontius Pilatus,hayak nihi bangsa-bangsa lain,nihi ulun-ulun Israel, ²⁸ mat ngulah segala hal sa ulah tanganNu nihi rencana Nu haot na tentukan samete e mat jari. ²⁹ Balalu wayah iti,Tuhan inni bo ancaman-ancaman here nihi karuniakan bo hamba-hamba Nu iti mat mangabarkan Firman Nu nihi kaluhan kaehei, ³⁰ nelang Kayo nyansolor tangan Nu mat nyamare nihi tanda-tanda palus keajaiban-keajaiban sa jari ulah aran walah Nu sa Kudus,Yesus." ³¹ Balalu,udi here berdoa,ta gunsang lah unengan here bakumpul hayak nihi here nihi here kaluhan na tampenu nihi Roh Kudus,palus mangabar Firman Allah nihi ehei.Pamelum ulun sa harap ³² Balalu,kumpulan here sa harap ba isa atei nihi jiwa.Bakoi naan erang kulun lei sa ngeau bahwa brang ampun aye ampun e kakareb,tapi kaluhan hal aye hio ampun here kaluhan. ³³ Balalu,nihi kuasa sa hante here Rasul ngami kesaksian here gene kebangkitan Tuhan Yesus nihi anugrah sa hante naan entu here kaluhan. ³⁴ Bakoi naan erang kulun lei sa kakurangan ta helang here gene kaluhan ulun sa ampun alah atawa lewu,matang e,palus nunda hasil sa na batang e, ³⁵ balalu here ngandak e ta pee here Rasul,balalu na bagi-bagi bo napot asing-asing ulun nutah keperluaan e. ³⁶ Kala hio lei Yusuf ulun Lewi,katurunan Siprus,sa na terau lei ulah here Rasul,Barnabas,sa baarti`anak penghiburan`, ³⁷ matang alah taun e balalu nunda duit e,balalu ngandak ta pee here Rasul.