¹ . Nandiyenderye munguminkirize omu busirusiru bwaange obudooli, baitu ddala munguminkirize. ² . Olwakubba mbakwaturwa obwiiya n’obwiiya bwa Kanca, nabafumbiize oibanywe omwe,leke mbaleete edi oKristo,nka omwaala omulongoki. ³ . Baitu ntinire, nk’ompiiri ni yabeyegerebeyegere oKaawa omu bukuyikuyi bwaamwe, n’ebirowoozo byanywe biyiinza okukyamizibwa muleke kwewerayo kimwe omu mazuma edi oKristo. ⁴ . Olwakubba omuntu naiza nabakobera oYesu owondi gwe tutabakobeire, obate nimuweebwa omwooyo owondi gwe mutaweweibwe, obate enjiri eyendi ji mutaikiriize, mukola kusai okumuguminkiriza. ⁵ . Olwakubba nkulowooza nti omu budooli bwaange tinsiingibwa muno abatume abo abakulu. ⁶ . Baitu gonze nka tindimumalirivu omu kusimoolla, baitu tindi ntyo omu kweteja, baitu twabayoleserye byoona byoona, omu ngeri yoona yoona. ⁷ . Nasiisire ninetowaize njenkai nywe mugulumizibwe olwakubba nabakobeire enjiri ya Kanca nka ndoowo kyenkusubira okuzwa ji muli? ⁸ Nanyagire Amaramyo agandi, nka nkuweebwa empeera okuzwa jibali leke mbawereze nywe. ⁹ . Erate ninabbanga nanywe nka nkwetaaga, tinazitoweranga muntu yeena yeena; Olwakubba abaluganda abazwiire omu Makedoni, bandeteire byoona byoona byenaali nkwendya. Omu byoona byoona neekuumire obutabazitoweranga omu ngeri yoona yoona,erate tindibazitoweera. ¹⁰ . Nk'amazuma ga Kristo nigali omu nje, ndowoowo omu Yakaya aliyiinza okungaana okwenyuminkiirya olwekyo. ¹¹ . Lwaki? olwakubba timbendya? oKanca ammaite nka mbendya. ¹² . Ekyo kyenkola, nkwiiza kweyongera oku kolanga ntyo, leke nnemesye abo abakwenyuminkiirya omu batume baabwe, nka bakukoba bati, bakola nka iswe ni tukola. ¹³ . Olwakubba abali nka abo nibo abatume aba bubeyeji, abakola ebya bukuyikuyi, abeisanisya abatume ba Kristo. ¹⁴ . Baitu tinewuunya, olwakubba n’oSitaani yeisanisya nka Ontumwa owaisana. ¹⁵ . Ale ti kitalo! erate n'abaweereza baamwe boona nibeisanisya nka abawereeza aba bwikiriri; enkomeero yaabwe ekwaaba kubba nka ebikolwa byaabwe. ¹⁶ . Nkwiramu okukoba nti, omuntu yeena yeena aleke kundowooza nka ndi musirusiru, baitu nikibba kityo, mumpuliirye nka nimwandiwuliriirye omusirusiru. nanje nenyumiiryeku akadooli. ¹⁷ Kinsimoire, tinkisimoire nka ekigambo kya Mukama waiswe,baitu nka omu busirusiru, erate omu maani ganu aga kwenyumiirya. ¹⁸ Olwakubba baiinji abenyumiirya omu mubiri, nanje nenyumiirya. ¹⁹ . Olwakubba muguminkiriza neisanu abasirusiru,olwakubba nywe muli bagezigezi. ²⁰ Olwakubba muguminkiriza omuntu n’ebwabafoola abairu, bwa banyaga, niyegulumiza, bwa bapaay empi omu maiso. ²¹ Neswaazire okukoba nti tubaire banaki okukola ekyo. Baitu omuntu yeena yeena kiyenyumiiryaamu (nkusimoola nka omusirusiru te), njeena nenyumiirya. ²² . Bebbulaniya? Njeena ntyo, Baisiraeri? Njeena ntyo.boona niryo ibyaire lya Ibulayimu? Njeena ntyo. ²³ . Bo baweereza ba Kristo? (nkusimoola nk’omulalu) baitu nje mbasiinga; omu kufuba nyakaliriirya, omu kubuwebwa nyakaliriirya muno, omu kukubbwa okwinji, erate emirundi zinji nka nkubulaku kadooli okufa. ²⁴ . Edi Abayudaaya nakubirwe emirundi itaanu emiigo amakumi asatu na mwendai. ²⁵ . Emirundi eisatu nakubirwe engga, omulundi ogumwe nakasukiriirwe amabbaale, emirundi isatu obwaato bwayatikire, nabasirye erate ninsiiba ebuluba wa nyanja. ²⁶ Omu kutambulanga emirundi ezinji, naikiibweku obulabe obukuzwa omu miiga, erate abanyagi., Obukuzwa edi abaiyanga lyange n’edi abamaanga. Obulabe obukuzwa omu kibuga, obulabe obukuzwa omwiirungu, obulabe obukuzwa omu nyanja, n’obulabe obukuzwa omu baluganda aba bubeyeji. ²⁷ . Omu kufuba nokukerwa, omu kubonianga emirundi ezinji, omu nzala na malo, omu kusiibanga emirundi ezinji, omu mpoowo nokubba obwereere. ²⁸ Nnoyaku ebyo walowo ekinzitoweera buliizo, okweralikiriranga olwa Maramyo goona goona. ²⁹ Naani omunaki, nje nintabba munaki? Naani akemwa n'agwa, nanje nintasaliirwe? ³⁰ . Obate nka kisaanira okwenyumiirya, nenyumiiryanga olwa bunaki bwange. ³¹ OKanca oitaamwe wa Mukama waiswe oYesu eyebalibwa emiijo joona ammaite nka tindi mubeyeji. ³² . Omu Ddamasiko owaisazza ansi wa Mukama Aleta yateegere emiryango ja kibuga oDdamasiko leke ankwaate. ³³ . Nibanyakarya mudirisa nka ndi mukisira oku bbugwe wa kibuga, nincunguka okuzwa omu mikono zaamwe.