¹ . Baitu nje oPawulo nkubegaira olwa buculeeri n’obuwombeki bwa Kristo, nje omugondu nimbba naanywe, erate owa maani nka tindi naanywe. ² Ale nkubegaira bairaba, nindibba nka ndi naanywe, nneme okubalanga amaani agwo gendowooza okubba nagwo edi abandi abalowooza nka iswe tutambula mu mukusengeryanga omubiri. ³ . Olwakubba gonze nka tutambula mu mubiri, ti tulwaana kusengeerya mubiri. ⁴ . Olwakubba ebya kulwanisya eby'antalo zaiswe tibya mubiri, baitu birina amaani agazwa edi oKanca olwa kuwendawenda obiggo; ⁵ nka tuwendawenda empaka na buli kintu ekiggungumali ekitimbibwa okulwaana n'okweteja kwa Kanca, erate nka tuwambba buli kirowoozo okusobola okugondera oKristo. ⁶ Erate nka twetekeretekere okubonereza obukakanyali boona boona, obugondu bwa nnywe nibulikiira. ⁷ . Mulorere ebintu nka nibiri? Omuntu yeena yeena ni yekakasya omunda nka wa Kristo, yerowooze kinu yenkai,erate nka naali owa Kristo naiswe nimwo tutyo. ⁸ . Olwakubba nebwenyakaliriirya okwenyumirya olwa buyinza bwaiswe Omukama waiswe buyatuwaire olw'akubomboka, wazira tilwa kubanagga, tindikwatibwa nsoni: ⁹ . Tinkwendya kwiisana nka akubatinisiirya n'ebbaluwa zange. ¹⁰ . Olwakubba basimoola bati Ebbaluwa zaamwe zizibu, za maani, baitu omu mubiri gwaamwe munaki, n’okusimoola kwaamwe tikulumu nsonga. ¹¹ . Akulowooza kinu, yetejje ati bitukoba omu bbaluwa nka tituliyo, erate nibyo tukola nka tuli naanywe. ¹² . Olwakubba titwendya kwebaara ku muwendo ogw'abo abetendereza bonkai, baitu bepima bonkai na bonkai, erate begeregaranya bonkai na bonkai, tibalina magezi. ¹³ . Naiswe iswe baitu te titulyenyumiirya okusiinga ekipimo kyaiswe, wazira omu kipimo eky’ansalo oKanca jiyatugabiire okubba ekipimo erate n'okwiika niji muli. ¹⁴ . Olwakubba titweyakaliirya okusiinga ekipimo nka abataikire ji muli: olwakubba erate mwaali niinywe,nikyo twaizire n'okwiika ji muli n’enjiri ya Kristo. ¹⁵ . Nka titwenyumiirya okusiinga ekipimo kyaiswe omu mirimu jabandi, baitu nka tukusubira, okwikiriza kwaanywe ni kulikula, olwo ensalo zaiswe omu nywe nizigaziwa. ¹⁶ . erate tulisobola okubuulira enjiri omu bifo alai naanywe,erate Obutenyumiira omu nsalo za bandi. ¹⁷ . Baitu eyenyumiirya yenyumiryenge omu Mukama waiswe. ¹⁸ Olwakubba omuntu eyetendereza yenkai tiniye asiimibwa, wazira oyo Omukama waiswe gwa gwatendereza. .