Paulus ngalako mat nadap Kaisar ¹ Telu andrau udi hio,Pestus hawi ta provinsi hio,udi aye tulak tekei Kaisarea gi Yerusalem. ² Imam-imam kepala nihi here pemimpin Yahudi nyurung tuduhan nawan Paulus,balalu here tarus manggasak Festus, ³ nelang ngalako e ba maeh atei nadap here nihi nuyu ulun nunda Paulus gi Yerusalem,udi here ngarencana pakat mat munu Paulus ta penah lalan. ⁴ Festus nuing bahwa Paulus sagar tatap na tahan ta Kaisarea balalu bahwa aye kakareb sagar hawi gi aro sa hinang e. ⁵ "Balalu,"eau e,"elah bo here pemimpin ta penah kaon minau gi aro hayak kuki,balalu amun naan isa hal sa hala gene ulun hio,elah bo here nyurung tuntutan e nadap here." ⁶ Udi Festus muneng ta penah here bakoi labih tekei walu atawa sapuluh andrau,aye waleng gi Kaisarea.Balalu mat gi katuni andrau e,aye maharung ta karusi pengadilan balalu nuyu mat Paulus na tunda gi hadap aye. ⁷ Katika Paulus hampe,ulun-ulun Yahudi sa minau tekei Yerusalem mindri tangar kaliling e,nihi nyurung ajoh tuduhan sa maweat nawan Paulus,sa bakoi kiuh na buktikan. ⁸ rahat hio,Paulus nyantarang pembelaan e,"kuki bakoi ngulah kahala inon lei sa nawan,maeh hukum Taurat Yahudi,Bait Allah,atawa Kaisar." ⁹ Tapi,gene aye nampasanang ulun-ulun Yahudi,Festus ngeau napot Paulus,"inonkah kayo basadia mambai gi Yerusalem balalu na adili tangar hadapan kuki entu tuduhan-tuduhan iti?" ¹⁰ Tapi,Paulus ngeau,"kuki rahat mindri ta hadapan pengadilan Kaisar,uneng sa harus e kuki na adili.kuki bakoi bahala inon lei nadap ulun-ulun Yahudi sameh sa kayo kakareb karasa. ¹¹ Jari,amun kuki bahala nihi ngulah isa hal sa susuk na hukum matei,kuki bakoi sagar mansuba ngahulu areb ku tekei hukuman matei hio.Tapi,amun tuduhan here nadap kuki bakoi naan sa wuah,bakoi naan erang kulun lei sa kiuh nyarah kuki napot here.Balalu,kuki nyurung banding napot Kaisar." ¹² Udi hio,udi Festus ba mupakat nihi Sanhedrin,aye nuing,"kayo haot mambai banding napot Kaisar,balalu napot Kaisar kayo harus tulak."Festus nane napot Raja Agripa gene Paulus ¹³ Udi papire andrau nangkah,Raja Agripa nihi Bernike hampe ta Kaisarea mat ngami penghormatan gi Festus. ¹⁴ Rahat here muneng ta aro salawah papire andrau,Festus ngajelaskan gene kasus Paulus napot Raja,eau e,"naan erang kulun sa na tanan jari tahan ulah Feliks. ¹⁵ katika kuki muneng ta Yerusalem,imam-imam kepala nihi tueh-tueh Yahudi nampe tuduhan-tuduhan nawan e balalu ngalako mat aye na hukum. ¹⁶ Kuki nuing here bahwa bakoilah isa kebiasaan gi ulun Roma mat manyarah erang kulun sa mete aye panalu nihi here panuduh e,rai nihi rai,balalu aye naami kesempatan mat ngulah pembelaan nadap tuduhan-tuduhan hio. ¹⁷ Balalu,katika here hawi bakumpul tangar iti,kuki bakoi ngaret kasus iti,tapi gi katuni andrau e,kuki maharung ta kursi pengadilan balalu memerihtahkan mat ulun hio na tunda nadap kuki. ¹⁸ Katika here penuduh e hio mindri,here bakoi nampe tuduhan-tuduhan jahat sameh sa na kono ku. ¹⁹ tapi,here ekat naan papire ka bakoi susuk an nihi ulun hio gene agama here kakareb nihi gene erang kulun sa bangaran Yesus,sa haot matei,sa na tegaskan ulah Paulus bahwa aye welum. ²⁰ gene kuki bingung kalawe memeriksa kaluhan iti,kuki nane inonkah aye hakun tulak gi Yerusalem balalu na adili ta aro gene kasus iti. ²¹ Tapi,katika Paulus mambai banding mat na tahan balalu ngandrei kaputusan Kaisar,kuki nuyu mat aye tatap na tahan hampe kuki kiuh ngirim e napot Kaisar." ²² Balalu,Agripa ngeau napot Festus,"kuki lei kakan karengei kakareb ulun hio."katuni",Festus ngeau,"kayo sagar ngarengei e." ²³ Balalu,ta andrau narian e,Agripa nihi Bernike hawi nihi kaluhan kemegahan e balalu suluk gi ruang pengadilan hayak here pasukan militer nihi pemimpin-pemimpin kota hio.udi hio,susuk nihi perintah Festus,Paulus na tunda suluk. ²⁴ Festus ngeau,"Raja Agripa nihi kaluhan sa hawi hayak kami tangar ina.inni bo ulun iti,sa na lako ulah kaluhan ulun Yahudi napot kuki,maeh sa naan ta Yerusalem atawa sa naan ta iti,nihi kamiak kamakai bahwa ulun iti bakoi iyuh welum magin lawah lagi. ²⁵ Tapi,kuki kahalu bahwa aye bakoi naan ngulah inon lei sa pas nihi hukuman matei.Balalu,katika aye mambai banding napot Sa Mulia,kuki mamutuskan mat ngirim aye napot Kaisar. ²⁶ Tapi,kuki bakoi naan isa hal sa pasti mat na tulis napot tuan ku.Gene hio,kuki haot nunda uln iti gi hadapan kayo kaluhan,nihi khusus e tangar hadapan kayo,Raja Agripa.nihi sameh hio,udi pemeriksaan iti na gawi,kuki naan isa hal mat natulis. ²⁷ Gene,sameh e bakoi suluk akal napot kuki mat mengirim erang kulun tahanan bakoi nyurung tuduhan-tuduhan sa tena nadap aye."