¹ Ene Saulusi, oku shime haghamba yokuthineneka kupagha haka thishongero waFumu, ghayendire kwamupristeri ghomukuru ² no kamwipura mambapira ghomumasinagoge ghomu Damasikusi, podigho eshi ngeshi ghakawane kehe yuno ghahatera kundhira, yikare katughuru ndi mbuyama, ghana kawareta munwato muJerusalema. ³ Oku muruyendo ghadi, yahokokire ngeno eshi pakukokera kuDamasikusi, popo vene thamusheghenyene thishe thokudiwiru; ⁴ no ghawire pamuve noghayuvire diywi dina kughamba kukwendi eshi, ''Saulusi, Saulusi, pashanye ghuna kunikutha kuthera?'' ⁵ Saulusi ghahutha eshi; ''Yowedye, Fumu?'' Fumu ghaghambire eshi; ''Yame Jesusi, oyu ghuna kukuthakutha; ⁶ ene wimane, wingene mumbara, nonanyi hakayikutonwere eshi yinu munye shokakone kutenda.'' ⁷ Katughuru yu ghayendire na Saulusi ghemanine noghapirire yokughamba, kuyuva diywi ene mbadiko ghokumona. ⁸ Saulusi ghemanine po pamuve, nopa ghayandhurure meho ghendi, mbadi ghakonine kumona kehe thino; hamukokire kudyoko no hamuretire muDamaskusi. ⁹ Ghakarire mayuwa mahatu mbadi wakumona, mbadi ghadire nokunwa temba. ¹⁰ Pakarire mukathishongero muDamasikusi ghodina Ananiyasi. Fumu ghaghambire nendi muyimona meho, ''Ananiyasi!'' ghaghambire, ''Mone, yameno Fumu.'' ¹¹ Fumu ghaghambire kukwendi, ''Wimane, ghuyende murukanda ru hana kutoya eshi Strayiti, no kundhugho dha Judasi kepure katughuru ghoku Tarsiusi ghodina Saulusi, kuraperera ghana kuraperera. ¹² Ghanamono muyimona meho katughuru ghodina Ananiyasi ghanakwiya nokukambeka moko ghendi papendi, podiyo eshi ghakone kumona karo. ¹³ Ene Ananiyasi ghahuthire eshi , ''Fumu, nayuva kwawengi yo kuhatera murume yu , yoyingi ghayipitha kwahanu ghoye hokupongoka mJerusalema. ¹⁴ Aye ghawana mangcamu ghokutunda kwawa pristeri hashokuru mukukwata keheyuno pano ghana kwitha mudina dyoye. ¹⁵ Ene Fumu ghamutongwere eshi , ''Yende, ghapwa kutorora mukukara thirughanitha thange , ghatware dina dyange kughutho wawa hayidena nawa fumu , nawanuke ghomu Israelite . ¹⁶ Mbona muneghedha eshi ngepi ghakunyanda pamurandu ghodina dyange .'' ¹⁷ Ananiyasi ghashwayirepo, no kengena mundhugho. ghakakambekire moko ghendi papendi no ghaghambire eshi, ''Muyendhange Saulusi, Fumu Jesusi, oyu ngakuhokokera mundhira apangawiya, yana nitumu podiyo eshi,'' ghukone kumona no ghuyare na mupepo ghokupongoka. ¹⁸ Popo vene yinu yokupitura yira nadhi yawire mumeho gha Saulusi, ghatangire kumona, ghemanine noghapwire kuyogha. ¹⁹ No ghadire yidya no yamutanarithire. Ghakarire mayuwa ghongandji nawa kathishongero mu Damascusi. ²¹ Popo vene ghatangire kuyuvitha Jesusi mumasinagoge, ghughamba eshi ayene mwana Nyambi. ²⁰ Wahe awa hamuyuvire yawa tetukithire no haghambire eshi, ''Oyune mbadi yoyu murume ghahanyaghuranga haka Jelusalema awa ngahatoyanga dina di? Ngeya mukuna wa kwata no kuwa twara kwawa pristeri hashokuru ²² Ene Saulusi gheyire no ngcamu thikuma . No gharetedherire toko-toko mukatji kawa Juda awa hatungire muDamascusi