¹ Apa hana tukumithire thiwana, twana dimukire eshi thirudhi thapo kwathitoya eshi Malta. ² Hatungimo wapo ne mbadi ghunongo pithagho hatuneghedhire ene hatumekire mudiro nokututambura twaheya pamurandu ghomvura ghothitwikerera nomepo. ³ Ene apa ghaghongawedhire Paulusi thitungu thoyaghara no kuyitura pamudiro, thiyoka thashwayirepo pamurandu ghoghughenyu no thamudhingerire kudyokom dyendi. ⁴ Apa hathimonine hanu homuthirudhi thina mundhendherera kudyoko dyendi, haghambathanine kukwawo hathinda eshi; ''Murume yu ne shemwa mupayi yu ghana kapwa kughamwena mudikuruviya , muragho mbadi ghuna kumutawedhera mukupara.'' ⁵ Ene ghathikukukumwene mudidhiko nombadi thamwipithire. ⁶ Hamutaterere hamumone ghanatughumana noghupyu ghoghukuru endi ghawe mughufu. Ene apa hamukengerere muruvedhe rorure no hamonine eshi mbadi ghadi noghukukutu kehe ghuno, hatjindjire maghano ghawo no kughamba eshi aye ne kanyambi. ⁷ Mudyango dyopepi mwakarire mango gha ghahatere kwa fumu ghothirudhi, katughuru hatire Publiusi. Ghakatutamburire no ghuhunga ghakatughamwene mayuwa mahatu. ⁸ Yahokokire ngeno eshi wiha Publiusi ne ghakarire pathiraro notjitju dho kupyaghana nodihamba dyo kureta ghupyu nodira. Apa ghayendire Paulusi kukwendi , ghakaraperere, ghakambekire nyara dhendi papendi noghamwirukithire. ⁹ Munyima dhokuhokoka yinu yi, hanu hokuthiyarako homuthirudhi thi wa hakorwire heyire nohanerukire. ¹⁰ Hanu karo hatufumanekire nofumwa dhodhingi. Apa twa kuroyithere mukukutheka , hatupire yi twanyandire. ¹¹ Munyima dhotughonda tuhatu twakuthekire nothikepa thi thakarire kufu ghomuhe muthirudhi, thikepa tha Alexandria, no ''tunyambi tomayovu'' thika di thakarire mutwi watho. ¹² Apa twakumine muthitata tha Syracuse, twakarire mo mayuwa mahatu ¹³ Kutunda ko twakuthekire no kakuma muthitata tha Rhegiumu. Munyima dhodiyuwa dyofotji, mupepo ghokughucuma wapungire, nomumayua mawadi twakeyire muthitata tha Puteoli. ¹⁴ Oko twakawanine hatawi no haturayire mukakara nawo mayuwa kwoko nomawadi. Mundhira dhi, twakeyire kuRoma. ¹⁵ Kutunda po hatawi, munyima dho kuyuva yokuhatera kukwetu, heyire mukunatuwana ghure ghokudyango dyomaghurithero gha Appiusi no haTavini hahatu. Apa ghamonine Paulusi hatawi, ghatumere Nyambi no ghakarire no ghudhughutjima. ¹⁶ Apa twengenine muRom,a Paulusi hamutawedhire mukupara papendi no mashurundate wa hamukungire. ¹⁷ Ghoya hokokire ngeno eshi munyima dho mayuwa mahatu, Paulusi ghethire pofotji hatutughuru wa hakarire hapiterithi mukatji kawaJuda. Apa heyire pofotji ghaghambire kukwawo eshi; ''Mwaghendhange, ngambi kenge eshi mbadiko yoyimango narughana kwawanu endi kumihingo dhawakerekandongo wetu, hakanitapire eshi nomukanotwa ghokutunda kuJerusalema munyara dhawaka Roma. ¹⁸ Munyima dhokunipaghura, hahimine kunishutu yoyishi mbadipo thitambo thokunikandwera kuyifa mumurandu wange. ¹⁹ Ene apa haghambire haJuda wimananyena yirumbera yawo, hanithinenekire mukamoneka kwa fumu shokuru ngambi nga shi mbadi yira kwaretere yighayarera keheyino yokwimananyena ditunga dyange. ²⁰ Kuthitambo thino, podigho keho namwithera eshi nimumone nokughamba nenu, pamurandu ghomakurupero gha Israeli, yona kuvatera di dyenge.'' ²¹ Haghambire kukwendi eshi; ''Mbadi twawana twe mambapira ghokushwagha kuJudeya kuhatera koye, endi kehe mutawi mukwiya no kuna rapota kuhatera kukoye ngambi kunaghamba kehe yino yoyimango. ²² Ene tunashana kuyuva mumoye eyi ghuna kughayara kuhatera mbunga dhi, yoyishi tunayidimuka eshi kunakuyighambaghura kokuhe. ²³ Apa hamuturerepo diyuwa, hanu hohengi heyire kukwendi mumatungo ghendi. Ghatapire ghukukutu wendi kukwawo noghashupire kuhatera ghuFumu waNyambi, ghayerekire kuwatjwathanitha kuhatera kwaJesusi, kutangerera kuveta dha Mosesi nokwawaporofeta kutunda mathiku-thiku kare runguro. ²⁴ Hamwe hatawire kuyinu yi ghaghambire, oku hamwe mbadi hayitawire. ²⁵ Apa hapirire kukuwa pofotji, hashwayirepo munyima dhokughamba Paulusi dhino nando dhofotji eshi; ''Mupepo waghambire thiwana kupetera mwamuporofeta Isaya kwawakerekandongo wenu. ²⁶ Ghaghambire eshi, 'Yende ko hanu wa, nokaghambe eshi; ''Mukuyuva nanyi muyuve, ene mbadi shomuyitjwathane; no kumona nanyi mumone , ene mbadi mbomuyikwata. ²⁷ Yoyishi mitjima dhawanu wa dhinakara ghukukutu, nomatwi ghawo ghanakara ghukukutu no hanayandhera meho ghawo. Ngombadim kemo ngokukona hamone nomeho ghawo nokuyuva nomatwi ghawo, kutjwathana nomitjima dhawo nokupiruka karo, nonakuwerura.''' ²⁸ Podiyo, mudimuke eshi agha makomweneno ghaNyambi ne ghapwa kutuma kwayiharuri, no hana kutegherera.'' ²⁹ Pakumana kughamba yinu yi, haJuda hashwayirepo. Hakarire nodikanyi dyodikuru mukatji kawo. ³⁰ Paulusi ghatungire myaka dhodhiheya dhiwadi mundhugho dhendi dhi ghahirire, no ghatamburire yomuhe ghikwiya kukwendi. ³¹ Ghayuvithire ghufumu waNyambi noghahongire yinu yokuhatera kwaFumu Jesusi Kristusi noghundhughutjima ghoghuhe mukupira kumuyipithera.