¹ Ndani pakarire katughuru ghongandji munurumbara dhaCaesareya, Corneliusi padina mupiterithi ghomashurundate awa ngahethanga eshi hakaItali. ² Ghakarire katughuru ghodikuto, ghoyu ghayapire Nyambi nawakadighumbo dyendi dyodiheya, ghatapire manyinga ghomengi kwawakakunyanda no gharapere kwaNyambi kehe pano ³ Paviri dhoghukwoko noghune dhodiyuwa, ghamonine thiwana muthimona meho muengeli waNyambi ghana kwiya kukwendi. Muengeli ghaghambire kukwendi eshi; '''Cornelius!'' ⁴ Cornelius ghanungurukire muengeli no ghayapire thikuma nokughamba eshi; ''yinu munye mukadikuto?'' Muengeli ghaghambire kukwendi eshi; mandapero ghoye nomaghamweno ghoye kwawahepwe ghanayendi muwiru ghakakare mavurukero ghothitapera thitapera kughutho waNyambi. ⁵ Pano keho tume keho hatutughuru kunurumbaraa dhaJoppa hakarete katughuru ghodina Simon ghoyu hana kwitha eshi Petrusi. ⁶ Aye kuna kutunga namukakutenda yikumba, oyu dhakara ndhugho dhendi kudikuruviya.'' ⁷ Apa ghatundirepo muengeli yu ghaghambire nendi, Cornelius ghethire hawadi hopawapika homudighumbo dyendi, no dishurundate dyo pawamwe wa hamughamwenanga. ⁸ Corneliusi ghawatongwerire yoyihe eyi yahokokire nokuwatuma kuJoppa. ⁹ Mudiyuwa dyo kurandako paviri dhoghukwoko nodhofotji, oku muruyendo rwawo no kuna kukokera mumbara, Petrusi ghayendire mundhugho dhokuwiru ghakaraperere. ¹⁰ Ghakayuvire ndhara noghashanine yokudya, ene oku hanu hamwe kunakutereka yidya, hamupire thimona meho, ¹¹ no ghamonine diwiru dinayandhuruka noghamonine thipungwero thongandji thina kughurumuka, thinu yira dikehe dyodikuru dina kwiya pakaye, ghuthighurumuna pamashonga ghatho mane. ¹² Mumwatho mwakarire yiyama yoyihe yomaghuru mane noyinu yokukokawa pamuve, noyinyunyi yomuwiru. ¹³ Ndani diywi dyaghambire kukwendi: ''Wimane, Petrusi, paghe nodye.'' ¹⁴ Ene Petrusi ghambire eshi, ''Mbadi kemo fumu; mbadi nadya rumweya thokunyata nothokupira kukushuka.'' ¹⁵ Ene diywi dyeyire kukwendi karo roghuwadi: ''Eyi ghatenda Nyambi ghukushuki, mbadi wakona kuyitha eshi yanyata.'' ¹⁶ Oyi yahokokire ruhatu; ndani thipungwero thi popo vene hathihuthire mudiwiru. ¹⁷ Ndani okushime ghakarera Petrusi mudidhongiri kuhatera eshi ngoyinu munye yina kutongora kukwendi yinu yi ghamonine muthimona meho thi, kapupi kamanana, hatutughuru wa ghatumine Cornelius hemanine kuthero dhodhikuru, apa hawanine matawedhero kumengeneno mundhugho. ¹⁸ Hethire nohepurire ngeshi moghadi Simon, ghoyu hethire eshi Petrusi, oyu ghatungire mo. ¹⁹ Oku shime Petrusi haghayara kuhatera kuthimomna meho thi, mupepo waghambire kukwendi eshi; ²⁰ ''Mone, hatutughuru hahatu hanakukushana, wimane ghughurumuke nokayende nawo. Wakuranga mukuyenda nawo yoyishi yame nawatumu.'' ²¹ Petrusi ghawaghurukere hatutughuru wa no ghaghambire eshi; '' Yame munakushana, pashanye muneghera?'' ²² Ha ghambire, ''Mukuru wamashurundate ghodina Corneliusi, murume ghomuhungami noghumwe yu ghayapa Nyambi, ndani hamughamba thiwana mumako ghomahe ghawaJuda , muengeli ghokupongo waNyambi ghamutongwere ghakwithe ghuyende kundhugho dhendi, podiyo ghakateregherere kumbudhi dhokutunda kukoye.'' ²³ Petrusi ghawethire hangene hakakare nendi, ndani mathikuthi ghokurandako ghemanine noghayendire nawo, no hatawi hamwe hokuJoppa hakupakerere nendi. ²⁴ Mudiyuwa dyo kurandako hanakumine hanakumine kuCaesareya. Corneliusi ghawataterere; ghethire