¹ Parunguro mudiyuwa dyoSabata, apa dyatangire kutokera mukutamba diyuwa dyokutangera muthivike, Mariya Magdalena na Mariya ghumweya gheyire mukuna kenga mbira. ² Kenge, kwakarire kututuma komuve,kwamu engeli waFumu ghashurukire kutunda mudiwiru, gheyire no ghambindumune diwe, no ghahungumane po. ³ Mumonekero wendi wakarire yira mushoro, no yitere yendi yamonekire yira makerekeshe. ⁴ Hakengereri hakarire nowoma no hakarire yira hanu hokufa. ⁵ Muengeli yu ghatongwere hambuyama wa no kuwatongwera eshi,''Mwayapa, nayidimuka eshi Jesusi muna kushana, oyu hapamarera pathikurushe. ⁶ Kadi ghadipo pano, ene ghana yeyuka,thikadi ghayighambire. Mwiye no mumone mudyango mu Fumu hamurangekire. ⁷ Muyende wangu mukatongwere hakathishongero wendi,'Ghana vumbuka mwawafu. Mone, kuna kuyenda kughutho wenu kuGalileya. Okuya nanyimukamumone.' Mukenge, na mutongwera.'' ⁸ Hambuyama hathighire mbira nowoma no ruhafo, nohatjirire hakatongwere hakathishongero. ⁹ Mukenge, Jesusi ghawawanine no kughamba,''Mumoroke!'' Hambuyama heyire, hashimbire maghuru ghendi no kumutumera. ¹⁰ Jesusi ghawatongwere,''Mwayapa. Mukatongwere hakurwange hayende kuGalileya. Okuya nanyi hakanimone. ¹¹ Apa hakarire hambuyama kuna kuyenda,mukenge, hamwe hakengereri hayendire mudoropa no katongwera hapristeri kuyoyihe eyi yahokokire. ¹² Apa hahungumanine hakuru napristeri hakuyonge kwayo, hatapire masherenyi ghomengi kwawakayita ¹³ no kuwatongwera,''Mukatongwere hamweya,'Jesusi' hakathishongero heyire ghuthiku no kunedha yirama yendi oku twene tuna rara.' ¹⁴ Ngeshi yino yitundamo yikakume kwanunguru,nanyi tukutjindje no kumushwayitha yikudhekera yenu.'' ¹⁵ Podigho hakayita hashimbire masherenyi nokurughana thikadi ghawarawere. Yakuhanyine thikuma kwawaJews nokutwikera n dyarero. ¹⁶ Ene dikumi noyofotji hakathishongero hayendire kuGalileya, kudirundu oku ghawatongwere Jesusi. ¹⁷ Apa hamumonine, hamukughire, ene hamwe hatamangere. ¹⁸ Jesusi gheyire kukwagho noghaghambire eshi,''Mangcamu ghomahe ghaghanipa gho mudiwiru no pamuve. ¹⁹ Muyende podigho no mukatende hakathishongero mumatunga ghomahe. Mukawayoghe mudina dya Wihe, nodyaMwana, no dyaMupepo Ghokupongoka. ²⁰ Wahonge mukukutha yinu yoyihe eyi namurawera, mukenge,ame nenu naaranga kehepano, ngambi kughuhura gho mwaka.''