¹ Lalu, waumikan ampe akiu erai buluh, wujudne sara tungkat ngukur, ali kata-kata, " tulak ali ukurdeh Bait Allah ali altarne serta reo se sembayakng ba suakngne. ² Leka, biarkanlah pelataran Bait Allah se pekual, ai ngukurne koe sio ukah waumi ampe bangsa-bangsa; ali reo anta ngotek-ngotek Kota suci sio seola 42 ulatn. ³ Ali, Aku anta ngumi kuasa ampe rueh saksiko ali reo anta bernubuat seola 1260 ondro ali makai kain kabung." ⁴ Reo ina iselah 2 pohon zaitun ali 2 po,o dian se sekondrokng ba muka Tuhan se naan bumi. ⁵ Ali, ena naan ulutn se kakan nyakiti reo, apui pekual ante wawo reo ali ngehangusne musuh-musuh reo. Ena ise ka kakan nyakiti reo, ise anta wapate ali cara sara sio ⁶ Keruehne ina naan kuasa agin nolop langit agar uran doho mange pada ondro-ondro nubuat reo; ali naan kuasa ombo ranu agin ngubahne njari raya ali agin mopok bumi ali setiap malapetaka, sejule reo kakatn. ⁷ Ali, desukng reo ukah selesai kesaksian reo, binatang se timbul anjak suakng jurang maut anta berperang ngelawan reo ali ngalahkan reo, serta membunu reo. ⁸ Ali, mayat keruehne anta tergeletak ba lalatn kota olai, se secara simbolis waontuh Sodom ali Mesir, wadah Tuhan taapm lou wasalibkan. ⁹ Ali, ante awisne bangsa ali suku ali basa ali kaum anta minda mayat keruehne seola 3,5 ondro ali doho kakan ngizinkan mayat keruehne waumbis ba pengelowokng ¹⁰ Ali, se duloi ba bumi anta bersukacita ombo reo ali sanang; ali reo saling ngirimkan hadiah erai sama laitn koe kerueh nabi ina nyiksa reo se duloi ba bumi. ¹¹ Leka, ukah 3,5 ondro, roh pengowolupm anjak Allah sinop pe suakng kerueh mayat sio, ali reo sekondrokng ba ombo po,o reo mokone se ngetau reo njari ketakutan. ¹² Lalu, reo krongoi nain se nyaring beta anjak surga ngontuh ampe reo, " Pombodeh pitu!" ali, reo pun pombo pe surga suakng awan, wasaksikan koe musuh-musuh reo. ¹³ Ali, wayah lau sio, tejarilah gempa bumi se dasyat sehingga sepersepulu kota sio lorak; ali turu ribu ulutn mate koe gempa bumi sio, ali se doho mate njari takut beta, lalu memuliakan Allah se ba surga. ¹⁴ Bencana se kerueh ukah lalu; otaudeh bencana se ketolu anta kakan awi. Trompet se Keturu Menain ¹⁵ Lalu, malaikat se keturu nyiwui trompet ne, ali ngrongoilah nain sekaras ba surga se ngontuh, " Pemerintahan denia ukah njari pemerintahan Tuhan taapm ali Ise se Waurapi-Ne, ali Ise anta nyuyu ampe seola-olane." ¹⁶ Kemudian, rueh pulu opat tuo-tuo se tungoh ba takhta reo, ba muka Allah, besujud ali menyembah allah, ¹⁷ ali ngontuh, "Kaitn besukur ampe-Kopm, ya Tuhan, Allah se Mahakuasa, Se Naan ali Se Ukah Naan, koe Ikopm ukah ngepo kuasa-Kopm se olai ali mulai nyuyu. ¹⁸ Ali, bangsa-bangsa ukah mara, leka mara-Kopm ukah awi, ali waktune ukah awi bagi ulutn-ulutn mate agin wahakimi ali ngumi upah hamba-hamba-Kopm, nabi-nabi ali ulutn-ulutn kudus ali se takut ante ngaratn-Kopm, se didik ali se olai, ali agin menghansurkan para penghansur bumi!" ¹⁹ Kemudian, tebukalah Bait Allah ba surga ali teotaulah Tabut Perjanjian Allah suakng Bait-Ne, ali timbullah kilat ali nain gerugum ali gempa bumi ali uran es se labat.