¹ Paghuhura,mwayendha,tuna kuturamo mukukumbera popo kukwenu no kumutjokedha mwaFumu Jesusi. Thikadi mwawaine matapero ghomarawero gho kukwetu ghokuhatera ko di shomuyende no kuhafitha Nyambi, mundhira dhodhi karo yende, podiyo eshi ghutende kemo kehepa. ² Mwadimuka eshi marawero munye twamupire kupitera mwaFumu Jesusi. ³ Oyi ne yihima yaNyambi, ghupongoki wenu, eshi ngomushwaghe ku rungu, ⁴ no keheyuno ghopapenu ghadimuke eshi ngepi edi shoghamune yirama yendi mughupongoki nodikuto, ⁵ mbadi muyirumbera yodidovo dyorungu (yira hahayidena wa hapira kudimuka Nyambi). ⁶ Mwatawedhera kehe katughuru ghanyathe no kuyipithera muyendhendi muyinu yi. Nyambi ne yo murwithi wawakanore dhenu mu yinu yoyiheya yi, thika edi twamukonekethire no twa shupire. ⁷ Nyambi mbadi ghatwitha kudidhiro,ene kughupongoki. ⁸ Podigho,oyu ghokushwena yi mbadi hanu ghana kushwena, ene Nyambi, oyu gha tapa mupepo wendi gho kupongoka kukwenu. ⁹ Kuhatera kuruhakitho roghuyendha, mbadi mwanyanda keheyuno gha mutjangere, amwe mwathinda ghamuhonga Nyambi mu kukuhakathane. ¹⁰ Kemo, amwe kutendera yinu yi hayendhenu owa ha di muMasedoniya ghomuheya. Ene kuna kumutjokedha twe mwayendha ngambi muyitende rorwingi. ¹¹ Kuna kumutjokedha karo mukukondjera karo kupara muthipore, mu kunge yitumbukera yenu, no murughane no nyara,thika di twamurawere, ¹² podiyo eshi muyende thiwana kughutho dhawakanunda no mbadi kunyanda kehe thino. ¹³ Mbadi tuna kumushanena mukare yira mbadi muna pu kupukurura,smwayendha,yokuhatera kowa ha rara,podigho eshi mbadi muguve yira hokuthiyarako, thika hamwe awa hapira mukurupero. ¹⁴ Ene ngeshi tutawe eshi Jesusi ne ghafire no ghavumbukire karo,ngambi kemo Nyambi nanyi gha kurete naJesusi awa harara mumwendi. ¹⁵ Oyi tuna kuyighamba twe panando dhaFumu, eshi atwe tudi twayumi, atwe twathiyara pamwiyero waFumu, yashemwa mbadi mbotupitera awa ha rara. ¹⁶ Fumu thinda mboghanashuruka kutunda mudiwiru. Mboghaneya no ghukuyerera, no diywi dya muEngeli shokuru, ndani no torombita waNyambi, no hafu homwa Kristusi mbohana vumbuka pakutanga. ¹⁷ Ndani atwe tudi twayumi, atwe hathigha,natwe pofotji nagho hakutushimba mu mavuyi mu kawana fumu mumupepo. Mundhira dhi nanyi twa kakare naFumu roruheya. ¹⁸ Podiyo eshi,mukuhengaghure no gha manando.