¹ Renka navantje ovo vakaro kuntji ya djoko ya Ghupika vafumadeke vahona vana ghumwavo nalikuto nalintje. Vana hepa kurughana evi mposhi lidina lyaKarunga namarongo vadire kughashwaghura. ² Vapika ovo vakaro navahona vavapuli kapishi vaneghede lipiro lifumadeko mukonda ashi navantje vapuli. Nani ngoli, vana hepa kuva rughanena unene, konda ashi vahona ovo vava kwafango muvirighana vyavo vavo vapuli ntani vavo vava hora. Ronga nakurondora vininke evi. ³ Nange kehe umwe ana kurongo lidi veta lya vimpempa ntani kapi dina kukuwa na nkango daghushiri daHompa wetu Yesus Kristus nalirongo lya uKarunga, ⁴ ghuye mukunenepeki ntani kundereko ovyo ayuvha. Ghuye akara nalirwameno lya uvera mudimutangu nalikanyi kuhamena kunkango dakukutwaredera ku mfudu, marumbatano, matuka, kukughayarera vyavidona, ⁵ ntani dimutangu dakupira kupwa pakatji kavantu ovo vanakaro nandunge da ghukaro wa ghudona. Vavo va kombanita ushiri ntani vavo kuyara ashi mukukarera Karunga ndjo ndjira yakuwana maliva ghamangi. Kupore kuvininke kuvininke vyakufana ngoli. ⁶ Weno ukwa Karunga ku ngaghopeka muntu unene nange atamuburako ovyo aweka, ⁷ konda ashi kundereko ovyo twayitamo mu udjuni ntani kunderko ngatuya shimba mo. ⁸ Mulivango lya kurenka ashi, renkenu tutambureko ndya na vyuma tunakara navyo. ⁹ Weno kovo vana shano kukara ungagho kuwira mumasheteko, mushiraha. Vavo kuwira mughugova wa ungi namadovho gha shiponga, ntani na kehe vino vime vya kudamita vantu mulidjonaghuko na lihanauko. ¹⁰ Konda shihoro sha maliva ndjo ndandani ya vininke navintje vyavidona vantu vamwe ovo vavihoro vyava pukita vatunde mulipuro ntani vakuyitira vavene ligugho lya linene. ¹¹ Ano ove, muntu waKarunga, kupore ghutunde kuvininke evi. Rambarara uhungami, uKarunga, Lipuliro, Shihoro, lididimiko, nanti na ghughomoki. ¹² Rwana vita vya viwa vya mulipuro. Kwaterera kumunyo wanaruntje kovyo vakuyitira, ntani vya kuhamena kovyo watapire litongonono lya liwa kumeho ya vambangi vavangi. ¹³ Ame natapa marawira gha kukoye kumeho ya Karunga, wa kutapa monyo kuvininke navintje, nakumeho ya Kristus Yesus ogho angambipaliro litongonono lya liwa kumeho ya Pontis Pilatus, ¹⁴ mukukwama muragho paahana livara ndi po lirundiro, dogoro limoneko lya Hompa wetu Yesus Kristus. ¹⁵ Karunga nga shorora limoneko lya Kristus paruvede rwa ghuhunga- Karunga, muwaavekwa na ahurur mupangeli, Hompa wakukarerera ntani Hompa mupangeli. ¹⁶ Ahuru kapi afa ntani kwakara mushite shakudira kumu shuwenena. Kundereko muntu wakumu mona ndi wakuvura kumunongonona. Vamufumadeke nakupangera kunaruntje. Amen. ¹⁷ Rondora vangagho vamu Udjuni ghuno kapishi vakunenepeke ntani kapishi vature lihuguvaro mughu ngagho, ovyo vya diro kuyivikwa. Mulivango lya kurenka ashi, vanahepa kuhuguvara mwa Karunga. Ghuye kutapa kukwetu ungagho naghuntje waghu ushiri mukutu hafita. ¹⁸ Vatantere mukurughana uwa, muku ngaghopa muvi ninke vya viwa, ntani kukara unongo nakuhora kukutapera. ¹⁹ Mundjira yimwe ngava kupungwira vavene litateko lya liwa kovyo ngaviyo, mpo ashi ngava wane monyo djuni. ²⁰ Timoteus, kunga kovyo vakupire. Shwena muporongwa, vighamba vya kudira mulyo ntani namaghano gha dimutango da vipempa vatwenyanga ashi ndunge. ²¹ Vakafumu vamwe kuyuvhita evi vininke ntani vavo mbyo vayapuka vatunde kulipuro nkenda yivhure kukara kumwe nanwe.