¹ Festusi ghangenine mumukunda munyima dhomayuwa mahatu, ghayendire kushwagha kuCaesareya kate kuJerusalema. ² Haruti hohakuru nawaJuda haretire mirandu dhaPaulusi, no hanakumbere Festusi- ³ hamwipurire mukuwatenderako thinu kwaPaulusi- mukumurundwerera kuJerusalema, hakuroyithere mukumuhomokera hamupaye mundhira. ⁴ Festusi ghawahuthire eshi Paulusi ne ngahakamukwata kuCaesareya, ndani naye thinda ghana kuyenda koko kapupi kamanana. ⁵ Podigho, kowa hana kukona , ''ghaghambire'', kukona hayendeko netu. Ngeshi noghukukutu wendi yo katughuru, mukamurundere. ⁶ Festusi mbadi ghakarire mayuwa kupitakana mayuwa kwoko nomahatu endi mayuwa dikumi noghaghurumukire kuCaesareya, nomudiyuwa dyo kurandako ghakahungumanine pathipuna thokupangwera no ghakarawerere hamuretere Paulusi. ⁷ Pakunakuma, haJuda hokushwagha kuJerusalema hanemanene pepi nendi, noharetire mirandu dhodhikuru odhi dhapirire ghushupi wadho. ⁸ Paulusi ghakughamwenine thinda nokughamba eshi; ''Mbadiko yoyimango natenda kwimananyena veta dhawaJuda endi kwimananyena tembeli endi kwimananyena fumu shokuru.'' ⁹ Ene Festusi ghashanine maghuwa mwaJuda no ghahuthere Paulusi no kughamba eshi; ''Ghunashana kuyenda kuJerusalema no nakakupangure yame koko kuhatera yinu yi?'' ¹⁰ Paulusi ghaghambire eshi, ''Nemana kughutho ghothipuna thomapangwero ghafumu shokuru omu shohanipangwere. Mbadi nayipithera keheyuno muJuda thika di mwayidimuka thiwana namwe. ¹¹ Ngeshi kemo eshi natenda ghuyi no natenda eyi yaroghera yifa, mbadi nakushwena kufa. ene ngeshi yirundera yawo ne yaghumbango ne mbadiko yu sho ghanitape kukwawo. Nakumbera kwafumu shokuru.'' ¹² Pakumana kughamba Festusi nawakandhango, ghahuthire eshi, ''Ghuna kumbera kwafumu shokuru. kwafumu shokuru shoyende!'' ¹³ Munyima dho mayuwa ghongandji, fumu Agrippa na Bernice hanakumine kuCaesareya mukunatapa mudhingu gho pamuragho kwaFestusi. ¹⁴ Munyima dhokunakarako mayuwa ghomengi, Festusi ghatapire murandu waPaulusi kwafumu; ghaghambire eshi, '' Katughuru ghumweya ghathiyire Felix muno eshi mukanotwa. ¹⁵ Apa nakakarire muJerusalema, haruti hohakuru nawamayami ghawaJuda haretire kwange murandu ghoyu katughuru, no hepurire mukunamupangura kumurandu wendi. ¹⁶ Nahuthire kukwawo eshi, mbadi muhingo wawakaRoma mukutapa kwakeheyu thiharuri ghakare nawa ghaharwera nokukara no kambenene kokukutanaritha thinda kumurandu. ¹⁷ Podiyo, apa haneya pofotji pa, mbadi nataterera, ene diyuwa dyokurandako nahungumanine pathipuna tho ndhango nokurawera haniretere katughuru yu. ¹⁸ Apa hemanine hakakumughayarera hatape yighayarera yawo, naghayarire eshi mbadipo murandu ghu wakarire ghoghukuru. ¹⁹ Ene hakarire nodikanyi thikuma nendi kuhatera kumatawero ghawo no Jesusi ghumweya yu ghafa, ghoyu ghana kughamba Paulusi eshi muyumi. ²⁰ Mbadi nadimuka eshi ngepi ghokukona kukengurura ghukukutu ghu, no namwipura ngeshi kukona ghakuyende kuJerusalema ghakawane matheko ghendi koko kuhatera mirandu dhi. ²¹ Ene apa ghakumberire Paulusi mukumutura mukashitiko oku kuna kutaterera matokwero ghawakayita, namurawere mukukara mukashitiko kare nakumutume kwafumu shokuru.'' ²² Agrippa ghaghambire kwa Festusi eshi; ''Nashana name kutegherera koyu katughuru. ''Peghundha.'' Festusi ghaghambire eshi, ''Nanyi wakumuyuve.'' ²³ Diyuwa dyokurandako, Agrippa na Bernice heyire noyinu yishawingi, heyire mudikuruyugho nawakayita nohanu homumbara. Apa ghaghambire Festusi marawero, Paulusi hamuretire kukwawo. ²⁴ Festusi ghaghambire eshi, '' Fumu Agrippa, namwe mwahanu mwahe mwe mudi netu muno, yoyi mumumona yu katughuru; mbunga dhodhihe dhawaJuda awa hakuwire nange muJerusalema nomuno karo, no hakugherere kwange eshi mbadi ghakona kupara karo. ²⁵ Nananongononine eshi mbadiko yi gharughana yokuroghera yifa; ene pamurandu eshi ghana kumbera kwawakayita, natokora mukumutuma. ²⁶ Ene mbadi nidi nokehe yino yokutjanga kwawakayita. Nothitambo thi, namureta kukoye, pamuragho kukoye, Fumu Agrippa, podiyo eshi pamweya kukona niwaneko yimweya yokutjanga kuhatera murandu ghu. ²⁷ Mbadi wakumoneka mudyo kukwange kutuma mukanotwa nokupira kukenitha murandu wendi.''