pakuneghedha eshi Jesusi ne Kristusi. ²³ Munyima dhomayuwa ghomengi, haJuda hakuyuvire pofotji mukamupagha. ²⁴ Ene dighano dyawo dyayuvekire kwa Saulusi. Ngakevereranga kumivero mutenya noghuthiku nothitambo thokumupagha ²⁵ Ene hakathishongero wendi hamushimbire ghuthiku, no hamughurumune panunda dhodikuma muthikote. ²⁶ Apa ghakumine mu Jerusalema, saghulusi ghakondjire kukupakerera nawa kathishongero, Ene waheya hamuyapire, mbadi hayitawire shi mukathishongero. ²⁷ Ene Barnabasi gha mushimbire no ghamutwarire kwa hapostoli. No ghawa hatongwere eshi ngepi di ghamonine Saghulusi Fumu, okuyene mundhira, no yi gha ghambire kwendi, Saghulusi ghayuvithere muDamascusi no ghudhughutjima mudina dya Jesusi. ²⁸ Ghakarire nagho, kushwagha no kuhuka mu Jerusalema. Ghaghambire noghudhughutjima mudina dya Fumu Jesusi. ²⁹ No hakukananine nawa Juda gho hahirika; ene shime ngahakondjanga hamupaghe. ³⁰ Apa hayiyuvire hapostoli hayendhendi hamuretire ku Caesareya no hamutimine ku Tarsius. ³¹ Kundunda pa, ngirishe muJudeya, Galileya no muSamaria mwakarire no thiraro no thakurire; Haparire mukuyapa Fumu no mumahengawiro ghamupepo ghokupongoka, no ngirishe dhakurire muthitara ³² Kemo yahokokire eshi, panga yendanga Peturusi kumango ghomahe, gha keyire shime karo kwawanu haNyambi hokupongoka awa hatungire mudoropa dha Lydda. ³³ Oku ghakawanine murume ghumweya gho dina Aeneyasis, oyu ghakarire pa thiraro ghure gho myaka kwoko nodhihatu, noyikorwa yokughara. ³⁴ Petrusi ghaghambire kukwendi eshi, ''Aeneyas, Jesusi Kristusi ghakwirukithe. Wimane no yare ghudidi ghoye,'' popo ven ghemanine. ³⁵ Wahe wa hatungire mu Lydda nomu Sharoni, hamumonine katughuru yu no hapirukire kwa Fumu. ³⁶ MuJoppa mwa karire mukathishongero ghumweya ghodina dyo Tabitha (odi hapathurura eshi ''Dorcasi''). Mbuyama yu ghayarire thikuma noyirughana yoyiwa no yitenda yothinyeke oyi gharughanine kwawahepwe. ³⁷ Yakarire ngeno eshi mumayuwa gha ne ghakorwire no kufa; Apa hamuyoyire, hakamuturire mungonda dhokuwiru. ³⁸ Mukukara shi Lydda ne pepi naJoppa, nohakathishongero hayuvire eshi Petrusi ne moghadi momo, hatumine hatutughuru hawadi kukwendi, hakamukumbere eshi; ''Wiye kukwetu mukupira kukuranga.'' ³⁹ Petrusi ghemanine noghayendire nawo. Apa ghanakumine, hamuretire mungonda dhokuwiru, no hadidhi wahe hemanine pepi nendi ghudira, ghumuneghedha yivata no mapurapure agha ghatendire Dorcasi apa ghakarire nawo. ⁴⁰ Peetrusi ghawashwayithiremo wahe mungonda, ghatongamene, nogharaperere; ghapirukire kuyirama, ghaghambire eshi, ''Tabitha, wimane.'' Ghoghayandhurure meho ghendi, mukumona Petrusi, ghahungumanine. ⁴¹ Petrusi ghamupire dyoko dyendi noghamwimekire; no apa ghethire hanu waNyambi hokupongoka nohadidhi, ghamuneyire kukwawo mughuyumi. ⁴² Thihokoka thi thapupanine muJoppa ghomuhe, no hanu hohengi hatawire mwaFumu. ⁴³ Yahokokire ngeno eshi Petrusi ne ghakarire mayuwa ghomengi muJoppa nakatughuru ghodina Simoni, ghomunyuki yikumba.