¹ Ukah sio, aku krongoi nain se nyaring sara sekumpulan olai ulutn ba surga ngontuh, " Haleluya! Keselamatan, kemuliaan ali kekuasaan iselah gin Allah taapm ² koe penghakiman-Ne bujur ali adil koe Ise ukah ngadili pelacur olai sio, se ngerusak bumi ali kebejatanne, ali ukah mbalaskan raya hamba-hamba-Ne ampe pelacur sio." ³ Agin kerueh kaline, reo ngontuh, " Haleluya! Atuk pelacur sio ukah pombo ampe seola-olane." ⁴ Lalu, kerueh pulu opat tua-tua ali keopat makhluk sio sujud ali nyembah Allah, se tungoh ba ombo takhta, ali ngontuh, "Amin! Haleluya!" ⁵ Kemudian, krongoideh nain anjak takhta, "Pujilah Allah taapm, hai iko awisne se melayani Ise, maeh se didik nonepun se olai, se ngehormati Ise!" Aruh kawinatn Anak Domba ⁶ Lalu, aku krongoi nain sara sekumpulan ulutn deo, sara buni ranu bah, ali sara buni grugum se harat, ngontuh, "Haleluya! Ena, Tuhan Allah taapm se Mahakuasa memerintah. ⁷ Ayu taapm bersukacita ali bersorak sorai, ali ngumi kemuliaan ampe-Ise koe ondro pekawinan Anak Domba ukah awi, ali penganten wawe-Ne ukah siap. ⁸ Ampeise ukah waumi kain linen halus se berasih ali cemerlang, agin wapuruk koe kain linen sio iselah perbuatan bujur se walakukan ulutn-ulutn kudus." ⁹ Kemudian, malaikat sio ngontuh Ampe aku, "Tuliskanlan situ: 'Waberkatilah ulutn se waundang pe jamuan kawinan Anak Domba!"' ali, ise ngontuh gane ampe aku,"situ iselah kata-kata se bujur anjak Allah." ¹⁰ Lalu, aku sujud ba po,o malaikat sio agin nyembah ise. Leka, ise ngontuh ampe aku, " Ai lakukan sio koe aku lou hamba sara iko ali erai untukng-erai untukngko se ngurut pe kesaksian Yesus. Sembahlah Allah koe kesaksian Yesus iselah roh nubuat." Penunggang kuda ura ¹¹ Kemudian, aku minda surga tebuka, ali timbullah erai kukui kuda ura; Ise se tungoh ba ombone ngaratnne Setia ali bujur, ali suakng kebujuran Ise ngehakimi ali berperang. ¹² Mato-Ne sara barau apui, ba utok-Ne naan deo mahkota, ali Ise naan ngaaratn se tetulis, se doho waketau seulutn pun, kecuali ompu-Ne dederai. ¹³ Ise makai jubah se ukah waculupkan pe suakng raya, ali ngaratn-Ne iselah Firman Allah. ¹⁴ Awisne pasukan se naan ba surga baya Ise ali nunggang kuda ura ali berpakayatn kainlinen halus se ura ali berasih. ¹⁵ Ante wowa-Ne, pekual erai pedang landap se wagunakan agin mopok bangsa-bangsa. Ise anta menyuyu ombo reo ali tungkat wasi. Ise anta memeras anggur suakng watu kilangan, se iselah mara Allah se Mahakuasa. ¹⁶ Pe jubah ali pahan-Ne tetulis ngaratn situ: RAJA OMBO SEGALA RAJA ALI TUAN OMBO SEGALA TUAN. ¹⁷ Kemudian, aku minda seulutn malaikat sekondrokng ba suakng matoondro. Ise ngesiak ali nain se karas ampe awisne pempulu se sembilikng ba langit, Ayu berkumpullah agin baya suakng jamuan kuman olai Allah, ¹⁸ agar iko kate kuman daging para raja, daging ulutn-ulutn kuat, daging kuda-kuda ali reo se tungoh ba ombone, ali daging awis ulutn, maeh sio ulutn bebas nonepun ulutn merdeka, ulutn didik nonepun ulutn olai." ¹⁹ Lalu, aku minda binatang sio ali para raja ba bumi serta pasukan reo bekumpul agin perang ngelawan Ise se tungoh ba ombo kuda ura sio ngelawan pasukan-Ne. ²⁰ Moko, binatang sio waungkup, ali nabi buakne se ukah ngadakan tanda-tanda ajaib ba muka binatang sio, se ali ise nyesatkan reo se nerima tanda binatang sio ali reo se nyembah patungne. Reo awisne watimbai wolupm-wolupm pe suakng lautan apui se ngebarau-barau koe belerang. ²¹ Ali, sisane wabunu ali pedang se pekual anjak wowa Ise se tungoh ba ombo kuda ura sio, ali awisne pempulu wawosikngkan ali daging reo.