¹ Saulusi gha karire nomatawero gho yifa yendi. Mudiyuwa dyo poghatangire makuthakuthero gho makuru mu kwimanganyena ngirishe dho muJerusalema;no hatawi waheya ha kuharanganyine mumatungaghana ghaJudea naSamaria,kutundithako haApostoli. ² Hatutughuru wa hakutapa kwaNyambi ha horekire Staphanus no hakarire nothindhivi thikuma. ³ Ene Saulusi ghayerekire kuhanyaghura ngirishe. Aye ngayendanga tunda dighumbo yenda dighumbo ghukokakoka hatutughuru nawambuyama,no kuwa tura mukashitiko. ⁴ Shime hatawi awa hakuhanyanganin ha twikerire kuyuvitha nando dhendi. ⁵ Philipusi ghayendire munurumbara dhaSamariya no kuwa yuvithera kuhamena Kristusi. ⁶ Mbunga dhawanu dhadheghetere ghutegherera ku koyi gha yuvithire Philipusi;nodighano dyofotji hamuyuvire,no hamonine yidimukitho eyi gha tendire. ⁷ Dhimupepo dhodhimango dhashwaghire mo hohengi awa dhanyikire,ghudira nowighuka maywi ghawo,no hakakughara pofotji nawakakupira kuyenda hohengi hapwire kwirura. ⁸ Yishamberera yoyikuru yakarire munurumbara dhiya. ⁹ Ene pakarire katughuru ghumweya munurumbara dhiya gho dina dyoSimoni,oyu gha karire nokare murodhi;aye ngatetukithanga thikuma hanu homuSamariya ghumutanaghura eshi aye ne munu gho mudyo. ¹⁰ Haka Samaritani waheya kutangera kohambiru kare kohakuru,nga ha muteghereranga; haghambire eshi,''Oyu katughuru ne yo ngcamu dhaNyambi dhakahurako.'' ¹¹ Hamutegherere yoyishi kare gha katangire kuwa tetukitha noghurodhi wendi. ¹² Ene apa hamutawire philipus apa ghahongire mbudhi dhodhiwa dhoghuFumu waNyambi nodina dya Jesusi Kristusi, hapwire kuyogha wahe hatutughuru nawambuyama. ¹³ Ngambi Simoni naye thinda ghatawire, no munyima dhokupwa kumuyogha gha twikere kukara na Philipusi. Apa ghamonine yitetukitho noyitenda yongcamu yinakuhokoka, ghatetukire. ¹⁴ Apa hayuvire ha apostoli homuJerusalema eshi Samariya ne ghana tambura nando dha Nyambi, hawatumene Petrusi naJohannesi. ¹⁵ Apa hanakumine, hanawaraperere hatambure mupepo ghokupongoka. ¹⁶ Kare poro ruvendhe, oku mupepo ghokupongoka mbadi weya shime papawo; hapwire ngenyu kuyogha mudina dyaFumu Jesusi. ¹⁷ Ndani Petrusi naJohannesi haturire moko ghawo papawo, no hatamburire mupepo ghokupongoka. ¹⁸ Apa ghamonine Simoni eshi mupepo ghokupongoka ne haghutapire pakukambeka nyara dhawapostoli, ghawapire manyinga. ¹⁹ Ghaghambire eshi, '' Mudhinipe name dhi ngcamu podiyo eshi kehe yuno name mbonikambeka ne mboghatambure mupepo ghokupongoka.'' ²⁰ Ene Petrusi ghaghambire kukwendi eshi; ''Hanyaghuke nowe nomasiliveri ghoye, yoyishi ghunaghayara eshi kukona we kuwana thitapera thaNyambi nomasherenyi. ²¹ Mbadimo dyango dyoye muno, yoyishi mutjima ghoye mbadi ghunahungama naNyambi. ²² Podiyo, piruke kughuyi