¹ Seukah sio, aku minda erai jawokng tebuka ba surga, ali nain nde, se aku kerongoi sara nain trompet ngontuh aliaku, ontuhne, " Pombodeh pe sina ali Aku anta ngotaukan ampe iko none se harus tenjari seukah situ". ² Pentukng sio lou, aku wakuasai Roh ali otaudeh, erai takhta naan ba surga ali Seulutn tungoh ba ombo takthta sio. ³ Ali, Ise se tungoh ba ombo takhta sio, otau sara watu permata yaspis ali sardis; ali naan erai juawata ba sekeliling takhta sio, se teotau sara zamrud. ⁴ Ba seliung takhta sio naan rueh pulu opat takhta ali ba ombo takhta-takhta sio aku minda rueh pulu opat tuo-tuo tungoh, makai jubah ura ali mahkota-mahkota amas naan ba utok reo. ⁵ Ali, anjak takhta sio pekual kilatan petir ali gemuruh nain nayu. Ali, naan turu dian se jelap ba muka takhta sio, se iselah turu Roh Allah. ⁶ Ali, ba muka takhta sio lou naan sesuatu sara lautan kaca, sesara kristal. Ba nonga ali ba seliukng takhta sio naan opat makhluk se ponu ali mato ba muka ali blakakngne ⁷ Makhluk se puga sara erai kukui singa, ali makhluk se kerueh sara erai kukui sapi upo, li makhluk se ketolu waene sara wae mersia, ali makhluk se keopat sara erai kukui pempulu elang se sembilikng. ⁸ Keopat makhluk sio masing-masing naan onom klekep se ponu ali mato, maeh sisi kual maupun suakngne; kondro ali malopm, keopat makhluk sio doho suah beranai bepander, '' Kudus, kudus, kudusdeh Tuhan, Allah se Mahakuasa se ukah naan, se naan, ali se anta awi." ⁹ Ali, stiap kali makhluk-makhluk sio ngumi kemuliaan, hormat, ali ucapan sukur gin Ise se tungoh ba ombo takhta, se wolupm seola-olane, ¹⁰ kerueh pulu opat tuo-tuo sio sujud ba muka Ise se tungoh ba ombo takhta sio, ali menyembah ise se wolupm ampe seola-olane sio, ali nimbai mahkota reo ba muka takhta sio sambil bepander, ¹¹ " Ya Tuhan ali Allah kaitn, Ikopm layak nerima kemuliaan, hormat ali kuasa koe Ikopm ukah menciptakan segala sesuatu ali koe kahandak-Kopm gawisne sio naan waciptane."