¹ . Kigwaniire okwenyumiirya, gonze nka tikusaana, baitu kannyabe omukolecebwa n'okuswekuurwa kwa Mukama waiswe. ² . Mmaite omuntu omu Kristo, emyaaka eikumi n'enai ejakairewo eyatwaliibwe omwigguru erya kasatu, obate mu mubiri, obate timu mubiri timmaite; oKanca niye ammaite. ³ . Erate mmaite omuntu aisana atyo,o obate mu mubiri, obate timu mubiri timaite, oKanca niye ammaite. ⁴ . Niyatwaliibwe omu lusuku lwa Kanca, nawuura ebigambo ebitasimolekeka, ebitasaanire muntu kubyaatula. ⁵ Oku lwa omuntu aisana atyo nnenyumiiryanga: baitu okulwange tindyenyumiirya, wazira omu bya bunaki bwange. ⁶ . Olwakubba siinga nayenderye okwenyumiiryanga, tinandibaire musirusiru; olwakubba nandisimoire amazuma: baitu mbireka, omuntu yeena yeena aleke kulowooza okunje okusiinga kyakumbonamu obate kyakuwuura jendi. ⁷ Baitu gonze nka naweweibwe okuswekuruurwa okwo, nikyo nazwiire mpeebwa eiwa omu mubiri, omukwenda wa sitaani okumboniabonia, ndemenge okugulumizibwa omuno. ⁸ . Emirundi isatu negayiriire Omukama ekigambo ekyo kinzweku. ⁹ . Nankoba ati Ekisa kyange kikkumala: olwakubba amaani gange gaikiira mu bunaki. Nikyo nazwanga n'enyumiirya n'eisanu eriinji olwa bya bunaki bwange, amaani ga Kristo leke geyongere okukoora omu nje. ¹⁰ Ale olwa Kristo nikyo nzwa nsanyukira obunaki erate okunkooranga ebya kyejo,okwetaaganga, okuyigibwanga, okugadanga,ebizibu byenyaja olwa Kristo: olwakubba nimbba omunaki, nimwo mbba owa maani. ¹¹ . Nfukire musirusiru: ninywe mwampaliriize; olwakubba nagwaniire nywe okuntendereza, olwakubba gonze nje tindi kintu baitu abatume abo abakulu omuno, tibansiinga mu kigambo kyoona kyoona. ¹² Mazuma obubonesyo bwa bwa mutume bwakorwanga wanywe omu kuguminkiriza koona koona,omu bubonesyo n'eby’amageero n'eby’amaani. ¹³ . Olwakubba kiki amaramyo agandi kigabasinganga, okwiyaku nje njenkai obutabazitoweera? Munsasire ekibbi ekyo. ¹⁴ . Bona, omulundi ogw’akasatu ati neteketeekere okwiiza ji muli, baitu tindibazitoweera, olwakubba tinkutoolya byanywe, wazira nywe. Olwakubba tikisaniire abaana okubiikiranga abakaire, wazira abakaire okubiikiranga abaana. ¹⁵ Ndiwaayo ebyange erate nanje ndyewerayo kimwei oku lwanywe, nka ndi musanyuki muno. Ale nimbendya omuno, nyendebwa kadooli? ¹⁶ . Mwikkiriza nti nje tinabazitowereire, baitu ni naali omugerengetanya, nabategere omu lukwe ni mbakwatisya. ¹⁷ Baitu Walowo amagoba ge nafunire okuzwa ji muli okwakala omwaabo benabatumiire? ¹⁸ . Neegayirire oTito okubacaara, erate ni ntuma ow'aluganda owoondi amwei naye. OTito yafunireku amagoba okuzwa ji muli? Ye nanje titwakoleire mu mwooyo gumwei? Titwatambuliire mu kisiinde kimwei? ¹⁹ . Obwairai mulowozere nka iswe twewozeerya omu maiso ganywe? bbe tusimoola binu lwa Kristo,erate oKanca nka niye mujuurwa. Banywaani bange baitu byoona byoona tubikola lwa kubomboka nywe. ²⁰ . Olwakubba ntiniire, ni ndiiza nneme okubasanga nka mukwisana nintakwendya, njeena nywe muleme kunsanga nka nkwisaana nimutakwendya kanda ni wabbaawo okulwaana, obwiiya, obusungu, empaka, okweyagaliza, okugeya, okwegulumirya, n'okujeema. ²¹ . Erate nkutiina, nindiiza te, oKanca wange alintowaaza omu maiso ganywe, nanje ni nakuwaara abaiinji abasiisire eirai ni batayendeka omu bugwaagwa n'obusiani n'obukaba bwe bakoore.