ghiye, no raperere kwaFumu, podiyo pamwe ghanakukuthiyerera kudidovo dyo mutjima ghoye. ²³ Nakumono eshi ghudi noghuhungu ghonduru nomunotwa dho diharwero.'' ²⁴ Simoni ghahuthire no kughama eshi; ''Nirapererepo kwaFumu, podiyo eshi mbadiko eyi shoyinihokokere poyi ghuna ghamba ²⁵ Apa hanongononine no kughamba nando dhaFumu, Petrusi noJohannesi hahukire kuJerusalema, ghuhonga mbudhi dhodhiwa mumikunda dhodhingi dhomuSamaritani. ²⁶ Muengeli waFumu gha ghambire kwa Philipusi eshi; ''Matuke noyende mughucuma mundhira dhokughurumuka kushwagha kuJerusalema dhiyende kuGaza.'' (Ndhira dhi dhakara dhomumamboreya.) ²⁷ Ghemanine noghayendire. Kapupi kamanana, pakarire katughuru ghomuka Ethiopiya, ghomutungi noghuraghuri ghoghukuru mwishi dhaCandee, herekadhi waka Ethiopiya. Yiwana yendi yoyiheya yakarire mumoko ghendi. Gheyire muJerusalema mukunaraperera. ²⁸ Ghahukire oku ghanahungumana muditemba dyendi, no ghutoya mwamuporofeta Isaya. ²⁹ Mupepo waghambire kwaPhilipusi eshi, ''Yende nokakare pepi noditemba di.'' ³⁰ Podigho Philipusi ghatjirere kukwendi, no ghamuyuvire ghana kutoya mwaIsaya ghomuporofeta, no ghaghambire eshi, '' yoyi ghuyitjwathana yi ghuna kutoya ndi?'' ³¹ Ghoghaghambire eshi, ''Ngepi shonitjwathane, shimengwa ghumwe ghanighamwena?'' Ghethire Philipusi ghaye muditemba noghahungumane nendi. ³² Nothimingwa tho matjangwa thi ghatoyire muka Ethiopiya yu ne eshi; ''Hamutwarire yira ndjwi kukatomeno, no yira ndjwi ghana kughutho wamukururi wendi muthipore, mbadi ghayandhurure kanwa kendi. ³³ ''Mumashwanhwero ghendi, ghuhungami haghumushwayithire. Yidye ghokukona kupathurura mawero ghendi? Yipara yendi hayishwayitha pakaye.'' ³⁴ Podiyo katughuru yu ghepurire Philipusi, no ghaghambire eshi, ''Nakukanderera, yidye ghana kughambaghura muporofeta, thinda ndi, endi ghumweya?'' ³⁵ Philipusi ghatangire kughamba, nokutanga no matjangwa gha ghamuhongire matjangwa kuhatera Jesusi. ³⁶ Mukuyenda kwawo mundhira, heyire komeyu ghamweya no mutungi yu ghaghambire eshi, ''Mone, poghadi meyu pano. Yinu munye shoyinishinge mukupira kupwa kuyogha?'' ³⁷ Philipusi ghahuthire eshi, ''Ngeshi ghuna tawa nomutjima ghoye ghoghuheya, kukona ghupwe kuyogha.'' ³⁸ MukaEthiopiya ghahuthire eshi, ''Natawa eshi Jesusi Kristusi ne mwana Nyambi.''' MukaEthiopiya gharawere ditemba dimane. Hayendire mumeyu wahe, Philipusi na mutungi, ndani Philipusi ghamuyoyire. ³⁹ Apa hashwayire mo mumeyu, mupepo waFumu wamushwayithirepo Philipusi, nomutungi yu mbadi ghamumomnine karo, ene ghayendire mundhira dhendi ghushamberera. ⁴⁰ Ene Philipusi ghakamonekire muAzotusi noghakayendire dhowowo mukunda, ghughamba mbudhi dhodhiwa mumambara ghomaheya kare ghakeyire kuCaesareya.