¹ Yeyire apa Jesusi ghamanine manando, ghaghambire kwakathishongero wendi, ² ''Mwadimuka shi kunyima dhomayuwa mawadi pasika ne kuna kwiya, Mwana Munu nanyi ghakumutape no kamupamarera.'' ³ Mupristeri shokuru nohakuru wahanu hakonganine mumbara dha mupristeri shokuru, oyu hatire eshi Caiaphas. ⁴ Hakuyuvire waheya mukukwata Jesusi muwidhi no kumupagha. ⁵ Awo haghambire,''Kadi pamukandi, podiyo yita kadi yakwimanganye mwawanu.'' ⁶ Oku Jesusi shime kuBethany mudimbo dya Simoni gho mukayinondwe, ⁷ oku yene pakukenitha tishi,mbuyama ghamwiyere nokopi gho ndhiro nomaghadhi, no ghamunotwere kumutwi. ⁸ Ene apa hayimonine hakathishongero wendi yinu yi, hapatire no kughamba,''Pamurandu munye ghoru rupetho? ⁹ Eyi ngo kuna yighuritha kumanyinga ghomakuru no kutapa kwawakakunyanda.'' ¹⁰ Ene Jesusi, mukuyidimuka yi, ghawatongwere,''Nye mwakupethera mbuyama yu? Aye ghana tendi yinu yoyiwa kukwange. ¹¹ Kehe pano mwakaranga nawa hepwe, ene kadi mwakaranga nange kehepano. ¹² Apa ghananotora maghadhi gha payirama yange, ghana yirughanena mahoreko ghange. ¹³ Ghushemwa nakumutongwera, kehe pano hayuvithanga mbudhi dhodhiwa mukaye kokahe, keheyi ghana rughana yuno mbuyama nanyi hakuyighambe mumavurukero ghendi.'' ¹⁴ Ghofotjo ghopo dikumi nohawadi, oyu hatire Judas Iscariot, ghayendire kwamupristeri shokuru ¹⁵ no kughamba,''Nye muna shana kunipa podiyo nimutape kukwenu?'' Havihire makumi mahatu ghoyipindhi yo siliveri kukwendi. ¹⁶ Kutunda po ghawanine ndhira dhokumutapa kukwagho. ¹⁷ Diyuwa dyokutanga dyokyondaghura ghuroto hakathishongero heyire kwaJesusi no kughamba,''Kupi ghuna shana okushotukaroyithere yidya yo pasika?'' ¹⁸ Ghaghambire,''Muyende mudoropa kwakatughuru ghumwe no mukaghambe kukwendi,'Muhongi ghana ghamba,''Ruvedhe rwange ne munyara. Nanyi niture pasika mudighumbo no hakathishongero wange.''''' ¹⁹ Hakathishongero harughanine momu ghawa tongwere Jesusi, no hakaroyithire murarero ghopasika. ²⁰ Apa weghire ghuthiku, ghahungumanine nokudya nawakathishongero wendi dikumi nohawadi. ²¹ Apa hadire, ghaghambire,''Ghushemwa nakumutongwera ghofotji gho papenunanyi ghanihamure me.'' ²² Hakashire, no keheyuno ghatangire kumwipura,''Ghushemwa kadi Me, Fumu?'' ²³ Ghahuthire,''Oyu gho kutura dyoko dyendi nange pakaronga ne yoshoghanhete me. ²⁴ Mwana Munu ne nanyi ghayende, thikadi hayitjanga kukwendi. Ene yo katughuru Mwana Munu ghana muheti! Hasha koyo katughuru ngo kadihamureta.'' ²⁵ Judasi, oyu shoghamuhete kunakughamba,''Yame ndi,Rabbi?'' Ghaghambire kukwendi,''Ghuna yighamba ghothinda.'' ²⁶ Apa hakarire eshikunakudya, Jesusi ghashimbiire ghuroto, ghaghukandadhekire, nokughuyondaghura. Ghaghutapire kwawakathishongero no kughamba,''Mushimbe, mudye. Oyi neyirama yange.'' ²⁷ Ghashimbire kopi nokutapa ndangi, noghaghuwapir no kughamba,''Munwe,mwaheya. ²⁸ Agha ne manyinga ghange agha ghanotoka mumathigherero