¹ Diyuwa dyo Jesusi ghashwayire mudighumbo no kuyenda no kahungumana kumbadi dho dikuruviya. ² Mbunga dhodhikuru dhakonganina kukwendi, ghengenine muwato no kuhungumana oku mbunga dhinemana padiya. ³ Jesusi ghaghambire yinu yoyingi kukwagho mumatadhi. Ghaghambire,''Mukenge,ndjimi ghsyendire mukakuna mbuto. ⁴ Apa ghakunine, dhimwe mbuto dhawerere kumbadi dhondhira, ene yinyunyi yeyire no kudhingomaghura. ⁵ Dhime mbuto dhawerere mumawe, kadi dhawanine muve mwene. Popo dhakukutire yoyishi muve kadi wadhungire. ⁶ Ene apa dyavire diyuwa, dhakukokere yoyishi kadi dhakarire no mudhi, no dhakukutere. ⁷ Dhimwe mbuto dhawerere mumakona. Makona ghakurire no kudhingambwera. ⁸ Dhimwe mbuto dhawerere mumuve ghoghuwa no dharetire yimenwa, yira dithere dyofotji ruvedhe rorwingi, rumwe makumikwoko nodyofotji, no rumwe makumi mahatu. ⁹ Kehe yuno ghakara no matwi, ghayuve.'' ¹⁰ hakathishongero hayire no kuna ghamba kwaJesusi,''Nye ghuna kughambera kumbunga mumatadhi?'' ¹¹ Jesusi ghawahuthire no kuwatongwera wo,''Ghamupa nako dho kutjwathana yoyihe yokuhatera kughufumu gho diwiru, ene kukwagho kadi gharuwapa. ¹² Keheyuno hapa yoyingi, no nanyi ghakare no matawero. Ene keheyuno ghapira, ngambi eyi ghadi nayo nanyi hakuyimushimbe. ¹³ Eyi ne yonaghamberanga mumatadhi: Ngambi kenge hana kumona, ene kadi hana kumona; no ngambi kenge hana kuyuva, kadi wakuyuva, endi kutjwathana. ¹⁴ Kukwagho yiporofeta yaIsaiah ghayikumithamo, eyi yaghamba,'Oku kuyuva nany mwakuyuve, ene amwe mbadi mwakutjwathana;no kumona nanyi mwakumone, no kadi mwakuyimona. ¹⁵ Owa hanu dhimutjima dhagho ne dhinayerupa, no ghukukutu kuyuva, nohana yandhera meho ghawo, no kadi hakona kumona nomeho ghawo, endi kuyuva no matwi ghawo, endi kutjwathana no mitjima dhagho, no nanyi hakuhuke karo, no nanyi ni werure.' ¹⁶ Ene kutungeka ne meho ghenu, ghagho ne kumona; no matwi ,agho ne kuyuva. ¹⁷ Ghushemwa nakumutongwera eshi thingi thawaporofeta nohahungami hanu hahaka kumona yinu mwamonanga no kadi wakuyimona. Hahaka kuyuva yinu yimwayuvanga ene kadi hayiyuva. ¹⁸ Mutegherere kumatadhi gha ndjimi yu ghakunine mbuto. ¹⁹ Ngeshi ghumwe hayuvu nando dhoghufumu ene kadi wakudhitjwathana, muyipithi kwiya no kunadhitjombora edhi hanakunu mumutjima. Edhi ne dhombuto edhi ghakunine kuthitavura. ²⁰ Eyi hakunine payikarawe ne munu gho kuyuva nando ndani popo kudhitambura noruhafo, ²¹ ene yene kadiko mudhi papendi kudhirughanitha kamanana. Pakwiya ghukukutu no mapangwero pamurandu gho nando, aye wangu kuwa. ²² Eyi hakunine mumakona, oyu ne mnu ghokuyua nando, ene ghukareri ghokaye no ghuhongaghuri ghoghutungi kutjomongora nando, no mbadi wakureta mbuyo. ²³ Mbuto dhiya hakunine mumuve ghoghuwa, oyu ne munugho kuyuva nando no kudhitjwathana. Kureta mbuyo no kureta yimenwa, kureta yo mu diyovi, pamwe mu makuni kwoko nodyofotji, endi mumakumi mahatu rorwingi momu hayikunine.'' ²⁴ Jesusi ghawapire ditadhi dimweya. Ghaghambire, ''Ghufumu gho diwiru ne yira katughuru yu ghakunine mbuto dhodhiwa mudipya dyendi. ²⁵ Ene oku hanu hana rara, munyathi gheyire no kuna kuna ghuruwa mukatji komavumbukiro nohakayendire. ²⁶ Apayakurire no kureta yimenwa yadho, ghuruwa wamonekire nagho. ²⁷ Harughani hathinda shadipya heyire kukwendi n kuna ghamba kukwendi,'Ghodikuto, kadi wakunine mbuto dhodhiwa mudipya ndi? Ngepi ediyina kara yimuhonyi?' ²⁸ ''Ghawatongwere, 'Munyathi ghayitenda yi.' ''Harughani hamutongwere,'Ghuna shana tuyende to kayidhuremo ndi?' ²⁹ Thinda shadyango ghaghambire,'Ka. Yoyishi apa muna kudhura ghuruwa, kukona mudhire mavumbukiro nagho. ³⁰ Muninge yikure pofotji kate nako dhokukesha. Panako