¹ Shilibaka zopani mye, Paulusi, ndi bbatiti a Jeso Keresite shayenwe wu lyuvu. ² Ndati tishira atikya nata yuvwa zu musebezi ushi shemo shu Rezya wata pewa kumye shanwe. ³ Ndati ñwa kwenda shazata zukuwa ndukuya kuyibahara shamye. Yopani injahamu yata zukuwa shuwu fupi ndani ñwera. ⁴ Ni shibara zopani, mboni kwene ku yuvusisa zina mwikyo zi njahamu yata zukuwa za Keresite. ⁵ Ku rusinga rurumwe injahamu yopani amayi yibahare kwa bana ba bayeyi. Pani kali yayi bahara shu mupupo bawa apositola indi ba porofita ibata bikuwa kuru pati shu musebezi wopani. ⁶ Injahamu yi zika ku tikya wu lyuvu ndisha bajowura wuqa indi babamwe ibati panga mumbiri, kuli yabira isepiso ku Jeso Keresite shuwu rumiwa. ⁷ Ndabi shukwembwa shuwu rumiwa shimpo Urezya indata pewa shishemo ku mye shu musebezi umata akye. ⁸ Ku mye - nanga ku tikya imye yomudana ku bayeyi wu Rezya ba chena- ku shishemo shata pewa,ku kutaza lyuvu wufumu wa Keresite. ⁹ Atikya ndilyetye liseli puru kandara mi yanakano ku yumwe ni yumwe- mayi ndata zukuwa kare kare koo ku Rezya, ya mata wumba izuto kozo. ¹⁰ Mi yanakano yopani yataya ku yibahara shi kereke akya bayendisi indi njendiso muzi baka mwi liiro bayibe wusawuka wu Rezya watiya mu zi njira zizinji zinji. ¹¹ Zopani zara sisini kwenda shi muyanakano wahati mana wamata yanakana sha Jeso Keresite Shikati etu. ¹² Sha Keresite amata ku ywapa indi ku tishira shuku yira shi tumero itina nayo ku kye. ¹³ Cware ndani ringira ni siye ku shushira mulyuqo shi mashando ngundati shanda shanwe, kokunwe wuqa. ¹⁴ Shilibaka yopani ndatiwa shamazhi pu wuso wa Tatye. ¹⁵ Kukye rusinga koro mwi liiro indi mu lyuvu rwati beruwa. ¹⁶ Ndati rapera akya anipe, kwenda shuwu fumu wuwu kuru wakye, ku gisuwa shi mata akye kwenda shu rupupo rwakye, iwuna ku nwe. ¹⁷ Ndati rapera akya Keresite apare ni mitima enu shi tumero, mushani kwira indi ku gupa mu rusuno. ¹⁸ Atikya ni kwenwe ku yuvusisa, indi kowo bayeyi baba chena wu Rezya, muwure, wukuru, wumwa indi wugupwi. ¹⁹ Ku yiba rusuno lya Keresite, wati bbara amano, akya niyire wuqa wu Rezya. ²⁰ Pani ku kye amati kwana kwisi ku bbara zitati ringira kapa ku yanakana, kwenda shamata akye ingati bberika ku tswe. ²¹ Kanya kabe ku kye mwi kereke indi ku Jeso Keresite ku masinga kongo. Amen.