¹ Apa hatokorire kukutheka kuItali, haturire Paulusi nawakadorongo hamwe mumoko ghamukuru wawakayita ghodina Juliusi ghokamba dhokushwaghanga. ² Twadhinine muthikepa thokushwagha ku Adramyttiumu othi thashanine kukutheka mudivigha dya Asia. Twayendire kudikuruviya. Aristarchus ghoku Thessalonica muMasedoniya ghayendire netu. ³ Mudiyuwa dyokurandako twakathekerire mudiya dyomuthitata tha Sidoni, oku ghakatekurire Juliusi Paulusi thiwana no kamutawedhera ghakayende ghakamone ghaghendhendi mukawana thinga thawo. ⁴ Kutunda po, twayendire kudikuruviya no kakutheka dhothivigha tha Cyprusi, pepi no thirudhi, yoyishi mupepo watuthindekire. ⁵ Apa twakuthekire tutjinaghane dikuruvigha ghupita Ciliciya na Pamphyliya, twakathekerire kuMyra, thitata tha Lycia. ⁶ Oko, mukuru wakayita ghakawanine thikepa thokuAlexandria othi thakuthekire kuItaly. Ghatuturiremo. ⁷ Apa twakuthekire kamanana mayuwa ghomengi, no twakakumine noghukukutu pepi na Cnidusi no mupepo mbadi wakatutawendhire karo kapita ndhira dhiya, twakakuthekire dho divigha dhokupira mupepo dhaCrete, thambo diya dhaSalmone. ⁸ Twakakuyhekire dhodiviya noghukukutu, kare twana kumine kudyango dimweya hatoya eshi Fair Havenis, odi dyakarire pepi nothitata tha Laseya. ⁹ Twashimbire ruvedhe rorure, nako dhawaJuda nadho dhapitire ghutambuka, no dhakarire ghukukutu mukukutheka. Paulusi ghawanyangerekedhire, ¹⁰ nokughamba eshi, ''Mwatutughuru, nakumona eshi ruyendo ru twakushana tushimbe nanyi rukare roghurema noyiyongaritha yoyikuru, mbadi mutwaro pithawo nothikepa ene no moyo dhetu.'' ¹¹ Ene mukuru wawakayita ghapakerire thinga thothikuru kwamupiterithi no kwathinda shathikepa kupitakana yinu yi ghaghambire Paulusi. ¹² Yoyishi dyango mbadi dyakarire ghuredhu kukarapo pakufu, wingi wawavuyi hatotokorire kukutheka hashwaghepo, no ngeshi mukehe muhingo tukakume muthitata tha Phoenix dyango dyokupira mupepo, ghupirukera kokuhe, ghucuma ditokera no mbunda ditokera. ¹³ Apa watangire kupunga mupepo ghokughucuma kamanana, Havuyi haghayarire eshi hanawana yoyihe yi hanyandire. Hakokire mitwaro no havuyire dha Crete, pepi no rungengera. ¹⁴ Ene munyima dhoruvedhe rorufupi mupepo ghodingundunga dyongcamu, di hetha eshi ghucumadiva, dyatangire kupupana kutunda muthirudhi. ¹⁵ Apa dyakwatire dingundunga thikepa no mbadi wakukona karo kughupita mupepo wapo, twakona kutapa ndhira kudingundunga no watuhingire mupepo. ¹⁶ Twakuthekire dho thivigha thothirudhi ghana hetha shi Kauda, no ghukukutu twakonine kughamwena wato. ¹⁷ Apa hayeyurire wato muwiru, harughanithire mughodhi watho mukughanga yirama yothikepa. Hayapire eshi ngo hatjirere kughukandami waSyrtisi, podiyo haghurumuthire mahina ghothikepa nohahingire ghutambapo. ¹⁸ Twashimbire ndhira dhodhikukutu mukutuhinga mupepo eshi mudiyuwa dyo kurandako, hatangire kuvukuma mutwaro muthikepa. ¹⁹ Mudiyuwa dyoghuhatu, havuyi havukumine murongero ghoyhikepa no nyara dhawo hathinda. ²⁰ Apa dyapirire diyuwa nokaghonda kutusheghenyena mayuwa ghomengi, nodingundunga dyodikuru dyakarire papetu shime, makurupero eshii tuwane maghamweno ne twaghayongarithire. ²¹ Apa hayendire rure mbadiko yidya, podiyo