¹ Kuhatera kuma nako noyivaka, mwayendhange , mbadi mwanyanda yinu yi hayimutjangere. ² Namwe mwathinda mwayidimuka thiwana eshi diyuwa dya Nyambi ne dina kumu yira mwidhi mughuthiku. ³ Apa mbohaghamba,''Thiraro nonyiki,'' ndani pawangu wangu maharanganyeno mboghana tamba papawo. Mboyina kara yira tjitju dho kushamuruka mwambuyama gho muremu. Mbadi mbohakona kukeruka. ⁴ Ene mwe, mwayendhange, mbadi mwakamakokore podigho shi diyuwa mbodina mupitakana yira mwidhi. ⁵ Amwe mwahana gho thishe no mwahana gho diyuwa. Atwe ne mbadi twahana gho ghuthiku endi ghomakokore. ⁶ Ghuwa po tukare tuna kukenga,kenge hayitendanga hamweya. Kuninga eshi mutukare tuna kukenga no kukara twawa. ⁷ Kowa hararanga kuyiruwana kemo ghuthiku, nowa hatereranga kuyiruwana wo ghuthiku. ⁸ Ene kutunda pa twakuhatera kumutenya, twakona kukara twawawa no kushupata matawero no ruhakitho rokungandekitha, no makurupero gho mashutukero gho thigcoko thetu. ⁹ Nyambi mbadi ghatwithera twe kughupata ene mukuwana mashutukero mwaFumu wetu Jesusi Kristusi. ¹⁰ Aye ghatuferere twahe podiyoshi,yikare shi twayumi endi kuna rara, twakutunge pofotji nendi. ¹¹ Podiyo shimukuhengaghure munu namuyendhendi no mukutende mwahe, thika di mwayitenda kare. ¹² Tuna kumukumbera thikuma, mwahakwa,mu mukutambura kowa harughana mukatji kenu no owa hamukarerapo mwaFumu no kumutjwathanitha. ¹³ Namwe tuna mukumbera mukuwa fumaneka thikuma muruhakitho pamurandu ghoyirughana yawo. Mukare no thiraro mukatji kenu. ¹⁴ Tuna kumukumbera, mwayendhetu: Mukonekithe awa hana vapa, mutjokedhe awa hakuhupwera, mughamwene hakashu, nomukare ghudhughutjima kwawahe. ¹⁵ Mukengeshi mwakuhutheranga ghuyi no ghuyi kwamuyendhendi. Hashako keheyuno gharuwane yoyiwa kwamuyendhendi. ¹⁶ Mushamberere kehe pano. ¹⁷ Muraperere mukudhira kushayeka. ¹⁸ Moyoyiheya mutape matumero. Ogha ne mahimeno gha Nyambi mwaKristusi Jesusi kukwenu. ¹⁹ Mbadi mwakona kudjatera mupepo. ²⁰ Mbadi mwakona kushwahura ghupumbi. ²¹ Mukonakone yinu yoyihe. Mukwaterere kuyinu yoyiwa. ²² Muyakunuke kukehe yinu yoyimango. ²³ Nyambi ghothiraro ghamukushukithe kukumenenamo. Mupepo wenu ghoghuhe,mudhimu, noyirama mupire ghuyi kumwiyero waFumu wetu Jesusi Kristusi. ²⁴ Ghutawedhi koyu ghamwitha mwe, yodighe yakuyirughana karo. ²⁵ Mwayendhetu, muturaperitheko natwe. ²⁶ Muturumerithe wahe hahakwa no mancumitero gho ghupongoki. ²⁷ Nakumu rawera mwe mudina dya fumu mukare no mbapira dhi mukutoya kohatawi wahe. ²⁸ Thineke tha fumu wetu Jesusi Kristusi thikare nenu.