¹ Kala hio lei kayo, ui harau-harau, patuhlah nihi wane kayo. Sabab, apabila te helang ire naan sa bakoi taat nihi Firman, ire haba na menangkan ulah tingkah laku harau-e tanpa kata-kata, ² Ulah ire ngindi kalawe murni nihi ta hormat-e tingkah laku kayo. ³ Adalah kabungas kayo ba asal teke hiasan luar, misal'e teke nuruk ulu, makai perhiasan amas, atau makai pakaian sa larang-larang. ⁴ Sabalik-e kakanlah kabungas kayo ba asal teke huang batin kayo, ayehio kabungasan sa bakoi tau malau, sa ba asal teke roh sa lemah lembut nihi tanang. hiolah sa baharga te mate Allah. ⁵ Ulah, sameh hio lei wawei-wawei kudus waktu zaman sadi, sa ngondok pengharapan ire gi Allah, mampabungas tenga ire; ayehio nihi suntup gi wane ire. ⁶ Kalahio lei Sara taat nihi wane'e, Abraham, nihi nerau'e 'tuan'. Kayo ayelah anak-anak Sara amun kayo ngulah maeh nihi bakoi na kuasai ulah nanam takut waktu ngagawi'e. ⁷ Sameh hio lei kayo, ui wane-wane, welum leh nihi harau kayo nihi penu pengertian sabab ire kaum sa labih maleme. Hormati leh ire sebagai sasameh ahli waris huang nerime anugerah welum supaya doa-doa kayo bakoi tahalang. (Menderita Gene Gawian Sa maeh) ⁸ Pangalis'e, kakanlah kayo uras naan kesatuan pikiran, panga ahi, kasih puloknai, atei sa maleme, nihi randah atei. ⁹ Adalei ngabalas sa raat nihi saraat, atau sumpah nihi sumpah. Sebalik e, hendak lei kayo memberkati gene pakai hiolah kayo na herau, ayehio supaya kayo mewarisi berkat. ¹⁰ Sabab Kitab Barasih ngantuh, "Hiye mencintai welum, nihi kakan ngindi andrau-andrau sa maeh, aye harus ngajaga lela e teke sa raat, nihi wiwi e teke ngantuh tipu muslihat. ¹¹ Aye gin harus nampalawit tenga teke sa raat nihi ngagawi sa maeh. Kakan lei aye nupui perdamaian, nihi bausaha nutah e. ¹² Ulah, mate Tuhan mamparhati ulun-ulun bujur, nihi silu-Aye ngarengei doa-doa ire. Tapi, rai-Aye nantang ulun-ulun sa ngulah karaat." Mazmur 34: 13-17 ¹³ Hiye sa sagar ngacalakai kayo amun kayo rajin ngagawi hal sa maeh? ¹⁴ Tapi, seandai'e kayo harus menderita demi kebenaran, maka kayo sagar na berkati. "Ada takut nihi ada gentar tahadap ire sa ngulah kayo menderita." ¹⁵ Tapi, Kuduslah Kristus sebagai Tuhan ta huang atei kayo! Siap sadialeh de ngami jawaban gi hiye boh sa nuntut kayo hal pengharapan sa ampun kayo, ¹⁶ tapi gawilah hio nihi lemah lembut nihi hormat, serta ampunlah atei nurani sa jernih supaya waktukayo na fitnah, ulun sa nyumpah welum kayo sa maeh te huang Kristus sagar jari mangan. ¹⁷ Sabab, lebih maeh menderita gene ngagawi maeh, jika hio memang kangakan Allah, teke menderita gene ngagawi raat. ¹⁸ Ulah Kristus gin haot menderita gene dosa-dosa, hindra gi kaluhan ulun, sa bujur matei gi sa bakoi bujur, sehingga Aye tau nunda taka ge Allah. Naunu secara jasmani, tapi nasamelum ta huang Roh. ¹⁹ Huang Roh, Aye lei tulak nihi ngagawi mara gi roh-roh te penjara, ²⁰ ayehio ire sa sadi bakoi taat waktu Allah nihi sabar ngandre ire pas zaman Nuh, rahat Nuh ngabangun bahtera'e. nangkah bahtera hio, ekat dohot, ayehio walu ulun boh, sa na salamatkan ulah ranu bah. ²¹ Ranu bah hio malambangkan baptisan sa wayah ina menyelamatkan kayo. Baptisan bakoi de namparasih karaat teke tenga, tapi merupakan pangalako gi Allah pakai atei nurani sa murni nangkah kebangkitan Yesus Kristus, ²² ayehio Aye sa wayah iti haot mambai gi surga nihi muneng tangar tuhi kawan Allah; udi kaluhan malaikat,ire pemerintah, nihi ire penguasa na suntupkan gi-Aye.