¹ Weno mpepo yina vikenita kutanta ashi muruvede rwa kuhulilira vantu vamwe ngava ka shuva lipuro nakutegherera kumpepo da vipempa, ntani kuma rongo gha mpepo dadidona ² mumarongo gha vipempa gha ghuvikupaki, maywi ana ghumwavho gha muntjima afa. ³ Vavo ngava shweneka vantu kukwara ntani nakuvarawira vadire ndya odo ashita Karunga dawapero kuditambura nandapero ya mpandu kovo vapuro nakuyiva ushiri. ⁴ Kehe shino shishitwa sha Karunga shiwa, ntani kundereko kushwena ovyo vana tambura nandapero ya mpandu. ⁵ Konda ashi vana vipongora kunkango ya Karunga na ndapero. ⁶ Nange aghu tura vininke evi kumeho ya vakuru nava ghuni vavakafumu, ngaghukara mukareli wamuwa wa Yesus Kristus. Konda ashi kwakuwapekita kunkango yalipuro ntani nalirongo lya liwa olyo wa kwamine. ⁷ Ano shwena mbudi dakare da Udjuni odo vahovhire vakurupe vava kamali. Nani ngoli, kuyombelite naghumoye mughukaro wa ghuKarunga. ⁸ Likuyombelito lya pa rutu mulyo walyo usheshu, ano makuyombelito wapauKarunga mulyo unene kuvininke navintje. Mwakara matwenyidiro gha liparu lyapa weno ntani naliparu lya kumeho. ⁹ Eyi mbudi kuyihuguvara ghunene ntani mulyo unene mukuyitambura mwakuyura. Evi mbyo twarughana nakukondja. ¹⁰ Mbyovi atwe kuhuguvara mwaKarunga wa monyo, ogho anakaro muyogholi wa vantu navantje, ano ngoli shinenepo kuvapuli. ¹¹ Pampelikida nakuronga vininke evi. ¹² Washa pulidira kehe uno ashentje udinkantu ghoye. Nani ngoli kovo vana puro, kara shihonena muvighamba, munkalito, mushihoro, mulipuliro, namu ghukushuki. ¹³ Dogoro ngani kaye, kovekeda kuvarura kuku korangeda, nakukuronga. ¹⁴ Washa ncenuna ushwi oghu wakaramo moye, oghu vaku pire kupitira mu ghuporofete, na likambeko maghoko vakurona. ¹⁵ Kunga vininke evi. Kara mumwavyo mposhi liyendo kumeho yoye likare naviyivhito kuvantu navantje. ¹⁶ Kutakamite naghumoye kuma rongo. Twikira muvininke evi mukurughana ngoli, ngaghuku yoghora naghu,oye novo vakutegherera koye.