ghomaharwero. ²⁹ Ene nakumutongwera, kadi shoninwe karo modhi mbuyo dho vinyu, kate dyo diyuwa apa nakuyinwa ghupya nenu mu ghufumu waTate.'' ³⁰ Apa hembire dimbo, hayendire kudirundu dyaOlives. ³¹ Jesusi ghawatongwere,''Mwahe nanyi muwe ghuthiku ghodyarero pamurandu wange,ayo hayitjanga,'Nanyi nimwashure mukungi no ndjwi nanyi dhikuhanye. ³² Ene munyima dho muvumbukero wange, nanyi nakuyende kughutho wenumuGalileya.'' ³³ Petrusi ghaghambire kukwendi,''Ngambi wahe hawe yoyishi we,ame kadi shoniwe.'' ³⁴ Jesusi ghghambire kukwendi,''Ghushemwa nakukutongwera,ghuthiku ghoghuno, kughutho ghokwiya ngondovoro, nanyi ghunikanane paruhatu.'' ³⁵ Petrusi ghaghambire kukwendi,''Ngambi ngonife noye, kadi sho nikukanane.'' Wahe hakathishongero wendi haghambire yinu yofotji. ³⁶ Jesusi ghayendire nagho kudyango edi hana kutoya eshiGethsemane no kughamba kwakathishongero wendi,''Muhungumane pano oku mene kuna kuyenda nikaraperere.'' ³⁷ Ghashimbire Petrusi no hana hawadi haZebedee noghatangire kututuma no kukara mumaghukukutu. ³⁸ Noghaghambire kukwagho,''Mudhimu wange ghuna kasha thikuma, kate kukufa. Mukare kokuno no murorere nange.'' ³⁹ Ghayendire kughutho kamanana, ghawire parupara, no kuraperera. Ghaghambire,''Tate,ngeshi kukona, nonge yu kopi ghapite kutunda kwange. Ene, kadi shine pamahimeno ghange, ene pamahimeno ghoye.'' ⁴⁰ Gheyire kwawakathishongero no kuna wawana hana rara, no ghaghambire kwaPetrusi,''Nye, kadi wakukona ghukenge nange ngambi viri dhofotji ndi? ⁴¹ Kukengerera no kuraperera eshi kadi wingene mumayerekero. Mupepo ne ghuna himi, eneyirama ne kadiko ngcamu.'' ⁴² Ghayendire roghuwadi no karapera. Ghaghambire, "Tate, ngeshi kadi shoyipite shimengwa nakona kuyinwa, mahimeno ghoye nanyi nighatende.'' ⁴³ Gheyire karo no kuna wawana kuna kurara, meho ghawo ne maremu. ⁴⁴ Podiyo kuwathiya karo, ghayendire nokarapera roghuhatu, nokaghamba manando ghofotji. ⁴⁵ Jesusi gheyire kwawakathishongero wendi nokghamba kukwagho,''Shime ghamurara no kuturumutha? Mukenge, viri ne munyara dhidi, nomwana munu kuna kumutapa mumoko ghawa haruri. ⁴⁶ Mupindike, ninge mutuyende. Mukenge, oyu ghakuniheta ne pepi nange ghadi.'' ⁴⁷ Oku shime kuna kughamba, Judasi,ghofotji ghopowa dikumi nohawadi, gheyire. Mbunga dhodhikuru dheyire nendi kutunda kwamupristeri shokuru no hakuru wohanu. Heyire no maghonga. ⁴⁸ Katughuru yu ghaningire ghakanane Jesusi hatapire thidimukitho,ghughamba,''Oyu nakungcumita ne yokatughuru, mumukwate ye.'' ⁴⁹ Popo gheyire kwaJesusi no kughamba,''Mumoroke,Rabbi!'' no ghamungcumita. ⁵⁰ Jesusi ghambire kukwendi,''Muyendhange,tende yi ghuneghera mukunatenda.'' Podiyo heyire,haturire manyara ghawo paJesusi, no kumukwata. ⁵¹ Mukenge, ghofotji ghopowa hakarire naJesusi ghaghorore dyoko dyendi, ghashimbire dighonga dyendi noghatwire murughani wamupristeri shokuru, no kuteta ditwi