¹ Ngeshi kwadi kehe ghano matjokedhero mwaKristusi, ngeshi koghudi ghuwa watapa ruhakitho, ngepi kughudi ghukareri mwaMupepo, ngeshi kothidi thinyeke no maghamweno, ² muninge ruhafo rwange mukukara no maghano ghofotji, kukara no ruhakitho rofotji, kukara pofotji pamupepo, no kukara nothitambo thofotji. ³ Tende kadiko yokukukumonikitha yonyaranyara. Pakukumbirupitha ture hamwe hakare mudyo kukupitakana ghothinda. ⁴ Muninge kehe yu eshi kadi kenge kuyihaka yendi, ene ghakona kukenga koyohamweya. ⁵ Mukare no maghano mumwenu mwathinda agha gha karire mwaKristusi Jesusi, ⁶ yidye, ngambi kenge ghakara muthishwi thaNyambi,kadi ghathotera makurikanyithero na Nyambi yira thimwe tho kukwaterera. ⁷ Mundhira dhimwe, ghakutenendire mukunguthinda muthishwi tho murughaneni, no hamuwanine yira hakafumu. ⁸ Ghakumbirupithire thinda nogheyire ghakutape kuyifa, ngambi yifa yo pathikurushe. ⁹ Podigho Nyambi gha mutumere thikuma. Ghamupire dina edi dyapitakana mena ghomahe. ¹⁰ Ghatendire yinu yoyihe yi podigho eshi mudina Jesusi kehe yuno ghakona kumunyongamena,manwi ghowa hadi mudiwiru nohopakaye ndani no mwishi dho kaye. ¹¹ Ghatendire yi podigho eshi kehe rudimi rutongonone eshi Jesusi Kristusi ne Fumu, kumangcamu gha Nyambi gho Wihetu. ¹² Podigho, mwahakwa, thikadi mwakuthanga, kadishi shimeponidi ene rwingi oku mene kadipo,murughane papenu kupira woma no kututuma. ¹³ Podigho Nyambi ghana kurughana mumwenu mwahe no kurughana eyi yamuhafitha. ¹⁴ Murughane yoyihe mwahana nanani endi dikanyi podigho ¹⁵ eshi mukare mwakakupira nanani, mwahana Nyambi gho kupira nanani mumuhoko wenu, nomuna kusheghenyayira maramba ghomukaye. ¹⁶ Mukwaterere kunando dhomoyo podigho eshi mudiyuwa dya Kristusi nakukununeke eshi mbadi natjirire munyaranyara endi kurughana munyaranyara. ¹⁷ Ngambi ngo kuna kuninotora eshi nikare thitapa thomuyambo noyirughana yo makurupero, natumera nokuhafa nenu mwahe. ¹⁸ Mundhira dhofotji mwakona kutumera no kuhafa nange. ¹⁹ Ene nakurupera mwaFumu Jesusi ristusi mukutuma Timoteghusi kukwenu popano,podigho shi yinitjokedhe ngeshi nadimuka yinu yokuhatera kukwenu. ²⁰ Kadi nakara naghumwe yira ye, oyu ghakara nothinga kukwenu. ²¹ Thingi thagho kushana yihaka yagho,kadi yinu ya Jesusi Kristusi. ²² Ene mwadimuka mudyo wendi,yoyishi thikadi shi mwana na wihe,podigho ghanikungire me no mbudhi dhomoyo. ²³ Podigho nahimi kumutuma wangu popankumona eshi ngepi di yakuyenda kukwange. ²⁴ Ene nidi no ghutjima mwa Fumu eshi ame papange name mwiyerowange ne pepi. ²⁵ Ene nakughayara eshi yidi mudyo mukutuma Epaphroditus ghahuke kukwenu. Aye ne mukurwange no murughani muyendhange no mukayita muyendhange, no mutumi wenu no murughani ghoyinyanda yange. ²⁶ Aye ghakarire no yikudhekera, no ghashanina kukara nenu mwahe, yoyishi ghayuvire eshi ayene tjitju. ²⁷ Aye ghakariretjitju no momughafe. Ene Nyambi ghakarire no thinyeke papendi, no kadi papendi ngenyu, ene no papange, podigho kadi nakukare no yikudhekera dhekera. ²⁸ Podigho ame nahimi thikuma eshi ngonimtume, podigho eshi apa mwakunamumona mwakuhafe, podigho nakukare noyikudhekera yoyipu. ²⁹ Tuna mutambura Epaphroditus mwaFumu no ruhafo. Mukutekere hanu yira ye. ³⁰ Eyi yakarire yirughana yaKristusi oyu gheyire pepi no yifa. Ghaturire yipara yendimughukukutu podigho gha nikunge me no kukumithamo eyi mwadhirire kutenda muyirughana kukwange.