¹ Lalu, aku minda erai malaikat kuat laitnne mange anjak surga, bepakayatn awan ali juwata naan ba ombo utokne, ali waene sara matoondro, ali po,one sara ori apui. ² Malaikat sio ngurut erai kitab didik se tebuka. Ali, Ise ngotek po,o kananne ba laut ali po,o keine ba darat, ³ lalu ngesiak ali nain sekoroi, sara singa se ngaum; ali ukah ise ngesiak, turu nain garugum ngrongoikan nain reo. ⁴ Desukng keturu gerugum sio ukah wanain, aku kakan nuliskanne, leka aku kerongoi nain anjak surga ngontuh, " Segellah none se ukah waontuh koe keturu gerugum sio ! Ai nuliskanne!" ⁵ Kemudian, malaikat se kuotau sekondrokng ba laut ali ba darat sio nebot kayakng kananne pe langit, ⁶ ali besumpah gin Ise se wolupm seola-olane, se nyiptakan langit ali awis isine, ali bumi ali awis isine, ali laut ali awia isine, bahwa beloh naan penundaan gane, ⁷ leka pada masa nain malaikat keturu, desukng ise kakan nyiwui trompetne, moko tergenapilah rahasia Allah, sara se Ise waontuh ampe para hamba-Ne: para nabi." ⁸ Kemudian, nain se nde aku krongoi anjak surga ngontuh gane ampeaku, ontuhne, " Tulak ali epodeh gulungan kitab tebuka ante kayakng malaikat se sekondrokng ba ombo laut ali darat sio." ⁹ Moko, aku tulak ampe malaikat sio ali nindune ngumi gulungan kitab didik sio ampe aku. Ali, malaikat sio ngontuh ampeaku, " Epodeh kitab ina ali kumandeh, sio anta ngulah untukngko pait, leka wa wowako, sio anta kima mamis sara riu wani." ¹⁰ Lalu, aku ngepo kitab idik ba kayakng malaikat sio ali kumanne, ali ba wowaku sio kima mamis sara riu wani; ali desukng aku ukah ngumanne, untukngku njari pait. ¹¹ Lalu, ise ngontuh ampe aku, " Iko harus benubuat gane ba muka deo bangsa ali kaum ali basa ali raja-raja."