¹ Tandi kunwe, natafwa ku zisi zenu indi zibe. ² Imu zisi zopani indi zibe zinaru ku para shazo mwi njira u lyuvu. Naru ku para kwenda shuba yendisi indi mata uru pupo, mupupo iwati bberika kwa bana bahati tishira. ³ Putishi para mwikyo lya bayeyi, ku yiziriza miyano kano yemibbi yu shibe shetu, indi ku dzera ku wuso nizi shaka zu mumbiri indi ingana etu. Kali ta bana wuwuqhu, tandi babamwe. ⁴ Urezya mufumu mushi shemo shu rusuno rwakye roru kuru rwamati shaka sharo. ⁵ Putali tubafu mu wubbi, matati pa wuparo paxiki muku Keresite - shuru suno mata ku yaka. ⁶ Urezya matati tambusa paxiki ni Keresite, Urezya mati panga kasikama paxiki mu shibaka mwi liiro indi Jeso Keresite. ⁷ Atikya mwi mwaka iya tiya shatiqe wukuru wushi shemo shakye shauru suno ku Jeso Keresite. ⁸ Shishi shemo nata yakuwa shi tumero, zopani ama ziye shanwe, impo yatinzwa ku Rezya. ⁹ Ka shizisi, atikya kusiye ku shanganeha yatili kakura. ¹⁰ Tuba bberikisi wu Rezya, tata pangirwa ku Jeso Keresite ku panga misebezi ye miqa yu Rezya amatati yanakena kare koo, akya tyendye shayo. ¹¹ Cwarehe ni yibe atikya kali imbulivu mwi nyama. Na beruwa ''akya kambu mupato'' shisha tiberuwa ''mupato'' shata panguwa shamanga umuyeyi. ¹² Mu kakanda kapana nata kusuwa ku Keresite, makwamavu kuba yeyi ba Isiraere, makwamavu ku karwi kata zuwurwa, ku njemwa itishiro indi kuku Urezya mu lyuvu. ¹³ Kono pani mu Jeso Keresite yenwe inarana shire ku Rezya nalyetuwa shufupi shamarwapa a Keresite. ¹⁴ Yendi shikhamu shetu. Mata panga zibiri kuba shixiki. Shi mumbiri mata bbura mudiya-diya ukuli twaya watati qhapara. ¹⁵ Mata manisa murawo indi njendiso atikya apange muyeyi yo mupiya ku kye, indi ku panga shikhamu. ¹⁶ Keresite mata shisa bayeyi kowo mu mumbiri muxiki ku Rezya shishi bambiro, pwamata bhira shutoyo. ¹⁷ Jeso mataya ku hweta shikhamu ku nwe inarana shire shikhamu kubarana shufupi. ¹⁸ Sha Jeso akya kowo babe ni njira mumupupo ku Shee. ¹⁹ Cwarehe, pani yenwe wu lyuvu kani bayeni indi makwamavu. Ni bapa xiki ni bayeyi baba chena wu Rezya indi wi njuwo iwu Rezya. ²⁰ Natara xhiniwa pu makuru ama aposutora indi ba porofita, Jeso Keresite yeye ndishiga shiti nvunja. ²¹ Kukye injuwo yati yima paxiki indi ku gipa akya i tempere ku Shikati. ²² Ikukya indinwe nara xhiniwa paxiki kuba shibaka mwati sikama mu mupupo wu Rezya.