¹ Paghuhura, mwakurwange, muhafe mwaNyambi. Papange nakutjange yinu yofotji yi karo kukwenu ame kadiko ghukukutu kwange, no nanyi yimukunge. ² Mukenge ku mbwa. Mukengurure harughani hokudhira kukushuka. Mukengurure kwawa hoyanga hanu. ³ Poyi atwe yatwe twakadikeneno- atwe twarughanenanga pa Mupepo waNyambi, no kushimba ruhafo mwaKristusi Jesusi, no kukara kadiko makurupero panyama. ⁴ Ngambi kengeyo, ame kukona kukara no makurupero panyama. Ngeshi kehe yuno haghayara eshi kukara no makurupero panyama, ame ne ngo mengi kupiterera. ⁵ Hani kenine mudiyuwa dyoghukwoko no dyoghuhatu, dya hanu wa Israil, hakadiko dya Benjamin, muHeburayi wawaHeburayi; kukutha kumuragho, wawaFarasayi. ⁶ Thika dinahaka, na pangure ngirishe; thika hahungami hakara kwishidhomuragho, napirira kehethino thokuwapatera. ⁷ Ene kehe yino yinu yakarire kukuwedherera kukwange, noyiturire eshi nayongaritha pamurandu waKristusi. ⁸ Podigho, natara yinu yoyihe mukukara eshi nayongaritha yoyishi mudyo gho maghano gha Kristusi Jesusi gho Fumu wange. Kukwendi natapa yinu yoyihe- no nayishimba eshi yitjoro-podigho eshi niwane Kristusi ⁹ no kuniwana mumwendi, kadiwakukara nomuhungami papange kutunda kumuragho, ene ayo yakona kupita mu mahimeno ghaKristusi-ghuhungami gho kutunda kwaNyambi ne gho matawero. ¹⁰ Podigho nashana kumudimuka no ngcamu dhomuvumbukero wendi no makughero gho yinyanda yendi, kukara yira yodighe muyifa, ¹¹ ruvedhe rumwe kuyikuyuva yo muvumbukero kutundamukufa. ¹² Kadi shi ngwa nayiwana yinu yi kare, endi mene no muhungami kare, ene nakwaterera thikadi ghanikwaterere mwa Keistusi Jesusi. ¹³ Mwakurwange, kadinakughayara eshi ame pithange natanga kuyikwata yo. Ene thinu thofotji narughana: Kuvurama yokunyima no kutokomena yokughutho koyiyidi ko, ¹⁴ ame kukwata dighano nokumona paro dhokuwiru mukunitha Nyambi mwaKristusi Jesusi. ¹⁵ Twahe twe tudi eshi twakuru,tuyereke kughayara ngeno; no ngeshi haghuhayara mamonamo keheyino, Nyambi ghana kuyikuneghedha kukoye. ¹⁶ Ene ngambi kemo, kehe panotwakuma, ninge tukwaterere ko. ¹⁷ Mukare mwatemununi kwange, mwakurwange. Mukengurure kowa hana kuyenda nothitamenedhi ethi mwawana mumwetu. ¹⁸ Thingi thagho kuna kuyenda-awa namutongwere kehepano, nopano kuna kumutongwera nomaruhodhi-awo hanyathi ghothikurushe thaKristusi. ¹⁹ Ghuhura wagho ne maharanganyeno. Nyambi wagho ne dipumba dyagho,no mangcamu ghawo ne muhonyi dhagho. Haghayaranga yinu yopakaye. ²⁰ Ene ghukakoghatji wetu ne mudiwiru, omu twatatera Mushuturi, Fumu Jesusi Kristusi. ²¹ Aye ghana kutendurura yirama yetu yishaghumbiru yikare yira yirama yendi yo ngcamu,ey ghatenda thinda shamangcamu no kutapa yinu kukwendi.