¹ Hapostoli nohatawi hamweya wa hakarire muJudeya hayiyuvire eshi hahayidena nawo hatmburire nando dhaNyambi. ² Apa eyire Petrusi muJerusalema, awa hahatererire kumbunga dhawakamakyeneno hamuningaghurire; ³ haghambire eshi, ''Ghunakukara nawatutughuru ghokupira kukyena nokudya nawo!'' ⁴ Ene Petrusi ghatangire kuwatjwathanitha yinu yi mukuyarerera, ghughamba eshi, ⁵ ''Naraperere mu muthitata thaJoppa, nakarire nothimona ethi namonine thipungwero thakughurumuka, yira dikehe dyodikuru hana kughurumutha kutunda kudiwiru mumashonga ghadyo mane. Thanighurumukere. ⁶ Nathikengururire nokuthighayara. Namonine yiyama yomaghuru mane yopamuve, yishereka yomumuthitu, yiyama yokukokawa, noyinyunyi yomuwiru. ⁷ Ghonayuvire diywi dina kughamba kukwange eshi; ' Wimane, Petrusi; paghe nodye!' ⁸ Naghambire, eshi; mbadikemo Fumu; mbadiko thokupira kupongoka endi thokunyata thangena rumwe mukanwa kange.' ⁹ Ene diywi dyahuthire karo kutunda mudiwiru, eshi ''Oyi ghatenda nyambi ghukushuki, mbadi wakona kuyitha eshi yanyata.' ¹⁰ Oyi yahokokire yikandho yihatu pohayihuthire mudiwiru. ¹¹ ''Kapupi kamanana, hatutughuru hahatu hemanine kughutho ghondhugho dhi twakarire; hapwire kutuma kutunda kuCaesareya kukwange. ¹² Mupepo wanirawererire mukuyenda nawo, eshi mbadi nakoka kuteta nanani kukwawo. Owa hatawi kwoko noyofotji hayendire nange, no twayendire mundhugho dhakatughuru. ¹³ Ghatutongwerire edi ghamonine muengeli ghemanine mundhugho dhendi no kughamba eshi; ''Tume hatutughuru kuJoppa no mukarete Simoni yu hetha eshi Petrusi. ¹⁴ Ghana kughamba kukoye mbudhi odhi dhakukughamwena- nowe nawakadighumbo dyoye.'' ¹⁵ Apa namukandererire mukughamba kukwawo, mupepo ghokupongonga weyire papawo, yira kenge papetu kumatangero. ¹⁶ Navurukire manando ghafumu, edi ghaghambire eshi, 'Johannesi ghayoyire nomeyu; ene mboghunapu kuyogha mwamupepo ghokupongoka.' ¹⁷ Ngeshi Nyambi hatapa thitapera thofotji thika di ghatapire kukwetu apa twatawire mwaFumu Jesusi Kristusi, yamedye eshi nikanane Nyambi?'' ¹⁸ Apa hayuvire yinu yi, mbadiko yi haghambire mukuhuthako, ene hashoghererire Nyambi no haghambire eshi, ''Ndani Nyambi ghatapa mapirukero ghomoyo kwawahayidena nawo.'' ¹⁹ Awa hakuharanganyine kumakuthakuthero agha ghakarire kwaStephanus yakuhanyini kare ghure ghokuPhoenicia, Cyprusi, naAntioch, ghughamba nando kwaJuda pithako. ²⁰ Ene hamweya hopapawo, hatutughuru hokuCyprusi naSirene, heyire kuAntioch nokaghamba karo kwawaHirika, ghuwatongwera mbudhi dhodhiwa kuhatera Fumu Jesusi. ²¹ Nyara dhaFumu dhakarire nawo; thitara thothikuru thatawire nokupiruka kwaFumu. ²² Mudhi dhokukwawo dheyire mumatwi ghongirishe dhomuJerusalema, no hatumine Barnabasi ghure ghokupiterere Antioka. ²³ Apa gheyire nokunamona thineke thaFumu, ghashambererire no ghawatjokedhire wahe hakare naFumu nomitjima dhawo dhodhiheya. ²⁴ Ghakarire katughuru ghomuwa no ghayarire no mupepo ghokupongoka no matawero, no hanu hohengi hakuwedherere kwaFumu. ^{25 26} Barnabasi poghayendire kuTarsiusi ghakashane Saulusi. Apa ghakamuwanine, ghakamuretire ku Antioka. Yakarire ngeno eshi, mwaka ghoghuhe hapongire pofotji nongirishe no hahongire hanu hohengi. Hakathishongero hakatangerere kawetha shi hakriste muAntioka. ²⁷ Pano keho mumayuwa gha haporofeta hamweya heyire kuAntioka kutunda kuJerusalema. ²⁸ Ghumwe ghopapawo, Agabusi padina, ghemanine noghaghambire pamupepo eshi diyerenge dyodikuru mbodineya mukaye kokaheya. Oyi yahokokire mumayuwa ghaClaudiusi. ²⁹ Podigho hakathishongero, thika di hakarire wahe shi kukona, hatokorire kutuma maghamweno kwawatawi homuJudeya. ³⁰ Hayitendire yi; hatumine masherenyi kwawakuru mudyoko dya Barnabasi naSaulusi.