¹ Podyo Agrippa ghaghambire kwaPaulusi eshi, ''Kukona ghughambe ghothinda.'' Podiyo Paulusi ghaghonyonine dyoko dyendi ghakughamwene thinda. ² ''Nakutura nothinda eshi nomukayishamberera, fumu Agrippa, mureta murandu wange kughutho wenu kuhatera yirundera yoyiheya yawaJuda, ³ thikumapo, yoyishi ghomuwawa thiwana mu thitjo thawaJuda no mepwero. Podiyo nakukukanderera mukuniyuvera thiwana. ⁴ Ghushemwa, haJuda waheya hanidimuka edi napara kutunda kughumurereya wange muditunga dyange no kuJerusalema. ⁵ Hanidimuka kutunda kumatangero ndani hayitawe eshi ame ne napara yira nomuPharasayi, mbunga dhi hashweneka muthiko thetu. ⁶ Pano nemana muno mukunipangura pamurandu ghomakurupero ghange ghomuyitoghendera yi ghatendire Nyambi kwawakerekandongo wetu. ⁷ Ghogha matoghedhero mako ghetu dikumi nomawadi hakurupera mukughawana thika di hana kukugha Nyambi thikuma ghuthiku no mutenya, no ghogha makurupero ghofotji, fumu, haJuda gho hana kunirundera. ⁸ Pashanye shanye shohaghayarere hamwe hopapenu eshi mbadi yatawa eshi Nyambi ne kuvumbura mwawafu? ⁹ Ene kemo, name nothinda naghayarire eshi nakona kutenda yinu yishawingi kwimanganyena dina dyaJesusi gho mukaNasereti. ¹⁰ Nayitendire yi muJerusalema. Natjaperere mudorongo hanu waNyambi hokupongoka pangcmu dhi nawanine kwawaruti hohakuru; no apa hawapayire, nayitawire mukuwemanganyena. ¹¹ Nawahumbithire maruvedhe ghomengi mumasinagoge ghomaheya no nakondjire kuwathineneka hatende mushedho ghokwaNyambi. Nakarire noghupata wange ghoghukuru mukuwemanganyena nonawakutha kuthire ngambi kare kumambara ghomutunda kure ¹² Oku pakuyitenda yi, nayendire kuDamaskusi no nangcamu no marawero ghokutunda kwawaruti hohakuru; ¹³ no mundhira dhange dhoko, pamutwe katji, fumu, namonine thishe thokushwagha mudiwiru thokusheghenya kupitakana diyuwa, thanisheghenyenine mitara dhange dhodhihe no hatutughuru wa hayendire nange. ¹⁴ Apa twawire twaheya pamuve, nayuvire diywi dina kughamba kukwange odi dyaghambire mundimi dhothihirika eshi, 'Saulusi, Saulusi, pashanye ghuna kunikuthakuthera? Ghukukutu kukoye kuthita muthithiki.' ¹⁵ Ghoghambire eshi, 'Yowedye, Fumu?' Fumu ghoghahuthire eshi, 'Yame Jesusi oyu ghuna kukutha kutha. ¹⁶ Wimane pamapadhi ghoye; Yoyishi pathitambo nakuhokokera, mukukutorora ghukare ghomupika no mushupi kuhatera yinu yi wadimuka yokukwange noyinu eyi nakukuneghedha munyima; ¹⁷ no mbona kughamwene kwawanu no kwawahayidena oku nakukutuma, ¹⁸ mukayandurura meho ghawo nokawapirura hakashwaghe mumakokore hakengene kuthishe no kushwagha kumangcamu ghaSatani hayende kwaNyambi, podiyo eshi mbo hatambure mathigherero ghomaharwero kwaNyambi no mayorero agha natapa kukwawo awa hataghura pamatawero mumwange.' ¹⁹ Yodiyo keho, fumu Agrippa, mbadi nanyathire yimona yomudiwiru; ²⁰ ene, kowo homuDamaskusi pakutanga, nda kuJerusalema, no mumatunga ghomaheya ghaJudeya, nohahayidena, nawapire mbudhi eshi hakona kupiruka nokuhuka kwaNyambi, ghutenda yirughana yaroghera mapirukero. ²¹ Oyi yaningithire haJuda hanikwate mutembeli no kukondja hanipaghe. ²² Nyambi ghanighamwena kare popano, podiyo nemana nokunongonona kwawanu vene no kohohakuru mbadiko yoyingi yira eyi haghambire haporofeta na Mosesi yakuhokoka- ²³ eshi Kristusi ghakona kunyanda no mukukara shi yohokutanga kuvumbuka mwawafu, mbo ghanayuvitha thishe kwawanu wetu nokwawahayidena. ²⁴ Pakumana Paulusi mutara wendi, Festusi ghaghambire nodiywi dyokuyeyuka eshi; ''Paulusi, waghundumuka; yikuhonga yyoye yoyikuru yakughundumuna.'' ²⁵ Ene Paulusi ghaghambire eshi, ''Mbadi naghundumuka, ghodikuto Festusi, ene oyi nakughamba ne yaghushemwa noyahungama. ²⁶ Fumu ghadimuka yinu yi; no nakughamba ghushutuka kukwendi, natawa eshi mbadipo poyi yokumuhoreka; oyi mbadi ypwa kutenda mughudhindo. ²⁸ Watawa haporofeta, fumu Agrippa? nayidimuka eshi watawa.'' ²⁷ Agrippa ghaghambire kwaPaulusi eshi; ''Muruvedhe rorufupi, nanyi ghunitawe nokunitenda nomuKriste?'' ²⁹ Paulusi ghaghambire eshi; ''Naraperere kwaNyambi, eshi ngambi muruvedhe dhorufupi endi rorure, mbadi yowe pithoye, ene waheya karo wa hanakuniyuva dyarero, nanyi hakare yira yame, ene nokupira gha menge gho dorongo.'' ³⁰ Podiyo fumu ghemanine, na nguvuru naBernice naye, nowa hahungumanine nawo; ³¹ apa hashwayire mudikuru yugho, haghambathanine kukwawo hathinda nokughamba eshi, ''Katughuru yu ne mbadiko yi ghatenda yokuroghera yifa endi nwato.'' ³² Agrippa ghaghambire kwaFestusi eshi, ''Oyu katughuru ne ngo hamushutura ngo mbadi ghakumbere kwafumu shokuru.''