¹ " Ali, ampe malaikat jemaat ba Sardis tuliskandeh: Situlah pengontuh Ise se naan turu Roh Allah ali turu bintang sio: Aku tau gawiatn-gawiatnko. Ulutn ngotuh bahwa ikopm wolupm, leka sebujurne ikopm mate. ² Waspadadeh, ali perkuatdeh hal-hal se kia naan, se parak mate, koe Aku balupm kahalu gawiatnko sempura suakng pengotau Allah. ³ Koe sio, sowotdeh none se ukah iko terima ali rongoi, taatideh sio ali batobatdeh! Ena iko doho waspada, Aku anta awi sara seulutn malikng ali iko doho anta tau jam senu Aku anta awi ampe iko. ⁴ Leka, iko naan sesenu ulutn ba Sardis se balupm mencemarkan baju reo; ali reo anta malatn ali-Aku ali makai baju ura koe reo layak. ⁵ Ulutn se kuret anta wapakaine baju ura ali Aku doho anta ngehapus ngaratnne anjak Kitab pengwolupm. Aku anta ngaku ngaratnne ba muka Uma-Ku ali ba muka malaikat-malaikat-Ne. ⁶ Ise se naan telingo ginounmah ngerongoi none se waontuh Roh ampe jemaat-jemaat." Surat ampe jemaat ba Filadelfia ⁷ " Ali, ampe malaikat jemaat di Filadelfia tuliskandeh: Situlah pengontuh anjak se Kudus ali se bujur, se ngurut kunci Daud, se mbuka ali doho seulutn pun kate nolopne; se nolop ali doho seulutn pun kate mbukane: ⁸ Aku tau gawiatn-gawiatnko. Mindadeh, Aku ukah mbukakan jawokng gin iko, se doho seulutn pun kate nolopne koe kekuatanko didik, leka iko ukah menaati firman-Ku ali doho nyangkal ngaratn-Ku. ⁹ Mindadeh, Aku anta ngulah para sinagoge Ontu sio, se ngaku sebagai ulutn Yahudi, leka setu'une doho, melaitnkan buak, Aku anta ngulah reo awi ali sujud ba po,oko, ali ngulah reo tau bahwa Aku mentuasiko. ¹⁰ Koe iko ukah nggaduh firman ketekunan-Ku, Aku anta menggaduhko ante masa kesusahan se anta awi pe gawisne denia, gin nguji reo se duloi ba bumi. ¹¹ Aku srek awi. singkurutdeh none se ikopm puutn agar doho seulutn pun anta ngepo mahkotako. ¹² Ise se kuret, aku anta menjarikanne orie penyangga Bait Suci Allah-Ku, ali ise doho anta tulak anjak situ; ali Aku anta nuliskan ginne ngaratn Allah-Ku ali ngaratn kota Allah-Ku, isesio Yerusalem wau, se sio mange anjak surga, ante Allah-Ku, ali ngaratn-Ku se wau. ¹³ Ise se naan telingo biardeh ngerongoi none se waontuh Roh gin jemaat-jemaat." Surat ampe Jemaat ba Laodikia ¹⁴ "Ali, ampe malaikat jemaat ba Lodikia tuliskandeh: Situlah pengontuh Sang amen, saksi se setia ali bujur, awali anjak segala ulahan Allah: ¹⁵ Aku tau gawiatn-gawiatnko, bahwa ikopm doho rongin ataupun layokng. Alangkah maehne ena iko rongin atau layokng. ¹⁶ Ena, koe iko layokng, doho layokng ataupun rongin, Aku anta mennduakanko anjak wowa-Ku. ¹⁷ Koe iko ngontuh, Aku sugih, berkelimpahatn, ali doho kekurangatn none-one,' ali doho tau bahwa sebujurne iko sengsara, maras, benasa, posa ali belegeu. ¹⁸ Aku menasihatiko gin moli anjak-Ku amas, se wamurnikan ali apuy agar iko jari sugih, ali baju-baju ura agar iko kate murukne ampe nginam mai koe kebelegeuanko doho anta teotau, ali mengoles salep gin matoko agar ikopm kate minda. ¹⁹ Reo se Kutuasi, Ku'iai ali Kubabur; koe sio, relakandeh ateiko ali betobatdeh! ²⁰ Mindadeh! Aku sekondrokng ba muka jawokng ali ngatuk. Ena naan ulutn se ngerongoi nain-Ku ali mbukakan jawokng, Aku anta sinop ampe ise ali kuman sesama ise ali ise sesama-Ku ²¹ Ise se kuret, Aku anta ngizinkanne tungoh sesama-Ku ba takhta-Ku, ali sara Aku ukah kuret ali tungoh sindrah Uma-Ku ba taktha-Ne. ²² Ise se naan telingo biardeh ngerongoi none se waontuh Roh ampe jemaat-jemaat."