¹ Nakutughumukirashi mukafumu wakukurupa. Nani ngoli mukorangede yira ndjeghu ashi vasho. Korangeda vakafumughona yira vaghuni voye, ² vakamali vavakurona yira vanyoko, ntani vakamalighona yira va mpandjoye, mughukushuki naghuntje. ³ Fumadeka vafitavya vaUshiri. ⁴ Ano nange mufita vya akara navana ndi nava tekuru vendi, pamuhovho ana hepa kukuronga kunegheda mfumwa pama pata ana ghumwavo. Vana hepa kufut vavyute rughoko vakurona vavo. mukonda ashi evi kumu hafita Karunga. ⁵ Ano oghu anakaro mufitavya wa Ushiri, oghu vashuva pantjendi ature lihuguvaro lyendi mwaKarunga nakutwikira kuruwana mashungido, natni nakutapa ndapero matiku namwi. ⁶ Nampili ngoli, mukamali wakuparuka murushonda afa kare nampili ngoli ghuye shimpe muyumi. ⁷ Tapa marondoro nka waro, mposhi vadire kukara namapuko. ⁸ Ano nange umwe kapi anakuvura kurera liro lyendi, shinenepo varangekwa vendi, ogho ashwena lipuliro ntani mudona kupitakana vaku dira kupura. ⁹ Renka mukamali akutjangite akare mufitavya ghuye kapishi akare mwanuke kuntji ya mwaka ro-ntamwe, mukamali wamukafumu ghumwe. ¹⁰ Akare naghukaro wakurughana virughana vya viwa, nka ghuye akare wakupakera mbili navanuke, ndi po akaro unongo kuvantu vakukukarera, ndi po kayoghango mpadi davantu vakupongoka vaKarunga, ndi po averulire vaveli, ndi po kakuturangako kuvirughana vyaviwa. ¹¹ Ano kuhamena kuvafitavya vavanuke, shwena mukuvahamitira mulikukwamo. Mukonda opo vakutapa mumadogho gha rutu muku rwanita Kristus, vavo vana shana kukwara. ¹² Mundjira eyi vavo kukugwanekera naghundjoni mukonda kapi vatikitamo muragho wavo wakuhovha. ¹³ Muruvede rwakukufana, vavo kukuronga nka udwa ntani vavo kuyendaghura tunda ndjugho yenda ndjugho. Kapishi udwa tupu wakuvayera, nani vavo kughambanka vya kupira mulyo ntani kurughanita marutu ghavo murushonda, kughamba vininke vanadiri kuvawapera kughamba. ¹⁴ Mpo ngoli ame nashana vakamali vavanuke vakware, nakuyita vanuke, vapititire nawa mandi ghavo, nakudira kutapa mpito kwamu kankore atushwaghure. ¹⁵ Mora vamwe vayapika kare nakukwama Satana. ¹⁶ Nange kehe ghuno mukamamli wamupuli akaro navafita vya anahepa kuvakwafa, mposhi ngereka yidire kukara namudigho waunene, mposhi yivure kuvatera vafita vya vaushiri. ¹⁷ Vakurona va mbunga kriste ovo vapititirango mbunga kriste mu uhunga vavamone mulyo mukuva fumadeka pama rukando maviri, shinenepo ovo varughanango mukuyuvhita nkango nakuronga. ¹⁸ Kondashi matajangwa kwa tanta ashi, ''Nakuvurashi ghuture shitoma kuhove shirugho sho yayo nakushwagha mbuto'' ndi murughani mulyo mukumupa ndjambi yendi.'' ¹⁹ Washa tambura kehe lirundiro lya kurwita mpititi nkwandi pakare vangambi vaviri ndi vatatu. ²⁰ Tughumukira vanandjo kumeho yanavantje mposhi vakuhuparako vavure kutjira. ²¹ Ame kunakumu rawira kumeho yaKarunga na Kristus Yesus nava Engeli vatoghorora, muku tikitamo dimuragho ndi pahana katong-tongo, ntani kwato kurughana vya kutunda mukatongo-tongo. ²² Washa kwangulita kukambeka maghoko pakehe ghuno, washa kutura mundjo da muntu wakukukarera. Ove kupongore naghumoye. ²³ Kapishi kunwa mema pentjagho. Ano, unahepa kughupa vinyu yayisheshu konda ashi mulira kuvera-vera koye kehe pano. ²⁴ Ndjo davantu vamwe dakushorora paghukenu, ntani dado kuyenda diva pititire kumeho yavho ku mpanguro. Ano ngoli ndjo dimwe kukwama muruku. ²⁵ Mundjira yimwe nka, virughana vimwe vya viwa vyakushorora paghukenu, ano ngoli nampili dimwe nakuvurashi kuhorama.