¹ Podigho haPharisee no hakamarukwaro heyire kwaJesusi kutunda kuJerusalem. Haghambire, ² ''Nye hakathishongero ghoye hana kureghera thitjo thawakuru? Kadihakuyoghanga kunyara pakudya.'' ³ Ghawahuthire no kuwatongwera wo,''Yipi muna regheranga miragho dhaNyambi pamurando gho thitjo thenu? ⁴ Nyambi ghaghambire,'Kutekere wiho nanyoko,' no 'Kehe yu gho kughamba dishawana kwawihe endi nyina nanyi ghakufe.' ⁵ Ene mwe kughamba,'Kehe yuno ghokughamba kwawihe nanyina,''Keheghano maghamweno mwawana kukwange ne yitapera yaNyambi,'' ⁶ oyo munu mbad ghanyanda kufumaneka wihe.' Mundhira dhi muna kanunutha nando dhaNyambi pamurandu gho thitjo thenu. ⁷ Amwe mwahayidena! Thiwana Isaiah ghapumbire yokuhatera mwe apa ghaghambire, ⁸ 'Awa hanu hakutekera me no miromo, ene mutjima dhadho ne kayenda nange. ⁹ Hana nikugha nga munyaranyara yoyishi awo kuhonga kukutha muragho dhohanu.'''' ¹⁰ Ghethire mbunga kukwendi no kughamba kukwagho,''Tegherere no tjwathane- ¹¹ kadiko thokungena mukanwa thokuyiitha munu. Ene, yokutunda mukanwa, yoyayipitha munu.'' ¹² Hakathishongero heyire nokuna ghamba kwaJesusi,''Ghuna dimuka eshi haPharisee hapatire apa hayuvire yi?'' ¹³ Jesusi ghawahuthire no kughamba,''Kehe thino thitondo ethi ghadhira kutapeka Tate ghomudiwiru nanyi hakuthidhure. ¹⁴ Muwathiye pathagho, hafa meho wohapiteri. Ngeshi mukunga ghapiterera mukunga muyendhendi, wahe hana kawera mudikwina.'' ¹⁵ Petrusi ghahuthire no ghaghambire kwaJesusi,''Thothone matadhi gha kukwetu.'' ¹⁶ Jesusi ghaghambire,''Namwe karo kadiko matjwathaneno? ¹⁷ Kadi mwamona eshi keheyino yokungena mukanwa kupita mudipumba nokashwagha mukasayise? ¹⁸ Ene yinu yashwaghanga mukanwa kutunderera kumutjima. Eyi yoyayipitha munu. ¹⁹ Kumutjima kokwatunda yighayara yoghukore, ghupayi, kunyatjipera, rungu, widhi, ghushupi ghombango, no kukughuritha. ²⁰ Eyiyoyayipitha munu. Ene kudya no nyara dyokudhira kukuyogha kadi yayipitha munu.'' ²¹ Jesusi ghatundirepo no ghatundiremuditunga ghatambe mumadoropa gha Tyre naSidon. ²² Mukenge, mukaCanaanite mbuyama ghashwayire mumukunda ghuya. Gha kuyerere no kughamba,''Kare nothinyeke papange, Fumu,Mwana David! Mwanange ne ghuna mumunu mupepo ghoghumango.'' ²³ Ene Jesusi ghamuhuthire no nando temba. Hakathishongero wendi heyire no kumukanderera, ghughamba,''Mutume ghakayende, aye kuna kukugherera yatwe.'' ²⁴ Ene Jesusi ghawahuthire no kughamba,''Kadi hanituma kwakeheyuno kutundithako ndjwi dhokuyongara mundhugho dhaIsrael.'' ²⁵ Ene gheyire no kuna munyongamena kughutho wendi, ghughamba,''Fumu, ni ghamwene.'' ²⁶ Ghahuthire no kughamba,''Kadi yarogha kushimba ghuroto ghomwanuke no kughuvukuma kutumbwaghana.'' ²⁷ Ghaghambire,''Kemo,Fumu, ene ngambi tumbwaghana kudya yigonyogonyo yokutunda kwahakuru' matishi.'' ²⁸ Jesusi ghahuthire no kughamba kukwendi,''Mbuyama, ghukuru ne matawero ghoye; ninge ghayikutendere thikadi ghuna yishana.'' Mwanendi gho mukamadi gherukire kutunda modhiya viri. ²⁹ Jesusi ghatundire padyango no kuyenda pepi nodikuruviya dyaGalileya. Ghayendire pandundu no kahungumana. ³⁰ Mbunga dhodhikuru dheyire kukwendi. Haretire hokupira kuyenda, hakakufa meho,hotete, harema, no hengi awa hakarire tjitju. Hawa neghedhire kumaghuru ghaJesusi, no ghawerure. ³¹ Mbunga dhahafire apa dhamonine hakakudhira kughamba kuna kughamba, hakakudhira kuyenda haroyire, hakakudhira kuyenda hayendire,no hakunga hamonine. Hatumere Nyambi waIsrael. ³² Jesusi ghethire hakathishongero wendi no kughamba,''Nakara no neke kumbunga yoyishi hana kara nange mayuwa mahatu no kadiko yokudya. Kadi nakushana kuwatuma oku kadi hanadi, kukona hapwerere mundhira dhagho.'' ³³ Hakathishongero hamutongere,''Kupi kokukona tuwane ghuroto mudyango dyomuveve mukukutitha mbunga dhodhikuru dhi?'' ³⁴ Jesusi ghaghambire kukwagho,''Mangatji maghuroto mudi nagho?'' Hamuhuthire,''Kwoko nomawadi, no thi dhodhipu dhodhimbiru.'' ³⁵ Jesusi gharawere mbunga mukuhungumana pamuve. ³⁶ Ghashimbire maghuroto dikumi ghomawadi no thi, no pakumana kutapa ndangi, ghayondaghure ghuroto no ghatapire kwakathishongero. Hakathishongerohatapire kumbunga. ³⁷ Hanu hadire no wahe hakutire. No hakongawedhire yikote kwoko noywadi yokuyara yigonyo gonyo yoyi yathigharireko. ³⁸ Awa hadire ne hanu mathere mane, hakamadi nohanuke. ³⁹ Jesusi ghatumine mbunga dhikayende no ghengenine muwato no kuyenda muditunga dyaMagadan.