Paulusi ghemanine mukatji kawavuyi nokughamba eshi, ''Mwatutughuru, ngomunanitegherera, no kupira kuvugha tushwaghe muCrete, mukupira kuwana ghu ghurema nomayongarithero. ²² Pano nakumutjokedha mukwate mutjima, mbadi shoghakare mayongarithero ghomoyo mukatji kenu, ene mayongarithero ghothikepa ²³ Mughuthiku, muengeli waNyambi oku nahatera, oyu karo nakareranga- muengeli wendi ghanemana kumbadi dhange ²⁴ no ghana ghamba eshi, 'Wayapa Paulusi. Wakemane kughutho wafumu shokuru, no mone, Nyambi mughuhungami wendi ghanakupa wahe wa ghunakukutheka nawo.' ²⁵ Podigho keho, mushamberere, mwatutughuru! Nakurupera Nyambi eshi yihokoke thika di ghanayinitongwera. ²⁶ Ene tuvughere tukakanduke kuyirudhi yimweya.'' ²⁷ Apa weyire ghuthiku ghodikumi no ghune, pakutuhinga mundhira dhi no eshi mudikuruviya dya Adriatic, mughuthiku havuyi haghayarire eshi kuna kukokera dhimuve dhimweya. ²⁸ Hametire ghudhungi no hawanine mameteri makumi mane; munyima dho kanako ghana, hametire karo nohawanine mameteri makumi mahatu. ²⁹ Hayapire eshi pamweya kukona tukumbwande mumawe, hayeyurire mahina ghothikepa mumeyu noharapererire eshi mathiku-thiku ne gheye wangu. ³⁰ Havuyi hashanine ndhira dhokuthigherera thi kepa nohaghurumuthire wato mudikuruviya, no hakutendithire eshi ngohavukumene mahina kughutho. ³¹ Ene Paulusi ghaghambire kwamukuru wakayita no kwawa mashurundate eshi; ''Shimenwa hatutughuru wa hakare muthikepa, mbadi shomupwe kughamwena.'' ³² Mashurundate ghoghatetire mughodhi ghowato no kughuthiya ghukayende. ³³ Apa theyire thishe thodiyuwa, Paulusi ghawakumbere waheya hashimbe yidya yimweya. Ghaghambire eshi; ''odi diyuwa ne diyuwa dyodikumi noghune odi munakara mughukaro ghofotji nokuyenda mbadiko yidya,- mbadiko thi munadi. ³⁴ Namukumbera mukuyarekere yidya, oyi ne yamuroghera mukupara. Noghofotji temba ghopapenu shoghayongarithe kahuki kokumutwi wendi.'' ³⁵ Pakumana kughamba yinu yi, ghashimbire ghuroto no ghatumere Nyambi mumeho wawaheya. Ghoghatjorire ghuroto no kutanga kudya. ³⁶ Pohapwire kutjokedha wahe nawo pohashimbire yidya. ³⁷ Twakarire mathere mawadi nohanu makumi kwokowadi nokwoko noyofotji muthikepa. ³⁸ Apa hadire yokurikanya, Haredhupithire thikepa mukuvukumena mavumbukiro mudikuruviya. ³⁹ Apa dyavire diyuwa, mbadi haghudimukire mukunda, ene hamonine diya, nohakuvurekire ngeshi kukona hahingereko thikepa. ⁴⁰ Pohatetire nokushutura thikepa nokuthithiya mudikuruviya. Roro ruvedhe rofotji hashuturire yihingitha yothikepa nohayeyurire dikehe mumupepo; ghohatambire kudiya. ⁴¹ Ene thikepa thakekatere muruheke no hatjirere pandundu. Ghutho ghothikepa wakakatere popo nowakarire mbadi wakuyendaghura, nonyima dhothikepa dhatjokire kungcamu dhomangumbi ⁴² Dighano dyawamashurundate ne dyokupagha hakadorongo podigho shi noghofotji temba ghopapagho shoghayoghe no kwomboroka. ⁴³ Ene mukuru wawakayita ghashanine kughamwe Paulusi, noghawashaghekithire dighano dyawo; no gharawere hokukona kuyogha hareghe muthikepa nokakanduka kundundu. ⁴⁴ Ndani hokuthigharako hakuthe, hamwe payipurangi, nohamwe payinu yimweya yomuthikepa. Mundhira dhi, twaheya twana kumine thiwana pandundu.