dhokukesha nanyi nakughambe kwakakukesha,''Pakutanga kutundithamo ghuruwa no kughughanga no kughutumekera, ene mukongwedhe mavumbukiro mukashete.'''''' ³¹ Jesusi ghawapira ditadhi dimwe kukwagho. Ghaghambire,''Ghufumu ghodiwiru ne yira dimbuto edi ghashimbire katughuru nokudikuna mudipya. ³² Dimbuto di ne dyodimbiru mumbuto dhodhihe. Ene apa dyakurire, dyakariredikuru kupire yimenwa yoyihe yomunyamo. Dyakutjindjire thitondo, podiyo eshi yinyunyi yomumupepo yakwiye no kunatenderako yitunguru kumite dhatho. ³³ Jesusi ghawatongwere mumatadhi,''Ghufumu gho mudiwiru ne yira yifudhumukitha yiya mbuyama ghokushimba no kuyitura mukumeta yihatu yo mushungwa kate ghuna nanumuka.'' ³⁴ Kehe yino Jesusi ghaghambire kumbunga mumatadhi; no ghaghambire kadiko kupira matadhi. ³⁵ Eyi pamurandu ghoyi haghambire kupitera mwamuporofeta yikeye mughushemwa, apa ghaghambire,''Nanyi niyandhure kanwa kange mumatadhi. Nanyi nighambe yinu yoghudhindo kutunda kununderero dhokaye.'' ³⁶ Jesusi gha thighire mbunga noghayendire mundhugho. Hakathishongero heyire no kughamba,''Thothonone matadhi gho ghuruwa mudipya.'' ³⁷ Jesusi ghawahuthire no kughamba,''Kehe yuno gho kukuna mbuto dhodhiwa ne Mwana Munu. ³⁹ Dipya ne kaye;no mbuto dhodhiwa ne hana ghoghufumu. Ghuruwa ne hana wawahayidena, ³⁸ no hanyathi waya hakakunine ghuruwa ne hayi. Mukesho ne ghuhura gho myaka,no hakeshi ne ha engeli. ⁴⁰ Podiyo, ngeshi ghuruwa hanaghupongeka no kughutumekera no mudiro, dyo yakuhokoka kughuhura gho mwaka. ⁴¹ Mwana Munu nanyi ghakutume ha engeli, nanyi hakukongane panunda dhoghufumu ghoyoyihe yiyareta maharwero nowa harughananga yoyimango. ⁴² Nanyi hakuwavukumene mumudiro, no mbohana diri no kukukwetjura mayegho. ⁴³ No hahungami mbohana rwedhima yira diyuwa mughufumu wa Wihe. Kehe yu ghakara no matwi, muninge ghayuve. ⁴⁴ ''Ghufumu gho mudiwiru wakara yira ghuwa ghuya hahoreka mudipya. Katughuru kuyiwana no kuyihoreka. Muruhafo aye kuyenda,kughuritha yoyihe yi ghakara nayo, no kughura dipya diya. ⁴⁵ Ndani, ghufumu gho diwiru ne yira katughuru ya gho mughurithi, ghakushana makunde. ⁴⁶ Pakuwana dikunde dyofotji no mudyo ghoghukuru, ghayendire no kaghuritha yoyihe yi ghakara nayo no kadighura. ⁴⁷ ''Karo, ghufumu ghodiwiru ne yira dikwe diya havukumene mudikuruviya, no kakwata keheyino yinu yokehe rudhi. ⁴⁸ Apa dyayarire, haroveri hadi kokere kudiya. Hahungumane no hatorore yinu yoyiwa muthitere, ene yokupira mudyo hayivukumine. ⁴⁹ Dyoyakukara kughuhura gho mwaka. Ha engeli nanyi hakwiye mukuna taghura harodhi kwawahunga. ⁵⁰ Nanyi hakuwavukumene mudirara dyo mudiro, oku hakadira no kukukwetjura mayegho. ⁵¹ ''Muna tjwathana yoyihe yi?'' Hakathishongero haghambire kukwendi,''Yi." ⁵² Podiyo Jesusi ghaghambire kukwagho,''Podigho keheyuno mukamarukwaro ghoyu ghana kara eshi mukathishongero mughufumu ghodiwiru ne yira katughuru yu ghadi eshi thinda sha dighumbo, oyu ghana kushwayitha yinu yoyikurukuru no yinu yoyipya kutunda muyiwana.'' ⁵³ Noyeyire paya Jesusi ghana mana matadhi, ghatundire padyango diya. ⁵⁴ Podigho Jesusi ghengenine mumukunda wendi no kuhonga hanu mumasynagogue. Yitundamo neyawatetukithire no kughamba,''Kupi yu katughuru ghawana ngcamu no yitetukitha? ⁵⁵ Oyu katughuru ne kadi mwana mukakutenda mayugho? Nyina ne kadi yoMaria? Kadi hakurwendi haJames, Joseph, Simoni, na Judasi? ⁵⁶ Hakurwendi hohakamadine kadi netu hadi? Kupi ghawana yinu yoyihe yi?'' ⁵⁷ Ghawa patithire ye. Ene Jesusi ghaghambire kukwagho,''Muporofeta ne kadi yu gho kupira dikuto kutundithako muditunga dyendi no diko dyendi.'' ⁵⁸ Kadi ghatendire yitetukitha yoyingi pamurandu ghokupira matawero.