Yakobus na wunu balalu Petrus na japut Herodes ¹ Ta wayah hio,Raja Herodes ngenat tangan e entu papire ulun tekei jemaat mat nampahanang here. ² Aye munu Yakobus,pulaksanai Yohanes,nini pedang. ³ Katika Yohanes nginni bahwa gawian e hio nampasanang atei ulun-ulun Yahudi,aye ngalanjutkan nihi nyaput Petrus lei. hal hio jari salawah Andrau Raya Roti bakoi baragi. ⁴ Udi aye nyaput Petrus,aye nampasuluk e gi huang penjara palus nyarah e napot epat pasukan prajurit mat mangawasi e,nelang ba aheng,udi paskah,nunda e gi hadap ulun ajoh. ⁵ Balalu,Petrus na tahan huang penjara,tapi doa napot Petrus tarus menerus na lako napot Allah ulah Jemaat.Malaikat Tuhan nyanapas Petrus tekei Penjara ⁶ ta isa malem,katika Herodes sagar nunda Petrus balua,Petrus rahat mandre ta helang rueh kulun prajurit,na huruk nihi rueh rantai,balalu here penjaga ta hadap pintu rahat mengawas penjara. ⁷ Balalu inni,erang kulun malaikat Tuhan mindri ta riet Petrus nihi cahaya basinar ta sel penjara hio,balalu malaikat hio nepuk rusuk Petrus palus ngele e,nihi ngeau,"hinang mele!"balalu,rantai-rantai hio lawu talapas tekei kararueh tangan e. ⁸ Balalu,malaikat hio ngeau napot aye,"huruk bo pinggang nu balalu pakai bo sandal nu."Balalu,aye ngulah sameh hio.udi hio,aye ngeau napot aye,"pakai bo jubah nu balalu tutah bo kuki!" ⁹ Balalu,Petrus balua palus nutah malaikat hio,aye bakoi karasa bahwa inon sa rahat jari nangkah malaikat hio nyata,tapi nanguh bahwa aye rahat nginni isa pangini. ¹⁰ katika here haot nangkah penjaga ka isa nihi karueh,here hampe ta pintu gerbang besi sa nuju gi kota.Pintu gerbang hio ta uka nihi kakareb e gi here,balalu here balua nihi takia hampe ta isa lorong,balalu salenga malaikat hio nanan Petrus. ¹¹ Katika Petrus sadar nihi inon sa jari entu areb e,aye ngeau,"wayah iti,kuki bujur-bujur karasa bahwa Tuhan mangutus malaikat E balalu nyalamat kan kuki tekei tangan Herodes nihi tekei kaluhan hal sa naharapkan ulah ulun-ulun Yahudi." ¹² Udi Petrus menyadari e,aye tulak gi lewu Maria,ine Yohanes sa na antuh lei Markus,ta awe ajoh ulun rahat bakumpul bahayak palus lako doa. ¹³ Katika Petrus ngatuk pintu gerbang,erang kulun walah wawei bangaran Rode hawi mat nguka e. ¹⁴ udi aye ngataru lengan Petrus,gene sanang tuu aye bakoi kiuh nguka pintu,tapi nempat gi huang balalu mawara bahwa Petrus rahat mindri ta muka pintu gerbang. ¹⁵ Here ngeau napot Rode,"kayo rapui!" tapi,Rode ngeau tarus sameh hio,balalu here tatap ngeau,"hio lah malaikat e." ¹⁶ Tapi,Petrus tarus tarus ngatok,balalu katika here nguka pintu,balalu nginni Petrus,here embah. ¹⁷ Tapi,udi Petrus mawara isyarat nihi tangan e mat here benyem,aye ngajelas napot here kalawe Tuhan haot nunda aye balua nekei penjara.Balalu,aye ngeau," tahampe bo hal iti napot Yakobus balalu napot pulaksanai-pulaksanai isa iman."Balalu,aye tulak palus gi uneng lain. ¹⁸ katika andrau haot hawi,jari lah kekacauan sa bakoi halus ta penah here prajurit gene inon sa haot jari napot Petrus."pampatei Herodes ¹⁹ Katika Herodes nupui Petrus balalu bakoi kahalu aye,aye memeriksa here penjaga balalu ngami huyuan mat munu here.balalu,Herodes minau gi Yudea gi Kaisarea palus minau ta aro. ²⁰ Wayah hio,Herodes sangit tuu nadap ulun-ulun Tirus nihi Sidon,balalu nihi sepakat,here hawi nadap Herodes,balalu udi ngararumuk Blastus,pengurus rumah tangga Raja,here ngalako mat perdamaian gene wilayah here kiuh pasokan panguta tekei wilayah Herodes. ²¹ tangar andrau sa haot na tentukan here,Herodes makai pakaian kerajaan,maharung tangar tahkta pengadilan,balalu nampe pidato napot here. ²² Rakyat tarus kamiak,"iti aye hio lengan allah,bakoi murunsia!" ²³ sakatika hio lei,erang kulun malaikat Tuhan nampar e gene aye bakoi ngami kemuliaan napot Allah nihi aye na kuta cacing-cacing,balalu matei. ²⁴ Tapi,Firman Tuhan magin welum nihi balipat ganda. ²⁵ Balalu,Barnabas nihi Saulus waleng tekei Yerusalem udi here nyanyari pelayanan here,nelang nunda hayak Yohanes,sa lei na antuh Markus.