¹ Apa gheyire mathikuthiku, wahe ha mapristeri hohakuru no hakuru awa hakarire hakurwitha Jesusi mukumutura mukufa. ² Hamukwatire,muvukumine kuya,no kamutapa kwaPilatusi gho nunguru. ³ Apa Judasi, oyu ghamushwedhire ye, ghamonine Jesusi hana mushayekitha,ghapirukire noghahuthire yipindhi makumi mahatu yo siliveri kwamukuru wapristeri no hakuru, ⁴ no kughamba,''Na harure mukuheta manyinga gho kukushuka.'' Ene haghambire,''Nye yo kukwetu? Yimone yo papoye.'' ⁵ No ghavukumine pamuveyi siliveri mutembeli, no hafungurukire,no kuyenda panunda no kakughangerera yithinda. ⁶ Mukuru wapristeri ghashimbire yipindhi yosiliveri no kughamba,'' Kadi pamuragho mukutura yiwana pamurandu dho paro dho manyima.'' ⁷ Hayighambire yinu yi waheya,nohayighurire no masherenyi mudipya mu havumbekire hanu wahadhira kudimuka. ⁸ Pamurandu ghoyi diya dipya kuna kuditha,''Dipya dyo Manyinga'' kate dyarero. ⁹ No oyiya ghaghambire Jeremiya gho muporofeta ghayikumithire mo, nokughamba,''Hashimbire yipindhi makumi mahatu yo siliveri, paro edhi haturire papendi kwahana waIsrael, ¹⁰ nohayitapire kudipya, thikadi Fumu ghayinineghedhire me.'' ¹¹ Jesusi ghemanine kughutho wa nunguru, na nunguru ghamwipure ye,''Yowe Fumu wawaJuda?'' Jesusi ghamuhuthire,''Dyo wakughamba kengeyo.'' ¹² Ene apa ghamurundere mukuru wawapristeri no hakuru,ghawahuthire kadiko. ¹³ Pilatusi ghaghambir kukwendi,''Kadi wakuyuva yoyihe yighamba yokoye ndi?'' ¹⁴ Ene kadi ghahuthire no nando dhofotji temba,podiyo nunguru gha hafire thikuma. ¹⁵ Pamudifeste yakarire yirughana ya nunguru yo kushwayitha mukadorongo oyu dhina totrora mbunga. ¹⁶ Paruvedhe ro hakarire nomukadorongo ghonyakanyaka ghodina dyo Barabasi. ¹⁷ Apa hakarire padyango dyofotji wahe, Pilatusi ghaghambire kukwagho,''Yidye munashana ni mushwayithere mwe? Barabasi, endi Jesusi oyu hetha eshi Kristusi?'' ¹⁸ Ghayidimukire eshi hatapire Jesusi kukwendi pamurandu gho ghupata. ¹⁹ Oku ghana hungumana muthipura tho mapangwero, munuwendi ghatuminenando kukwendi no kughamba,''Kadiko eyi ghadi nayo yokutenda kwakatughuru gho kupira murandu. Ame nanyanda dyarero pamurandu ghoyirota eyi ghana kara nayo kuhatera ye.'' ²⁰ Mukuru wapristeri nohakuru hayendire kumbunga no kwipura Barabasi,naKesusi hana mupagha. ²¹ Nunguru ghawepure wo,''Dye powa hawadi yu munashana nishwayithe kukwenu?'' Haghambire,''Barabasi.'' ²² Pilatusi ghaghambire kukwagho,''Nye shonitende naJesusi oyu hethaeshi Kristusi?'' Wahe hahuthire,''Mumupamarere.'' ²³ No ghaghambire,''Nye, murandu ghupighatenda?'' Ene hadirire ghukuyerera thikuma,''Mumupamarere.'' ²⁴ Apa ghayimonine Pilatusi yi eshi kadi ghakonine kurughanako keheyino, ene yita kuna katanga, ghashimbire meyu, ghakuyoyire kumoko kughutho gho mbunga, no ghaghambire,''Amene nomukenu mumanyinga ghoyu katughuru. Muyimone kukwenu.'' ²⁵ Hanu wahe haghambire,''Manyinga ghendi ghakare petu no pohanetu.'' ²⁶ Podigho ghashwayithire Barabasi kukwagho, ene ghakokire Jesusi no kumutapa hakamupamarere. ²⁷ Hamaporitha wa nunguru hashimbire Jesusi no kumutwara kumberewa dhodhikuru no kupongeka hakayita wahe. ²⁸ Hamumwashure no kumughanga nomughodhi. ²⁹ Hatendire nata dhomughunga nokudhimutura kumutwi, no kumutura thinu kudyoko dyendi dyorudyo. Hatongamene kughuthowendi no kumuheka, ghughamba,''Kumukugha,Fumu wawaJuda!'' ³⁰ Hamuthipere, hashimbire tjupa no kumumwashura kumutwi nopa nopa. ³¹ Apa hamuhekire, hashimbire nata no kumutura yivata yendi, no hamutwarire hakamupamarere. ³² Apa hashwayire, hawanine katughuru kutunda Cyrene hatire Simoni, oyu ghathinenekire kuyenda nagho podigho hashimbe