¹ Kemudian, aku ngotau desukng Anak Domba mbuka erai anjak turu segel sio, ali aku kerongoi erai anjak opat makhluk sio ngontuh ali nain se sara garugum, ''Ayu!" ² Moko, aku minda erai kukui kuda ura ali ise se tungoh ba ombone ngurut erai panah; ali erai mahkota waumi aginne, ali ise maju gin ngalahne ali mengkuretne. ³ ali, desukng Anak Domba sio mbuka segel sse kerueh, aku kerongoi makhluk se kerueh ngontuh, "Ayu"! ⁴ moko, majudeh erai kukui kuda lain babotik mea sara tarakng apuy, ali ise se tungoh ba ombone waumi kuasa gin ngepo kedamaian anjak bumi ampe mersia anta saling tempate, ali erai pedang se olai waumi ginne. ⁵ Ali, desukng Anak Domba sio mbuka segel se ketolu, aku kerongoi makhluk se ketolu ngontuh, " Ayu!" Moko, aku minda erai kukui kuda wuyukng ali ise se tungoh ba ombone ngurut erai timbangan wa kayakngne. ⁶ Lalu, aku kerongoi sara naan nain anjak nunga-nunga keopat makhluk sio ngontuh, " Erai supak gandum gin 1 dinar, leka ai ngerusakkan ilau ali anggurne!" ⁷ Ali, desukng Anak Domba sio mbuka segel se keopat, aku kerongoi nain makhluk se keopat ngontuh, "ayu! " ⁸ Moko, aku minda erai kukui kuda babotik hujau burai ali ise se tungoh ba ombone ngaratne Maut ali Hades ngumpatine. Ali, kuasa waumi gin reo ombo 1/4 bumi, gin tempate ali pedang, melau, rototn, ali binatang-binatang buas ba bumi. ⁹ Desukng Anak Domba mbuka segel se ke dimo, aku minda ba iwe altar jiwa-jiwa reo se ukah tempate koe firman Allah ali koe kesaksian se ukah reo pertahankan. ¹⁰ Reo beseru ali nain se moyo, " Senu ola gane ya, Tuhan se kudus ali bujur, Ikopm anta menahan ompu anjak menghakimi ali ngebalas raya kaitn gin reo se duloy ba bumi? ¹¹ Ali, gin masing-masing jiwa sio waumi erai jubah ura ali reo waberitaukan bahwa reo harus beristirahat didile mao, hingga jumlah kawatn-kawatn pelayan ali erai untukng - erai untukng reo se kakan wabunu sara reo jari ganap. ¹² Ali, aku minda desukng Anak domba sio mbuka segel se keonom, terjarilah gempa bumi se dasyat; matoondro jari uyukng sara kain karukng se tebuat ante walo ali awis ulatn njari sara raya. ¹³ Ali, bintang-bintang wa langit sendatu pe bumi sara pohon ara selatu uwa-uwane se monta desukng waguncang koe riwut se daras beta. ¹⁴ Ali, terbagi langit bagaikan kitab se wagulung, ali setiap gunung ali pulau wa isat ante wadahne. ¹⁵ Moko, raja-raja ba bumi, ali para pengolai, ali perwira-perwira, ali ulutn sugih ali berkuasa, ali awis budak, ali ulutn bebas sensuyokng ba gua-gua ali ba rokakng watu-watu ba pegunungan. ¹⁶ Reo ngontuh ampe gunung-gunung ali watu-watu karang sio, " Runtuhlah kono kaitn ali wasuyok kaitn ba hadapan Ise se tungoh ba ombo takhta, ali ante murka Anak Domba! ¹⁷ Sebab, ondro olai bagi murka reo ukah awi ali nyonekah se kahalu bertahan ?"