dyendi. ⁵² Jesusi ghamutongwere,''Ture dighonga dyoye mudyango dyadyo,kwagho wahe hokushimba dighonga nanyi hakuyo nanyi ghakuyongare kudighonga dyendi. ⁵³ Kughayara eshi pamwe kukona kadi wakukona kwitha Tate, no kukona ghani tumene halegion no ha engeli? ⁵⁴ Ene ngepi keho edi twakukumithamo matjangwa,eshi oyi ne yihokoke?'' ⁵⁵ Paruvedhe ro Jesusi ghatongwere mbunga,''Muneya no maghonga mukuna nikwata yira nomwidhi? Kehe diyuwa nahungumanine mutembeli ghuyaghura, kadi mwanikwatire me. ⁵⁶ Ene yoyihe yi yahokokire podiyo yitjanga yawaporofeta yikumemo.'' Podigho wahe hakathishongero wendi hamuthighire nohatjirire. ⁵⁷ Awa hanyengire Jesusi hamutwarire kwaCaiaphas mupristeri shokuru, oku hapongire wahe pofotji. ⁵⁸ Ene Petrusi ghawakuthire kushakayenda kudirapa diya dyamupristeri shokuru. Ghayendire mwishi nokahungumana nohakungi mukamona yitundamo. ⁵⁹ Mupristeri shokuru nohapiterithi wahe hashanine matongweneno ghombango kwaJesusi podiyo hakamupaghe. ⁶⁰ Kadi hawanine kehe yino, ngambi kenge shi hengi hashupi hombango hengi heyire kughutho. Ene kunyima hawadi heyire kughutho ⁶¹ no kughamba,''Oyu katughuru ghana ghamba,'Aye kukona kuyipitha tembeli waNyambi no kudhitendurura mumayuwa mahatu.'' ⁶² Mupristeri shokuru ghemanine nokughamba kukwendi,''Kadi ghudi nodihuthero? Nye yi hana kushupa kuhatera kukoye?'' ⁶³ Ene Jesusi ghaporere. Mupristeri shokuru ghaghambire kukwagho,''Nakumurawera mwaNyambi gho muyumi, tutongwere ngeshi yowe Kristusi, Mwana Nyambi.'' ⁶⁴ Jesusi ghamuhuthire,''Ghuna yighamba ghothinda. Ene nakukutongwera, kutunda pano nanyi mwakumone Mwana Munu ghana hungumana kurudyo ro Ngcamu, nokwiya mumavuyi ghomudiwiru.'' ⁶⁵ Mukuru wapristeri ghadjadjure yitere yendi no kughamba,''Ghana ghamba dishawana! Nye twanyandera hashupi? Kenge, pano muna yuvu dishawana. ⁶⁶ Nye muna kughayara?'' Hahuthire no kughamba,''Gharoghera kufa.'' ⁶⁷ Hamuthipere murupara rwendi no kumupumura, kumumwashura nomanyara ghawo, ⁶⁸ no kughamba,''Tuporofite twe, owe Kristusi. Yidye yu ghana kupumura?'' ⁶⁹ Petrusi gha hungumane panunda dho dirapa, namurughani gho mukamadi ghamwiyere no kughamba,''Nowe wakarire naJesusi ghomuGalileya.'' ⁷⁰ Ene ghayikanane kughutho wagho wahe, ghughamba,''Kadi nadimuka eyi muna kughamba.'' ⁷¹ Apa ghayendire kuthero dhokushwaghera, murughani ghomukamadi ghamumonine no ghaghambire kowako,''Oyu katughuru ghakarire naJesusi wakaNazareth.'' ⁷² Ghayi kanane nokwedhera,''Kadi namudimuka yokatughuru!'' ⁷³ Kapupi kamanana awa hemanine heyire no kughamba kwaPeter,''Ghushemwa nowe karo yowe gho papagho, mundhira mughuna kughamba kuna kutapa ndhira.'' ⁷⁴ Noghatangire, kwedhera,'' kadi namudikuka yo katughuru,'' no popo ngondovoro kokudira. ⁷⁵ Peter ghavurukire manando ghaJesusi ghaghambire,''Kughutho gho kwiya ngondovoro nanyi ghunikanane me ruhatu.'' No ghayendire panunda nokadira noghupata.