¹ Poro ruvedhe,Herodesi apa ghayuvire mbughi kuhatera Jesusi. ² Ghaghambire kwaharughani,''Oyu ne Johanesi gho Mukadiyoghero;ghana kapinduka muyifa. Podigho agha mangcamu ghana kurughana mumwendi.'' ³ KwaHerodesi gha kwatire Johanesi, kumughanga, no kumutura mukashitiko pamurandu waHerodias, muna mukurwendi Philip. ⁴ Kwa Johanesi ghaghambire kukwendi,''Kadi pathina muragho eshi ghukare nendi eshi didhiko dyoye.'' ⁵ Herodesi ghashanine kumupagha, ene ghayapire hanu, yoyishi hamturire eshi ayene muporofeta. ⁶ Ene apa Herodesi diyuwa dyendi dyomushamurukero dyeyire, mwana Herodias ghakinine mukatji no kuhafitha Herodesi. ⁷ Mukuhutha, ghakuruperithire no kwedhera mukutapa keheyino shogharombe. ⁸ Munyima dho kumurawera nyina, ghaghambire,''Nipe me pano, pakaronga, mutwi wa Johanesi gho Mukadiyoghero.'' ⁹ Fumu ghapatire kuyikumbera yi, ene pamurandu ghomedhero no pamurandu gho wahewahakire kumurarero nendi, gharawere eshi hakona kuyitenda kemo. ¹⁰ Ghatumine no kateta mutwi Johanesi gho mukadorongo. ¹¹ No mutwi wendi haghuretire nokughutapa kwamukamadi no ghaghutwarire kwanyina. ¹² Hakathishongero wendi heyire, hashimbire yirama, no kayivumbeka. Kutunda pa, hayendire no katongwera Jesusi. ¹³ Apa ghayiyuvire Jesusi yinu yi, ghatundire muwato no ghakarire kudyango dyopithendi. Apa dhayiyuvire mbunga, dhamukuthire pamapathi kutunda mumadoropa. ¹⁴ Jesusi ghana kumine kughutho wagho no ghamonine munga dhodhikuru. Ghakarire noruvedhe papagho no gherure hakorwi. ¹⁵ Apa weghire ghuthiku, hakathishongero heyiro no kughamba,''Odi dyango ne dya muveve, no diyuwa ne dinapu. Muthiye mbunga, podiyo hayende mumikunda no kaghura yidya yagho.'' ¹⁶ Ene Jesusi ghaghambire kukwagho,''Kadihanyanda kuyenda. ¹⁷ Muwape yimwe yokudya.'' Ghaghambire kukwendi,''Tudi ngenyu no maghuroto makwoko no thi dhiwadi.'' ¹⁸ Jesusi ghaghambire,''Muyirete kukwange.'' ¹⁹ Jesusi gharawere mbunga mukuhungumana pamuhonyi. Ghashimbire maghuroto makwoko no thi dhiwadi. Ghakengire kuwiru, ghakandadhekire no kugonyona ghuroto noghatapire kwawakathishongero wendi, no hakathishongero wendi hayitapire kumbunga. ²⁰ Wahe hadire no hakutire. No hashimbire eyi yathigharire noyipindhi yoyidya-yikote dikumi noyiwadi yayarire. ²¹ Awa hadire nehakarire kumayovi makwoko hanu, hakamadi nohanuke. ²² Popo ghaningire hakathishongero wendi hadhine muwato nokuyenda kughutho wendi kuthambodiya, oku yene kuna kutuma mbunga dhikayende. ²³ Apa ghamanine kutuma mbunga, ghayendire mumarundu pithendighakaraperere. Apa weghire ghuthiku, ghakrire ko pithendi. ²⁴ Ene wato wakrire kayenda no ndundu, kughuthindadheka mangumbi, no mupepo wapungura kuwatamba. ²⁵ Muviri dhoghune mughuthiku Jesusi ghayendire kukwagho, ghuyenda padikuruviya. ²⁶ Apa hamumonine hakathishongero wendi ghana kuyenda padikuruviya, yawatetukithire no kughamba,''Othi ne thirumba,'' no hadirire nowoma. ²⁷ Ene Jesusi ghaghambire kukwagho no kughamba,''Mukare no ghutjima! Yame! Mwayapa.'' ²⁸ Petrusi ghamuhuthire no kughamba,''Fumu, ngeshi yowe, nirawere me niyekukoye pameyu.'' ²⁹ Jesusi ghaghambre,''Wiye.'' Podigho Petrusi ghashwayire muwato no kuyenda pameyu ghayende kwaJesusi. ³⁰ Ene apa ghamonine Petrusi mupepo, ghayapire. Apa ghatangire kudhama, gha dirire no kughamba,''Fumu, ni ghamwene!'' ³¹ Jesusi popo ghaghorore dyoko dyendi, ghashimbire Peter, no ghaghambire kukwendi,''Amwe gho ghupu matawero,nye mwakutamangera?'' ³² Apa Jesusi na Petrusi hayendire muwato, mupepo washayekire kupunga. ³³ Podiyo hakathishongerohatangire kumukughaJesusi no kughamba,''Ghushemwa gho Mwana Nyambi.'' ³⁴ Apa hatjinane, heyire pamukunda Gennesaret. ³⁵ Apa hanu hakarire padyango hadimukire Jesusi, hatumine mambudhi kehekuno mumangoagha ghakundurukedhe dyango diya, nohakamuretere wahe wahakarire tjitju. ³⁶ Hamukumbere eshi ghakwate kughuhura ghothiwata thendi, thingi thowa hakwatireko herukire.