¹ Paulusi, mu apositola a Jeso Keresite shuku shaka ku Rezya, ku bayeyi wu Rezya baba chena ibana mo Efese, bati tishira ku Jeso Keresite. ² Zu xuma zibe kunwe indi ku yuvwana kwatidzwa ku Rezya Shetu, indi ku Shikati Jeso Keresite. ³ Ku radzama Urezya Shetu hana Shikati Jeso Keresite, yamatipe shizipa koozo zu mupupo wa kwi lyiiro ku Keresite. ⁴ Tandi shamata ti ketira kokukye, itandzi, ulyuvu kali chire ku xhutuwa, atikya tibe baba chena ibahati nyazahara pumaso akye. ⁵ Shuku shaka kwakye, Urezya matati bika manja atikya tibe tuba pundi shayeye Jeso Keresite, shuwuqa wuku shaka kwakye. ⁶ Shukwi dzama kwakye, zitata shangana shukabira shuku shaka shitata puwa mahara koku kye muxiki yimati shakuwa. ⁷ Sha Jeso Keresite tata yakuwa shama rwapa akye, indi ku patyirwa zisizetu, kwenda shuwutsuzi wakye. ⁸ Matali kambi shira zu quma zekye indi mi yanakano akye kowo. ⁹ Urezya matiti yanakanisa zizakya, indi zatati mwidzama, zamata raqe Keresite. ¹⁰ Shuku lyaya kuyanaka kakanda, ku lyeta izuto koozo paxiki, koozo za mwi lyiiro indi za peshi, kuzi lyeta paxiki, nanga i Keresite. ¹¹ Sha Keresite tata tungurwa ka yisa rupati, shuku bikuwa manja kwenda shumwisi kowo bamata rasi shuku shaka kwa kye. ¹² Urezya mata yi rika yetswe, atikya timwi dzama, tswe wi tandzi kwi sep a Keresite. ¹³ Keresite, indinwe, punaru ku yuvwa mayi injahamu, zutu muwa zuku ni yaka, nata tishira kukye, indi ku toruwa shuku sepisuwa shu mupupo muchena. ¹⁴ Yimata patisa shukwazango chetu, tana pushata ku tsuwa, kwi dzama ku liseli lya kye. ¹⁵ Shazopa koozo, nanga ndaru ku yuvwa zuku tishira kwe ku Shikati Jeso indi ku shaka koko ku Rezya yo muchena ku bayeyi bakye. ¹⁶ Ku yemwa indi yi mike ku yanakana kwe zu Rezya tandi shinda hweti kuwe mwi patero. ¹⁷ Ndati ku rungira ku Rezya Shikati etu Jeso Keresite, Shaa liseli, anipe mupupo womu chena indi ku tandura izata zukuwa za mwamano akye. ¹⁸ Ndati rapera atikya a mesho umutima we ngara qewa, atikya uyibe iqumu yu maberwa indi zu tsuwa zu bakwanga koozo ku bayeyi wu Rezya baba chena. ¹⁹ Muzi tapero zanga ndati rumba atikya uyibe iqumu yu wukuru wakye koku tswe itati tishira, kwenda shizisi zi qumu akye. ²⁰ Woo nduwugyu wati fwana Urezya amatarasi koku Keresite pukaru ku mutambusa kuba bafu indi kumu sisika ku lyanja lyakye lyima khamumu lyiiro. ²¹ Aku sisika Keresite ko shire nanyina, nduwu yendisi, indi qumu indi ku lyatirwa, indi ilna kolyo lyata rukuwa. Keresite shayendise, ka papani ngaho, indi mukakanda ika shiya. ²² Urezya mata bika izuto koozo mwishi lya makondo a Keresite indi ku mupaikereke kuba mushoro akye kwi zuto koozo. ²³ I kereke mu mbiri akye, shukuya ku kye tati yiziriza ichimwe ni chimwe.