¹ Kemudian, aku minda Anak Domba sekondrokng ba Bukit Sion, ali ampe-Ise naan 144 ribu ulutn, se naan ngaratn Uma-Ne pe rai reo. ² Aku krongoi nain anjak surga sara gemuruh ranu se deo ali nain garugum se karas, leka nain se kukrongoi sio sara nain buhan pemain kecapi se mainne kecapi reo. ³ Reo beyanyi suatu nyayian wau ba muka takhta ali ba muka keopat makhluk, serta ba buka tuo-tuo. Beloh seulutn pun kate ngelajari nyayian sio selain sejatus opat pulu opat ribu ulutn se ukah watewus anjak bumi. ⁴ Reo iselah ulutn-ulutn se doho menajiskan ompu ali wawe-wawe koe reo perjaka. Reo iselah ulutn- ulutn se baya Anak Domba pe bone pun ise tulak. Reo ukah wa tewus anjak meresia sebagai uwa-uwa seawal gin Allah ali Anak Domba. ⁵ Doho naan buak suakng wowa reo; reo doho besala. Pesan ante tolu malaikat ⁶ Aku minda malaikat lain sembilikng ba nonga-nonga langit, ngoit injil kekal agin waberitakan ampe reo se duloi ba bumi ali ampe awisne bangsa, suku,basa, ali kaum ⁷ ali ise ngontuh ali nain se nyaring beta, " Takutlah anta Allah ali waumikanlah kemuliaan ampe-Ne koe waktu penghakiman-Ne ukah awi; sembahdeh Ise se ngulah langit, bumi, lat, ali awisne mato ranu." ⁸ Lalu, malaikat se lain se kerueh, nyirik ali ngontuh, "Lorak, ukah lorak Babel se olai sio koe ise ukah ngulah awisne bangsa minum anggur nafsu seksualne se bejat." ⁹ Kemudian, malaikat se lain, se ketolu, nyirik kerueh malaikat sebalupmne, ali ngongtuh ali naiin se karas, "Ena ise ka nyembah binatang sio ali patungne, ali nerima erai tanda pe rai atau kayakngne, ¹⁰ ulutn sio anta minum anggur mara Allah, se wasaluine ali kekuatan ponu pe suakng cangker mara-Ne, ali ise anta wasiksa ali apui ali belerang ba muka malaikat- malaikat kudus ba muka Anak Domba. ¹¹ Ali, atuk siksaan reo mongket seola-olane. Reo beloh waktu agin sindroi. maeh kondro atau malopm, yaitu reo se nyembah binatang sio ali patungne, atau ise poh se nerima tanda ngaratne." ¹² Inalah ketekunan ulutm-ulutn kudus se nggaduh suyuan Allah ali iman reo ba suakng Yesus. ¹³ Lalu, aku kerongoi nain anjak surga ngontuh, Tulikandeh situ: Mulai keletu, waberkatilah ulutn mate, se mate ba suakng Tuhan." Roh ngontuh , " Bujur agar reo kate sindroi ante jerih paya reo koe gawiatn-gawiatn reo baya reo." Bumi wapanen ¹⁴ Lalu, Aku minda erai awan ura ali tungoh ba ombo awan sio seulutn sara Anak Mersia, makai mahkota amas ba utok-Ne ali sabit se taropm ba kayakng-Ne. ¹⁵ Lalu, malaikat lain pekual anjak Bait Allah, ali berseru ali nain semuyo utok Ise se tungoh ba ombo awan, '' Ayunkan Sabit Kopm ali panendeh koe wayah agin manen ukah awi ali panenan ba bumi ukah masak." ¹⁶ Moko, Ise se tungoh ba ombo awan ngayunkan sabit-Ne pe ombo bumi, ali bumi pun wapanen. ¹⁷ Kemudian, malaikat laitn pekual anjak Bait Allah se ba surga, ali ise lou naan sabit se taropm. ¹⁸ Ali, malaikat laitn gane, se berkuasa ombo apui, pekual anjak altar. Ise berseru ali nain se muyo ampe malaikat se ngurut sabit taropm sio, " ayunkan sabitko se taropm sio ali kumpulkandeh gugusan uwa anggur ante pohon anggur ba bumi." ¹⁹ Moko, malaikat sio ngayunkan sabitne pe bumi ali ngumpulkan gugusan uwa anggur ante pohon anggur ba bumi ali nimbaikanne pe suakng watu kilangan olai mara Allah. ²⁰ Pemerasan uwa anggur sio walakukan ba kual kota, ali raya ngalir ante alat pemeras anggur sio kira-kira seombo kekang kuda ali sepengatah seribu onom jatus stadia.