¹ Namwe mwathinda mwayidimuka, mwayendhetu, meshi meyero ghetu kukwenu mbadi ghakarire nyara nyara. ² Thika di mwadimuka, ngambi kenge twapitire mukunyanda no twafire honyi mukutupetha muFilipi, twakarire twatjima mwa Nyambi wetu mukughamba kukwenu mbudhi dhodhiwa dhaNyambi muyinyanda yoyingi. ³ Yiyaghura yetu kadi yakumupemukitha, endi kupira ghukushuki ngambi mukumwangera yetu kadi yakupemukitha, endi kupira ghukushuki ngambi mukumwangera. ⁴ Ene, thika di kenge ghatu tambura Nyambi mukukara nomakuruperitho mumbudhi dhodhiwa, ko twakughamba, kadi mukuhafitha hanu, ene Nyambi. Yodighe gho kukona-kona mitjima dhetu. ⁵ Mbadi tweya no manando gho kwangereka, thika di mwayidimuka no yitjanga yoghushemwa eyi yafika ghumu-Nyambi ne mushupi wetu. ⁶ Mbadi twashanine fumwa kwawanu, endi kukwenu ngambi kwawamweya. Natwe ngotwashanine maghuwa thika hapostoli waKristusi. ⁷ Mukuninga eshi twakarire yira twahayidena mumwenu yira mukamadi yu ghana kushewa hanendi. ⁸ Modhi ndhira twakuyuvire ruhakitho rokukwenu. Twakutumere mukukuyarekera nenu kadi mbudhi dhodhiwa ngenyu pithadho dhaNyambi ene noghuparo wetu karo. Muneya mukukara ghushere kwetu. ⁹ Muvuruke keho,mwashare,yiruwana yetu no kayuywa. Ghuthiku no mutenya twarughanine yoyi mbadi twatapa mupango kwa kehe yu ghopapenu thika di twamuyuvithire kukwenu mbudhi dhodhiwa dhaNyambi. ¹⁰ Yamwe mwashupi,NaNyambi karo, ghukushuki gho ngepi, ghuhunga, no yikara yetu kukwenu yokupira murandu kukwenu mwe mwatawa. ¹¹ No mundhira dhofotji mwadimukire ngepi di twa karire no gho papenu, thika wiha kwahanendi, ¹² kuna kumutjokedha no kumuhengaghura mwe no ghushemwa shoghumu tjindje mukuyenda munaro dho kukona kuhafitha Nyambi, oyu ghamwitha eshi, mwingene mughufumu wendi no difumanekero. ¹³ No thitambo thi kuna kumutumera Nyambi thikuma, eshi pamwa tamburire mbudhi dhaNyambi dhi mwayuvire kukwetu, mwadhitamburire no mbadi nando ngenyu dha munu, ene thika di dhakara ghushemwa wadho, nando dhaNyambi, no ghahadi shime pathirughana omu mwatawa. ¹⁴ Kukwenu mwayendhange, mwakarire mwatemununi ghomangirishe ghaNyambi gho hadi muJudeya mwaKristusi Jesusi. Thikadi namwe mwanyandire yinyanda yofotji kudiko dyenu. Thika di gharuwane kwawaYuda ¹⁵ wa hapaghire wahe fumu Jesusi no ghu porofita, nowa ghana kututjidha. No mbadi ghahafitha Nyambi. Kuninga, hanyathi kohanu wahe. ¹⁶ Awo hatushinga eshi, twa yuvitha kwawahayidena mbudhi dhokukona kuwaghamwena. Yitundamo eshi kehe pano hana yaritha thiyedhekeritho thomaharwero ghawo. Ene ngahakupwe kuhumbitha kughuhura. ¹⁷ Ene twe mwayendhetu, twamuyakunukire ruvedhe rorupu, paghunu mbadi mumutjima. Twamururire thikuma, noyihima yoyikuru mukumona marupara ghenu. ¹⁸ Twahimine kwiya karo kwenu-munyima ame, Paghulusi,rofotji nokaro-ene Shatani ghatushingire. ¹⁹ No ghapi makuruperitho ghetu endi yishamberera yetu endi thikoroni thomuyiruwana kughutho wa fumu Jesusi pamwiyero wendi? Eyi ne mbadi yenu? ²⁰ Amwe ne mwafumwa noyishamberera.