¹ Munyima dho mayuwa makwoko, Ananiasi mupristeri ghomukuru, mayami ghamweya na mughambi ghomukuru ghodina Tertullusi hayendire ko. Katughuru yu gharetire murandu gho kwimanganyena Paulusi kwa nguvuru. ² Apa ghemanine Paulusi kughutho wa nguvuru, Tertullusi ghatangire kumurundera no kughamba eshi, ''Yoyishi papoghe twawana thiraro thothikuru noyimona yoghe, kureta matendwerero ghomawa kuditunga dyetu. ³ Nomatumero ghomakuru twatambura yoyihe yi watenda, ghomuhunga Felix. ⁴ Mukupira kukutatereroiyha, nakukanderera mughuhungami ghoye ghutuyuvere paghufupi. ⁵ Tunawana yu katughuru mukukara muyipithi noghumweya yu ghatenda haJuda mukaye kokaheya hakakwimanganyena. Aye mukuru ghombunga dhawemanganyeni ghomuNasareti. ⁶ Ghashanine kwipitha tembeli, potunakamukwata. Tunashana kumupangura kukutha muragho wetu. ⁷ Ene Lysiasi, mukuru wawakayita, gheyire no kuna mushimba mumoko ghetu nongcamu, ghu rawera ha ghayareri wendi heye kukwenu. ⁸ Apa sho wipure Paghulusi kuhatera kuyinu yoyiheya yi, nanyi ghu nongonone yinu yoyiheya eyi tuna kumughayarera.'' ⁹ HaJuda ha kupakerere nawo muyighayarera yi ghutanaritha eshi murandu ghu ne waghushemwa. ¹⁰ Ene apa gha pire nguvuru Paghulusi gha ghambe, Paghulusi gha huthire eshi, ''Na yitjwathana eshi mwaka dhodhingi ghuna kara gho mupanguri muditunga di, na yi hafera mukukupathurura nothinda kukoye. ¹¹ Kukona ghuyi nongonone gho thinda eshi mbadi ghana pitakana mayuwa dikumi nomawadi kutunda apa neyendire ni ka raperere muJerusalema. ¹² Apa ha ka niwanine mutembeli, mbadi na ka kukananine na kehe yuno, no mbadi na ka dhongerire mbunga nomuma sinagoge temba ngambi muthitata. ¹³ Mbadi sho ha mupe ghushupi gho yighayarera yi hana kutenda pano yo kunimanganyena. ¹⁴ Ene kuna kutongonona kukoye eshi, kukutha mundhira edhi hana kwitha eshi dho memananyeno, dho ndhira dhodho na kareranga Nyambi wawa kerekandongo wetu. Na tawa yoyihe eyi yina kukuyenda no muragho noyi ha tjanga mwawaporofeta. ¹⁵ Ni di no makurupero mwa Nyambi yira wowa hanu, eshi mbo ghuna kara muvumbukero pofotji hahunga nawayi. ¹⁶ Kehe pano ame kukondja mu kupira murandu kughutho waNyambi no kwawanu. ¹⁷ Munyima dho myaka dhodhingi neyire mukunatapa furufende kuditunga dyange no kunatapa muyambo. ¹⁸ Apa nayitendire yi, haJuda hamweya ho kuAsiya hananiwanine muthirika tho makushwero mutembeli, mbadi nombunga ngambi kayoghototo. ¹⁹ Hanu wa hana shana kukara kughutho ghoye nokunighayarera ngeshi hadi nokeheyino. ²⁰ Ngeshi mbadi kemo, hanu wowa hofotji haghambe murandu ghu hawanine mumwange apa nemanine kughutho wawakandhango dhawaJuda, ²¹ shimengwa kuhatera thinu thofotji ethi nakughererire apa nemanine mukatji kawo, 'Thokuhatera kumuvumbukero wawafu yona kukarera mumbangwiriro kughutho ghoye dyarero.''' ²² Ndani Felix yu ghapwire kupukurura thiwana kundhira dhi, gharundurure matheko. Ghaghambire eshi, ''apa gha kughurumuka Lysiasi gho muraghuri kushwagha kuJerusalema, nanyi nakunatokore murandu ghoye.'' ²³ Gharawerere mukuru wakayita eshi Paulusi hakona kumutura mukashitiko, ene ghakona kukara muhoro podigho mbadiko ghopawaghendhendi shapwe kukandana mukupira kupakera thinga yinyanda yendi. ²⁴ Munyima dho mayuwa ghomapu, Felix ghakahukire na Drusilla ghomunu wendi, ghomuJuda, noghatumene Paulusi no ghanayuvire kukwendi yo kuhatera matawero ghendi mwaKristusi Jesusi. ²⁵ Ene apa ghana kuwire nendi Paulusi kuhatera ghuhungami, kukukona kona ghothinda, no dhango dhi dhina kwiya, Felix yamuyapithire thikuma noghaghambire eshi; ''Yende tango pano, ene apa shoniwane ruvedhe munyima, nanyi nikutumene.'' ²⁶ Paruvedhe roro rofotji ghakurupere eshi Paulusi nanyi ghamupe manyinga, ghamutumenatumene nokughamba nendi. ²⁷ Ene apa dhapitire myaka dhiwadi, Porcius Festus ghakarire nguvuru munyima dhaFelix ene Felix ghashanine kuwana maghamweno mwawaJuda, no ghathiyire Paulusi munotwa.