¹ Lalu, aku krongoi erai nain se karas anjak suakng Bait Allah se ngontuh ampe keturu malaikat, " Tulaklah ali tumpahkandeh keturu cawan mara Allah sio pe bumi." ² Malaikat se awal tulak ali mbalik cangkerne pe bumi, moko timbullah bisul se moso ali manangkan pe ulutn-ulutn se makai tanda binatang sio ali se nyembah patungne. ³ Malaikat kerueh mbalik cawanne pe laut, moko laut berubah njari raya, sara raya ulutn mate ; ali awisne se wolupm ba suakngne pun mate. ⁴ Malaikat ketolu mbalik cawanne pe sunge-sunge ali mato-mato ranu, ali awisne njari raya. ⁵ lalu, aku krongoi malaikat se berkuasa ombo ranu ngontuh, "Ikopm adil, ya Se Suci, se naan ali ukah naan koe Ikopm ngehakimi awisne situ. ⁶ Ena, reo ukah mbalik raya umat-Kopm se kudus ali raya nabi-nabi-Kopm, leka Ikopm ngumi reo raya agin wa inum. Reo pantas nerimane." ⁷ Ali, aku krongoi altar ngontuh, " Ya Tuhan, Allah se Mahakuasa, bujur ali adilah penghakiman-Kopm." ⁸ Malaikat keopat mbalik cawanne pe ombo matoondro, moko matoondro waumi kuasa agin ngehanguskan meresia ali apui. ⁹ Mersia wahanguskan koe layokng se pekual biasa, leka reo ngehujat ngaratn Allah se naan kuasa ombo awisne bencana situ. Reo deah mao batobat ali memuliakan Allah. ¹⁰ Malaikat ke dimo nglimbak cawanne pe ombo takhta binatang sio, moko kerajaanne njari siropm; ali reo ngikit lela reo koe kemanangan, ¹¹ ali ngehujat Allah se ba surga koe rasa manang ali bisul-bisul reo; leka reo doho batobat ante perbuatan- perbuatan reo. ¹² Malaikat ke onom nglimbak cawanne pe sunge olai, yaitu Efrat, moko ranune njari meang agin mempersiapkan lalatn agin raja-raja anjak Timur. ¹³ Lalu, aku minda anjak wowa tondoi, anjak wowa binatang sio, ali anjak wowa nabi buak pekual tolu roh moso se tampak sara gondrek, ¹⁴ koe reo iselah roh-roh daat, se ngadakan tanda-tanda ajaib, se tulak ampe raja-raja ba bumi agin ngumpulkan reo agin ngehadapi peperangan pe ondro olai, sesio ondro Allah, Se Mahakuasa. ¹⁵ (" Otaudeh! Aku awi sara malikng. Waberkatilah ulutn se tatap tejaga ali memelihara pakayatnne sehingga ise doho malatn ali blegeu ali ulutn-ulutn beloh kotau kemaianne.") ¹⁶ Kemudian, roh -roh daat sio ngumpulkan reo ba wadah, se suakng basa Ibrani waontuh Harmagedon. ¹⁷ Malaikat keturu nglimbak cawanne pe riwut, moko kerongoideh nain se karas anjak suakng Bait Allah, anjak takhta sio, ngontuh, " Ukah aut." ¹⁸ Ali, tampaklah kilat se nyambar-nyambar, nain ali gemuruh garugum, ali kijut bumi se harat, sara se balupm suah terjari tanjak mersia naan ba ombo bumi, dasyat beta kijut sio. ¹⁹ Kota olai sio tebelah njari tolu bagian, ali kota-kota bangsa-bangsa lorak; ali Babel se olai sio doho waksowot Allah agin waumi ampe ise cawan anggur mara-Ne se meluap-luap. ²⁰ Setiap pulau lenyap ali gunung-gunung doho watemukan. ²¹ Uran es se olai, kira-kira seboyat 1 talenta, latu anjak langit kono mersia; leka mersia ngehujat Allah koe bencana uran es sio. Sebab, bencana sio ngeri beta.