¹ Kemudian, aku minda erai kukui binatang buas pekual anjak suankng laut, naan sepulu tanduk ali turu utok. Ampe setiap tandukne naan erai bahkota ali ampe setiap utokne tetulis ngaratn- ngaratn yembare. ² Binatang buas se aku otau sio sara ali macan tutul, po,one sara po,o biwang, ali wowane sara wowa singa. Tondoi sio ngumi binatang buas sio kekuatan,takhta, ali kuasa se olai. ³ Aku minda erai ante utok-utokne sara kono poroh se kate mulah kematean, leka poroh sio njari kamah. Awisne denia kagum ali nyirik binatang buas sio. ⁴ Ali, reo nyembah tondoi sio koe ukah ngumi kekuatanne ampe binatang buas sio; ali reo nyembah binatang buas sio ali ngontuh, " Ise poh se sara binatang buas ina ali isepoh se kate berperang ngelawan ise ?" ⁵ Ali, ampe ise wa umikan erai wowa se ngontuh-ontuh sakah ali ngehujat, ali kuasa agin ngelakukanne seola 42 ulatn. ⁶ Ise mbuka wowane suakng hujatan ngelawan Allah, agin ngehujat ngaratn-Ne, ali kemah-Ne, ali reo se duloi ba surga. ⁷ Ise lou wabulihkan gin memerangi ulutn-ulutn kudus ali ngalahkan reo; ali ampeise waumi kuasa ombo awisne suku, kaum, basa, ali bangsa. ⁸ Awisne se duloi ba bumi anta nyembahne, sesio tiap ulutn se ngaratnne doho tertulis sejak denia wajarikan suakng kitab pemwolupm pu'nt Anak Allah Domba, se ukah wasembalih. ⁹ Setiap ulutn se bertelingo kakandeh ise ngrongoi ina : ¹⁰ " Apabila seulutn watentukan jari tawanan, ise anta njari tawanan; apabila seulutn ngempate ali pedang, ali pedang ise harus wampate." Binatang se pekual anjak bumi ¹¹ Lalu, aku minda erai kukui binatang buas se laitn pekual anjak suakng bumi; ali binatang sio naan rueh tanduk sara anak domba, leka ise bepander sara erai kukui tondoi. ¹² Ise nglalatnkan awis kuasa binatang buas se keawal sio ba hadapanne, ali mulah bumi ali reo se duloi ba suakngne nyembah binatang buas keawal, se poroh parahne ukah wakamahkan. ¹³ Ise ngelakukan tanda-tanda ajaib se olai, bahkan ngemangekan apui anjak langit pe bumi, ba muka ulutn-ulutn. ¹⁴ Ali, ise menyesatkan ulutn-ulutn se duloi ba bumi ali tanda-tanda ajaib se waizinkan agin ise gin wa ulah ba muka binatang buas se keawal. Ise ngontuh ampe reo se duloi ba bumi agin mulah patung binatang buas se keawal, se teporoh koe pedang, leka tatap wolupm sio. ¹⁵ Ise waijinkan agin ngumi napas ampe patukng binatang sio mokone patung binatang buas sio kate bepander ali ngulah ulutn-ulutn se doho nyembah patung sio wampate. ¹⁶ ali, ise ngulah awisne ulutn, idik atau olai, sugih atau susah, budak atau ulutn merdeka, waumi erai tanda pe kayakng kanan atau raine, ¹⁷ adar beloh seulutn pun kate moli atau njual kecuali ise naan tanda sio, sesio ngaratn binatang buas sio atau bilangan ngaratne. ¹⁸ Hal situ memerlukanne hikmat. Ginounlah ulutn se bijaksana ngehitukng angka binatang buas sio koe angka sio iselah angka seulutn meresia; ali angkane onom jatus onom pulu onom.