thikurushe thendi. ³³ Heyire kudyango hanakutoya eshi Golgotha, kutongora shi'' Dyango dyoMakorongongi.'' ³⁴ Hamupire vinyi oyu havungire. Ene apa ghayiyerekire, kadi ghayinwine. ³⁵ Apa hamupamarere, hataghure thivata thendi pawadi, ³⁶ no hahungumane no kutura hakengereri papendi. ³⁷ Pawiru dhomutwi wendi haturirepo nata,no kutoya,''Oyu ne Jesusi, fumu wawa Juda.'' ³⁸ Hedhi hawadi hawapamarere pofotji nendi, ghofotji kurudyo noghumwe kurumoho. ³⁹ Awa hapitire hamutukire,kunyunga dhimutwi dhagho ⁴⁰ no kughamba,''Kwenu mwe mwakuhanyaghura tembeli no kudhitendurura mumayuwa mahatu, kukunge ghothinda! Ngeshi gho Mwana Nyambi, tundu kuthikurushe!'' ⁴¹ Mundhira dhofotji mukuru wapristeri hamuhekire, pofotji no mbunga nohakuru, no ghaghambire, ⁴² ''Ghakungire hamweya, ene kadi wakukona ghakukunge thinda. Aye ne Fumu wawaIsrael. Mumuthiye ghashuru kuthikurushe,no nanyi tutawe mumwendi. ⁴³ Gha kurupera mwaNyambi, muninge Nyambu ghamughamwene, ngeshi Nyambi kukona ghamughamwene. Aye ghaghambire,'Ame no Mwana Nyambi.'''' ⁴⁴ Mundhira dhofotji hedhi hawapamarere nagho haghambire matuka kukwendi. ⁴⁵ Muviri dho ghukwokono dhofotji mumakokore gheyire mudyango dyodihe kate muviri dhoghukwoko noghune. ⁴⁶ Muviri dhoghukwoko noghune, Jesusi ghadirire nodiywi dyodikuru no kughamba,''Eli, Eli,lama sabachthani?'' eyi yakutongora,''Nyambi wange,Nyambi wange, nye ghuna kuni mwagherera?'' ⁴⁷ Apa hayiyuvire hamwe awa hamanine po, haghambire,''Kuna kwitha Elijah.'' ⁴⁸ Popo ghofotji ghopapagho ghatjirire nokashimba thinwena nokuturamo vinyu ghomururu, nohamupire ghanwe. ⁴⁹ Hokuthighrako haghambire,''Mumuthiye pithendi. Ninge tumone pamweya Elijah gheya mukuna mughamwena.'' ⁵⁰ Jesusi ghadirire thikuma ghukuyerera no ghatapire mupepo wendi. ⁵¹ Mukenge, makehe gho mutembeli ghakutapire paruwadi kutunda kuwiru kate pamuve, kaye kakunyungire,nomawe ghapayukire. ⁵² Mambira ghayandhurukire, no yirama yohanu hokupongoka awa hararire hawapinduthire. ⁵³ Hatundire mumambira kunyima dhomuvumbukero wendi, ghengenine mudoropa dhokupongoka, noghamonekire kohengi. ⁵⁴ Apa hamonini awa harorere Jesusi kukunyunga komuve noyinu yiyahokokire, hakarire nowoma no haghambire,''Ghushemwa oyu ne Mwana Nyambi.'' ⁵⁵ Thingi thawa mbuyama awa hakuthaJesusi kutunda kuGalileya mukuna mukunga hakarire hana kukenge kokayenda. ⁵⁶ Mukatji kagho hakarire Maria Magdalena, Maria nyina James naJoseph, nanyina wahana wazebedee. ⁵⁷ Apa wakarire ghuthiku, gheyire katughuru ghomutungi kutundera kuArimathea, ghodina Joseph, oyu ghakarire ghofotji ghohakathishongero waJesusi. ⁵⁸ Ghayendire kwaPilatusi no kamwipura yirama yaJesusi. NaPilatusi gharawere mukayimupa. ⁵⁹ Joseph ghashimbire yirama, ghayidhingere padikehe dyodikenu, ⁶⁰ no kayitura mumbira dhodhipya edhi ghakatetire mudiwe. Podiyo ghaturireko diwe kuthero dhombira dhiya no ghakayendire. ⁶¹ Maria Magdalena na Maria ghumwe pohakarire, hahukumane ghutamba mbira dhi. ⁶² Diyuwa dyo kurandako, diyuwa dyokupita pamakuroyithero, mukuru wawapristeri nawa Pharisees hakonganine naPilatusi. ⁶³ Ha ghambire,''Ghodikuto, tuna vuruka apa ghakarire yamuhongaghuri oku muyumi, ghaghambire,'Kunyima dhomayuwa mahatu nanyi ghakuvumbuke karo.' ⁶⁴ Podigho rawere mukukunga mbira dhiya kate diyuwa dyoghuhatu, yoyishi hakathishongero wendi kukona nahamwidhemo no kughamba kwawanu,'Ghana vumbuka mwawafu,' no mahongawero ghoghuhura mboghana pitakana ghokutanga.'' ⁶⁵ Pilatusi ghaghambire kukwagho,''Mushimbe mukungi. Muyende mukatende yoyi shomukakone.'' ⁶⁶ Hayendire no katenda mbira mukadhikunga, haturireko diwe no kuturako mukungi.