¹ Evi vighamba vya lihuguvharo: Nangeshi ghumwe anakushana kukara mpititi, ogho anahoro shirughana shashiwa. ² Mpo ngoli ashi anahepa kupira paku mushentjera. Ana hepa kukara nturaghumbo wamukamali ghumwe tupu. Ana hepa kushetakana, munongononi, wakudira kupukita ntani akare wakuyumbura vagenda. Ana hepa kuyivha kuronga. ³ Kapishi akare nkorwi kumarovhu, kapishi wakurwana, ano ngoli nani, akare mughomoki, wampora. Kapishi akare wakuhora malivha. ⁴ Ana hepa kukara mukafumu ayivho kutekura mundi wendi, ntani ana hepa kuyivhilita ashi vanavendi vamulimburukwe nakumufumadeka mukehe runo rupe. ⁵ Nangeshi mukafumu kapi ayivha kuyendita mundi wendi, weni omo avhura kupakera mbili ntembeli ya Karunga? ⁶ Kapishi muntu ogho kashighuko ntantani, mposhi kapishi akunenepeke ntani kuvhura awere mumpanguro ya Satana. ⁷ Ghuye anahepa kukara muntu wankalito yayiwa munkarapamwe novo vapandje, mposhi kapi awere mulishwaghu ntani namu shiraha sha Satana. ⁸ Mundjira yakukufana, va Dyakoni vanahepa kukara vali kuto, kapishi vaka goma mbeta kuviri. Kapishi vakare vakunwa vikorwita vya vingi ndi po vama kurulya. ⁹ Vana hepa kutulika lihoramo lya liywi lyamumutjima lya kukushuka. ¹⁰ Vana hepa kuva kona-kona tanko pamuhovho, ntani vana kurughana ghukareli mukonda kapi vana kara namapuko. ¹¹ Mundjira yakukufana, vakamali vavo vana hepa kukufumedeka vavene, kapishi va ghushoti, vakudira vikorwita ntani vana hepa kuva huguvara muvininke navintje. ¹² Va Dyakoni vana hepa kukara vakafumu vakukara namukamali ghumwe tupu. Vanahepa kuyivha kupititira nawa vana vavo na mandi ghavo. ¹³ Ovo varughanango nawa kuwana naghumwavho lifundo na lihuguvaro lya linene mulipuro olyo laya karo mwa Kristus Yesus. ¹⁴ Mukutjanga vininke evi kukoye, nahuguvara ntantani nganiye kukoye. ¹⁵ Ano nange ngani kuranga, ame kuna kukutjangera mpo ashi ghuvhure kuyivha ashi weni omo ghulimburukwa mundjugho ya Kaarunga, oyi yina karo ntembeli ya Karunga wa monyo, ngundi nalikwatitoko lya ghushiri. ¹⁶ Natuvantje tunakuyuvhu ashi lihoramo lya uKarunga linene: ''Ghuye akushorwirwe pa nyama, ya mukwatitireko mpepo, vamumonine va Engeli, vamuyuvhitire mukatji kavi rongo, vamupulire mu Udjuni, ntani vamutwalire kuwiru mu ghuyerere.''