waheya hapendi nawashere wendi. ²⁵ Yakarire ngeno eshi apa ghengenine Petrusi, Corneliusi ghakuwanine nendi noghawererire kumapadhi ghendi nokumukugha. ²⁶ Ene Petrusi ghamughamwenine ghemane ghuninga eshi, ''Wimane! name nomunu.'' ²⁷ Oku Petrusi kuna kughamba nendi, ghayendire mwishi noghakawanine hanu hohengi hana pongo pofotji. ²⁸ Ghakaghambire kukwawo eshi; ''Namwe mwathinda mwayidimuka eshi mbadi yakara pamuragho kwamunu ghomuJuda ghakupakerere nokadhingura kehe yuno ghomuditunga dimweya. Ene Nyambi ghananineghedha eshi mbadi nakona kwitha keheno munu eshi ghanyata endi mbadi ghakushuka. ²⁹ Yonakeyera ghupira kukanana, apa munanitumena. keho nakumwipura eyi munanithera.'' ³⁰ Corneliusi ghaghambire eshi; ''Mayuwa mane ghanakapita muviri dhodhi, naraperere paviri dhoghukwoko noghune mundhugho dhange; namonine katughuru ghemanine kughutho wange muyitere yokutwedhima. ³¹ Ghaghambire eshi; 'Corneliusi, ndapero dhoye ne dhinapu kuyuvera kwaNyambi, no yitapa yoye kwawahepwe ne yina muvurukitha Nyambi kuhatera koye. ³² Tume hamwe kuJoppa , nohakakwithere katughuru ghodina Simon yu hetha eshii Petrusi. Ghatunga mudighumbo dya mutendi yikumba ghodina Simon kudikuruviya.' ³³ Popo vene podiyo nakutumene. Yinahungama ghunakeya. Pano keho twaheya tudi kughutho ghomeho ghaNyambi mukuyuva yoyiheya eyi ghakurawera Fumu mukughamba.'' ³⁴ Ndani Petrusi ghayandhurure kanwa kendi nokughamba eshi; '' Ghushemwa, nadimuka eshi Nyambi mbadi ghashimba mutara wamunu ghofotji. ³⁵ Ene, mumatunga ghomaheya kehe yuno ghamuyapa nokutenda ghuhungami ne ghamana kumutambura. ³⁶ Mwadimuka mbudhi odhi ghatumine kohanu waIsraeli, apa ghayuvithire mbudhi dhodhiwa dhothiraro kupitera mwaJesusi Kristusi, ghoFumu wawahe- ³⁷ namwe mwathinda mwadimuka yihokoka yoyihe yi yahokoka oyi yakarire muJudeya ghomuheya, kutangerera muGalileya, munyima dhodiyoghero edi ghayuvithire Johannesi; ³⁸ yihokoka kuhatera Jesusi ghomukaNasareti, edi ghamutororire Nyambi no Mupepo Ghokupongoka nongcamu dhendi. Ghayendire ghurughana yoyiwa nowirukitha wahe awa ghanyika shadipinyi, naNyambi ghakarire nendi. ³⁹ Twashupi twaheya kuyinu yoyiheya yi ghatendire Jesusi, kokuheya muditunga dyawaJuda nomuJerusalema. Hamupayire pakumukureka kuthitondo, ⁴⁰ ene Nyambi ghamuyeyurire mudiyuwa dyoghuhatu nokumutenda hamumone, ⁴¹ mbadi hanu waheya ene kwawashupi wa ghatororire Nyambi kughutho ghoyinu yi- natwe twadire nokunwa nendi munyima dhokuvumuka mwawafu. ⁴² Haturawerire mukughamba kwawanu no kunongonona eshi oyu ne yodiye ghatorora Nyambi mukukara mupanguri wawayumi nawafu. ⁴³ Kukwendi haporofeta wahe hatapa ghushupi, podiyo eshi kehe yuno ghokutawa mumwendi mbo ghanawana mathiyerero ghomaharwero kupitera mudina dyendi.'' ⁴⁴ Oku shime Petrusi haghamba yinu yi, Mupepo Ghokupongoka wawerere pa wahe wa haterere kumbudhi dhendi. ⁴⁵ Hanu wa hahaterire kumbunga dhomakyeneno ghawatawi- wahe wa heyire naPetrusi- hatetukire, yoyishi Mupepo Ghokupongoka ghaghukumwene karo nopawahayidena. ⁴⁶ Awo hayuvire hahayidena wa hana kughamba mumandimi ghamweya ndani ghushogherera Nyambi. Petrusi ghoghahuthire eshi; ⁴⁷ ''Kukona ghumwe ghashweneke meyu ko hanu wa eshi mbadi hapwe kuyogha, hanu wa hatamburire Mupepo Ghokupongoka yira kenge twe?'' ⁴⁸ Ghoghawarawerere hapwe kuyogha mudina dya Jesusi Kristusi. Ghohamwipurire mukukara nawo mayuwa ghongandji.