¹ Kemudian, aku minda ba kayakng kanan Ise se tungoh ba ombo takhta sio erai gulungan kitab, se naan tulisan ba lapeh suakng ali kualne, se wasegel ali turu segel. ² Ali, aku minda erai malaikat se gagah berseru ali nain se koroi," Isedeh ye layak mbuka gulungan kitab sio ali mbuka segel-segelne?" ³ Leka, beloh seulutn pun, maeh se ba surga, ba bumi, maupun se ba iwe bumi se kate mbuka atau minda bagiatn suakng gulungan sio. ⁴ Moko, aku nyonyar koe beloh seulutn pun wakate layak gin mbuka gulungan kitab sio atau minda bagiatn suakngne. ⁵ Leka erai anjak tuo-tuo sio ngontuh aliaku, " Ai nyonyar! minda, Singa anjak suku Yehuda, keturunan Daud, ukah kuret mokone ise kate mbuka gulungan kitab sio li turu segelne." ⁶ Ali, aku minda ba nungo-nungo takhta ali 4 makhluk nde, ali ba nungo-nungo para tuo-tuo sio erai kukui Anak Domba skondrokng, sara ukah wasembalih, se naan turu tanduk li turu mato, turu roh Allah se wautus pe gawisne bumi. ⁷ Anak Domba sio awi ali ngepo gulungan kitab sio anjak kayakng kanan Ise se tungoh ba ombo takhta. ⁸ Ali, desukng Anak Domba ukah ngepo gulungan kitab sio, keopat makhluk li kerueh pulu opat tuo-tuo sujud ba muka Anak Domba sio, masikng-masikng ngurut erai kecapi ali erai cawan amas se ponu ali kemenyan, se iselah doa ulutn deo kudus. ⁹ Lalu, reo banyanyi erai nyanyian wau, ontuhne: "Ikopm layak ngepo gulungan kitab sio ali mbuka segel-segelne koe Ikopm ukah wasembalih, ali raya-Kopm, Ikopm ukah menebus ulutn deo anjak setiap suku, basa, kaum ali bangsa gin Allah. ¹⁰ Ali Ikopm ukah menjarikan reo jari erai kerajaan ali imam-imam gin Allah taapm, ali reo anta mensuyu ombo bumi." ¹¹ Kemudian, aku minda, ali aku kerongoi nain anjak deo malaikat se seliung takhta, 4 makhluk, ali reo tuo-tuo sio. Ali kedeo reo beribu-ribu, bahkan puluan ribu, ¹² ngontuh ali nain se nyaring, "Layakdeh Anak Domba, se ukah wasembalih sio, nerima kuasa, li kesugihan, hikmat, li kekuatan, ali hormat, ali kemuliaan, ali pujian." ¹³ Kemudian, aku kerongoi setiap makhluk se naan ba surga, ali ba bumi, ali ba iwe bumi, ali ba laut, ali gawisne se naan ba suakng, gawisne sio ngontuh, '' Gin Ise, se tungoh ba ombo takhta, ali gin Anak Domba, gawisne pujian, hormat, kemuliaan, ali kuasa ampe seola-olane! " ¹⁴ Ali, 4 makhluk sio ngontuh, "Amin!" ali reo tuo-tuo sejud ali menyembah.