¹ Kemudian, aku minda malaikat mange anjak surga, ngoit kunci jurang maut ali erai rantai se olai ba kayakngne. ² Ise nangkap tondoi sio, si Nipo tuo, se iselah setan ali ontu, ali nyiretne seola seribu taotn, ³ nimbaikanne pe suakng juranvg ,maut, nutupne , ali nyegelne agar ise doho anta nyesatkan bangsa-bangsa gane, ampe seribu taotn sio penggawis. seukah sio, ise anta walepaskan agin dile. ⁴ Lalu, aku minda takhkta-takhta ali ba ombone tungoh ulutn-ulutn se waumi kuasa agin ngehakimi. Aku minda jiwa ulutn-ulutn se notok utokne koe kesaksian Yesus ali koe firman Allah, ali reo se doho nyembah binatang sio atau patungne ali doho nerima tanda binatang sio pe rai atau kayakng reo. Reo wolupm gane ali menyuyu ali Kristus seola seribu taotn. ⁵ Leka, ulutn-ulutn mate se lainne doho wolupm gane sebalupm masa seribu taotn sio gawis. Situlah kebangkitan se awal. ⁶ Waberkatilah ali kuduslah ulutn-ulutn se memperoleh bagian suakng kebangkitan se awal sio. Terhadap ulutn-ulutn situ, pemate kerueh doho berkuasa, leka reo anta njari imam-imam Allah ali Kristus, ali anta menyuyu ali Ise seola seribu taotn. Kekalahan ontu ⁷ Seukah masa seribu taotn gawis, Ontu anta walapaskan anjak penjarane. ⁸ Ise anta tulak agin nyesatkan bangsa-bangsa pe keopat ppenjuru bumi, Gog ali Magog, ali ngumpulkan reo agin berperang. Kedeo reo sara krosik ba laut. ⁹ Reo pombo pe dataran bumi ali ngapung perkemahan ulutn-ulutn kudus ali kota se tuasi. Leka, apui mange anjak langit ali ngehanguskan reo. ¹⁰ Lalu, ontu se ukah nyesatkan reo watimbai pe suakng lautan apui ali belerang, ba situlah binatang ali nabi buak sio lou watimbaikan. Reo anta wasiksa kondro ali malopm seola-olane. Penghakiman ba muka Takhta Ura ¹¹ Seukah sio, aku minda takhta ura se olai ali Ise se tungoh ba ombone, se ante muka-Ne bumi ali langit gawis ali doho watemukan gane wadah agin reo. ¹² Ali, aku minda ulutn-ulutn mate, olai ali didik, sekondrokng ba muka takhta sio. Lalu, wabukalah kitab-kitab ali erai kitab se laitn, yaitu kitab pemwolupm, ali ulutn-ulutn mate sio wahakimi berdasarkan none se tetulis suakng kitab-kitab sio, sesuai gawiatn reo. ¹³ Laut nyerahkan ulutn-ulutn mate se naan ba suakngne, maut ali Hades lou nyerahkan ulutn-ulutn mate se naan ba suakngne ali wahakimi, masing-masing menurut perbuatanne. ¹⁴ Lalu, maut ali Hades watimbai pe suakng lautan apui situlah pemate se kerueh -- lautan apui. ¹⁵ Ena seulutn ngaratnne doho tetulis suakng kitab pemwolupm, ise anta watimbai pe suakng lautan apui sio.